Фæстаг азты нæ горæт рæсугъдæй-рæсугъддæр кæны. Уынгтæ, административон æмæ цæрæн хæдзæртты æмрæнхъ ахсджиаг сты нæ горæты адæм, стæй фæсивæд дæр сæ улæфт культурон æгъдауæй кæм арвитой, уыцы бынæттæ дæр. Ахæмтæ сты Театралон фæзуат æмæ Къостайы цырты цур аллеяйы арæзт фонтантæ. Ахæм фонтантæ ма ис Владимир Путины уынджы, раздæры базарадон центр «Универмаг»-ы бынаты, Текстилы районы, Мамсырайы фырты уынджы «Уарзæгой удтæ». Уыдон иууылдæр цæттæ цæуынц æмæ скусдзысты 9-æм майы бæрæгбонмæ.
Ныртæккæ Театралон фæзуаты цы фонтан ис, уым кусджытæ кæнынц сыгъдæггæнæн куыстытæ. 2020 азы скуыста ацы фонтан æмæ уæдæй нырмæ æхцондзинад хæссы нæ цæрджытæн, сæрды бонты нæ сабитæн дæр у уарзондæр бынат.
Уазæгты Марфа
