Фæстаг рæстæджыты Хуссар Ирыстоны паддзахадон университет цы алыгъуызон мадзæлттæ ауадзы, уыдон се ‘ппæт дæр дзурæг вæййынц зонындзинæдтæ бæрзонддæр кæныныл, æнтыстытæ æмæ цины æнкъарæнтыл. Афтæ та уыд 26 ноябры дæр. Университеты разамынд æмæ студенттæ хорз бацæттæ кодтой фыццагкурсонты райсыны цытджын церемони. Мадзалмæ æрбацыдысты Хуссар Ирыстоны Президент Бибылты Анатоли, Хицауады æмæ Парламенты сæрдæрттæ Пухаты Эрик æмæ Тадтаты Алан, Университеты профессортæ æмæ ахуыргæнджытæ, студенттæ æмæ сæ ныййарджытæ.
Райдианы мадзалы хайадисджытæ ссардтой, се ‘хсæн цæсгомджынæй чи фæкуыста æмæ хæрзæрæджы йæ цардæй чи ахицæн, уыцы æмкусæг Бежанты Мэлсы рухс ном.
Уый фæстæ залы уæвджытæн æвдыст æрцыдис студентты цард æмæ архайдыл ист документалон киноныв. Хистæркурсонтæ сæ фæндиæгтæ æмæ арфæйы ныхæстæ дзырдтой фыццагкурсонтæн, лектортæн æмæ залы уæвджытæн. Университеты вокалон-инструменталон ансамблы уæнгтæ æмæ хицæн зарæггæнджытæ та сæххæст кодтой цалдæр зарæджы.
Сценæмæ схызтысты университеты фыццаг курсы студенттæ æмæ сын ард бахæрыны фæстæ раарфæ кодта университеты Студентон советы сæрдар Кокойты Аннæ. Уый загъта: «Сæххæст уæ бæллиц æмæ ныр та уæ разы лæууы ноджы стырдæр хæстæ. Хæсджын стут, цæмæй ахуыр кæнат хорз. Исат активон хайад университеты царды».
Университеты ректор Тедеты Вадим дæр фыццагкурсонтæн арфæйы ныхæстæ зæгъыны фæстæ банысан кодта, зæгъгæ, фыццаг курсмæ чи æрбацыд, уыдон хорз цæттæ сты алыварсонæй дæр æмæ бузныг загъта, кæм ахуыр кодтой, уыцы скъолаты ахуыр-гæнджытæн. Уыимæ ма Тедеты Вадим банысан кодта, зæгъгæ, нæ абоны æнтыст æмæ размæцыдмæ стыр хайбавæрд хæссынц нæ хицауад æмæ парламенты разамонджытæ æмæ сын уый тыххæй загъта стыр бузныг.
Мадзалы ныхасы рацæугæйæ, Хуссар Ирыстоны Президент Бибылты Анатоли банысан кодта, зæгъгæ, алы ныййарæг дæр тырны, цæмæй йæ кæстæр равзара æмæ ныллæууа царды раст фæндагыл. Уыцы бæллиц бирæбæрцæй æххæст цæуы. Нæ фæсивæд ахуыры, спорты, куысты фæдыл кæдæмфæнды ма ацæуой, алы ранæй дæр нæм æрыхъуысы сæ хорзы кой. Уыимæ ма Президент загъта, зæгъгæ, æнæмæнгхъæуæг нæу æмæ алчи дæр райса уæлдæр ахуырдзинад. Ис бирæ професситæ, кæцыты фæрцы махæй алчи дæр йæ цард араздзæнис æнцондæрæй. Стæй алы абитуриент дæр хъуамæ равзара ахæм дæсныйад, кæцы æрмæст йæхи нæ, фæлæ хъæуа паддзахады дæр. Алчи дæр афтæ куы араза, уæд не ‘нтыстытæ дæр уыдзысты хуыздæр.
Мадзалы хайадисджытæн æвдыст æрцыд концерт. Ирон, уырыссаг зарджытæ æмæ кæфтытæ хорз сæххæст кодтой студенттæ сæхæдæг.
Гæззаты Иван
Comments are closed, but trackbacks and pingbacks are open.