Президент Гаглойты Алан йæхимæ райста Юстицийы министр Гаглойты Олегы. Гаглойты Олег паддзахады сæргълæууæгæн радзырдта X-æм Петербургон æхсæнадæмон юридикон форум – алыгъуызон бæстæты юристты профессионалон диалогæн егъау дунеон фæ-зуаты хайадисты хатдзæгты тыххæй.
Йæ ныхæстæм гæсгæ, форумы фæлгæтты уагъд æрцыд фембæлд æндæр бæстæты коллегæтимæ, æруынаффæ кодтой æхсæнведомствойон æмгуыстады фарстытæ æмæ перспективæтыл.
«Дискусситæ уагъд цыдысты барады алыгъуызон темæтыл. Уымæй уæлдай ма æрныхас кодтам Уæрæсейы Федераци, Абхазы æмæ æндæр бæстæтæй нæ коллегæтимæ. Баныхас кодтам дарддæры æмгуыстады тыххæй», – загъта Гаглойты Олег.
Уый банысан кодта, зæгъгæ, ацы азы фæззæджы план цæуы Абхазы Юстицийы министрадимæ æмгуыстады тыххæй сразыдзинадыл къухтæ æрфыссын.
«Æхсæнведомствойон æмархайды мадзæлтты конкретон план нысан æрцæудзæн Республикæ Хуссар Ирыстоны Юстицийы министрад æмæ Республикæ Абхазы Юстицийы министрады ‘хсæн æмгуыстады тыххæй сразыдзинадыл къухтæ æрфыссын, кæцы абон у проекты стадийыл. Æмгуыстады сæйраг здæхтытæй сæ иу у дыууæ бæстæйы юстицийы органты цифровизаци.
Æрныхас кодтам æмæ бакуыстам Федералон службæимæ Тæрхондоны приставтимæ, уыцы нымæцы Хуссар Ирыстонæн Тæрхондоны приставты службæйæн æмгуыстад æмæ методологон æххуыс бакæныны тыххæй.
Иу ахсджиаг цау ма уыд Уæрæсейы Федерацийы Юстицийы министр Константин Чуйченкоимæ фембæлд. Бадзырдтам æмгуыстад адарддæр кæныны тыххæй, нысан æрцыд мадзæлттæ, кæцытæ здæхт сты Республикæ Хуссар Ирыстоны Юстицийы министрады фадæттæ фæхуыздæр кæнынмæ. Адарддæр кæндзыстæм нæ иумæйаг куыст. Ныфс мæ ис, иу азмæ дзы фæстиуджытæ кæй уыдзæн», – загъта Гаглойты Олег.
Президенты бацымыдис кодта Юстицийы министрады кусджыты пенсион ифтонгад. Гаглойты Олег банысан кодта, зæгъгæ, ацы фарст аскъуыддзаг кæнын у сæйраг хæстæй сæ иу. Гаглойты Алан бахæс кодта ацы фарст контролы бын дарын.
«Ацы фарст аскъуыддзаг кæнынмæ æнхъæлмæ кæсынц бирæ кусджытæ. Кусдзыстæм æнгомæй», – загъта Президент.
Comments are closed, but trackbacks and pingbacks are open.