Финансон æххуыс хардз цæуы нысанмæздæхтæй

Республикæ Хуссар Ирыстоны Президент Бибылты Анатоли йæхимæ райста УФ-йы Нымайæн палатæйы минæвæртты, кæцытæ Хуссар Ирыстонмæ æрцыдысты 2019 азы аивгъуыйгæ рæстæгæн Хуссар Ирыстоны социалон-экономикон рæзтæн Уæрæсе цы æхцайы фæрæзтæ хицæн кæны, уыдонæй нысанмæздæхтæй куыд пайда цæуы, уый фæдыл иумæйаг планон басгæрсты тыххæй.

Фембæлды ма хайад райста Республикæйы Контролон-нымайæн палатæйы сæрдар Гæбæраты Геннади.

Уазджытæн раарфæкæнгæйæ, Президент бузныджы ныхæстæ загъта бакæнгæ куысты тыххæй æмæ банысан кодта, уæрæсейаг финансон æххуысæй пайдакæнынады кæй ма хъуамæ уа дызæрдыгдзинæдтæ.

«Уæрæсейы Федерацийы Нымайæн палатæ Хуссар Ирыстоны 2013 азæй æххæст кæны ахсджиаг куысты гуырахст. Республикæ Хуссар Ирыстонæн социалон-экономикон рæзтæн ахъазгæнæг Инвестицион программæ реализаци кæныны фарстыл дзургæйæ, зæгъæн ис, уый 2018 азы æххæст кæй æрцыд 100 процентæй.  Ацы аз абоны онг куыстытæ æххæст æрцыдысты 70 процентæй. Афтæ хъуыды кæнын æмæ Инвестпрограммæйы реализаци баввахс уыдзæн 100 процентмæ æмæ æхцайы фæрæзтæ хардз æрцæудзысты эффективон æмæ нысанмæздæхтæй, серьезон фиппаинæгтæ уæм нæ уыдзæн», – загъта уый.

Бибылты Анатоли бузныджы ныхæстæ загъта Инвестицион программæ реализаци кæныны хаххыл РХИ-йы цы процестæ цæуынц, уыдонмæ лæмбынæг ахасты тыххæй, сæйраджыдæр, алыгъуызон объектты арæзтад, инфраструктурæ æмæ иумæйа-гæй экономикæйы рæзтмæ.

«Социалон объекттæ, кæцытæ арæзт æрцыдысты Инвестицион программæйы фæлгæтты, ахсджиаг сты Республикæ Хуссар Ирыстоны адæмæн. Социалон-экономикон фадыгыл дзургæйæ, зæгъæн ис, абон Хуссар Ирыстоны инвестортæн арæзт кæй æрцыд хорз уавæртæ», – загъта Президент.

Йæ рады, контролон мадзæлттыл къухдариуæггæнæг, УФ-йы Нымайæн палатæйы инспекцийы хистæры хæдивæг Валери Лепеха  банысан кодта иумæйаг планон басгæрст ауадзыны эффективондзинад.

Уый загъта, зæгъгæ, контролон мадзæлттæ ауадзын фадат ратдзæн, УФ-йы финансон æхуыссæй эффективонæй пайда кæныны хъуыддаг  фæбæрзонддæр кæнынæн, афтæ ма РХИ-йы Контролон-нымайæн палатæйы куысты фæстиуджытæ дæр кæй уыдзысты æвдисæн ахæм эффективондзинадæн.

«Æз ам фыццаг хатт нæ дæн, Цхинвал фæстаг азты тынг фæивдта, фæхуыздæр ис йæ инфраструктурæ. Мах уыдыстæм меди-цион кластеры, бабæрæг кодтам гуырæн хæдзар, ног арæзт фатертæ. Адæм уыдзысты бузныг. 2017 азы нæ фæстаг басгæрсты фæстæ фæфылдæр сты республикæйы сæрмагонд æфтиæгтæ. Уый тынг æхсызгон у», – загъта Валери Лепеха æмæ банысан кодта, планон басгæрст йæ кæронмæ кæй фæхæццæ кæны.

Йæ ныхæстæм гæсгæ, развæлгъау бæрæггæнæнтæ æвдыст æрцæудзысты, фæстиуджытæ та цæттæ уыдзысты хыгъды фæстæ, æрбавдисдзысты йæ Уæрæсейы Нымайæн палатæйы коллегийы, цыран хайад райсдзысты Хуссар Ирыстоны минæвæрттæ дæр.