Знон Гаглойты Алан æмбырд ауагъта республикæйы тыхон структурæты къухдариуæггæнджытæн.

Йæ куысты хайад райстой Парламенты Сæрдар Æлборты Алан æмæ Президенты Администрацийы  къухдариуæггæнæг  Джиоты Алан.

Æмбырды республикæйы Генералон прокуроры хæстæ æххæстгæнæг Битеты Сергей информаци радта йæ дæлбар ведомствойы бакæнгæ куысты тыххæй.

Уый куыд банысан кодта, афтæмæй ныртæккæ слестгæнæн мадзæлттæ уагъд цæуынц  экстрадицигонд æмбæстæгтæ Цхуырбайы фырт æмæ Мамытайы фырты хъуыддæгты фæдыл, кæцыты аххосджын кæнынц, Хуссар Ирыстоны æмбæстæгты кæй амардтой, уый тыххæй.

Ныртæккæ Генпрокуратурæ слестгæнæн мадзæлттæ уадзы фыдракæнды æппæт æууæлтæ раргом кæныны фæдыл. Тагъд рæстæджы æнхъæлмæ кæсынц Аулохы фырты экстрадицимæ дæр, кæцыйы аххосджын кæнынц  давыны хъуыддаджы.

Битеты Сергей радзырдта, Инвестицион программæйы объектты арæзтад æмæ реконструкцийы рæстæджы РГУП «Дорэкспострой» битумы аргъ кæй фæфылдæр кодта, уый фæдыл цы слестгæнæн мадзæлттæ ауагътой, уый тыххæй. Слестгæнæн мадзæлттæ кæронмæ бахæццæ сты æмæ хъуыддаг балæвæрдтой бухгалтерон экспертизæмæ. РГКП «Водоканал»-мæ ахасты уголовон хъуыддаджы фæдыл дæр уагъд цæуы бухгалтерон экспертизæ. Экспертизæйы фæстæ хъуыддаг адæтдзысты тæрхондонон органтæм.

Хуыбылты Валерийы номыл горæты парчы реконструкцийы рæстæджы æрцæугæ фæткхалынадты фæдыл бæрæггæнæн мадзæлтты тыххæй Битеты Сергей радзырдта, зæгъгæ, æрмæстдæр уым цы цад ис, уый реконструкцийы фæдыл хæрдзтæ æмбæлонæй фылдæр уыдысты 5 милуан сомы, быцæуæвæрд къулы битумы гъæд та дзуапп нæ дæтты æмбæлон стандарттæн. Бæрæггæнæн куыстыты фæстиуджытæ æвæстиатæй фехъусын кæндзысты Президентæн.

Мидхъуыддæгты министр Гæззаты  Валери дæр доклад сарæзта министрады бакæнгæ куысты тыххæй.

Уый куыд радзырдта, афтæмæй хыгъдон рæстæджы республикæйы криминогенон уавæр уыд стабилон. Регистраци æрцыд æртæ фыдракæнды. Уыдонæй дыууæйы раргом кодтой мидхъуыддæгты органтæ. Алыгъуызон барадхалынæдты тыххæй бæрндзинадмæ æркондæуыд цалдæр адæймаджы, уыцы нымæцы иу æмбæстаг, кæцы фехæлдта æхсæнадон фæтк.

Æмбырды ныхас цыд Сæрмагонд хæстон операцийы тыххæй дæр.

Президент Гаглойты Алан фæндон бахаста, цæмæй Сæрмагонд хæстон операцийы хайадисджытæ æмæ сæ бинонты тыххæй арæзт æрцæуа æхсæнадон организаци.

«Февралы иу аз сæххæст уыдзæн, Украинæйы Сæрмагонд операци куы райдыдта, ууыл. Фыццаг бонæй фæстæмæ уыцы операцийы Хуссар Ирыстоны хæстонтæ активон хайад исынц. Не ‘мбæстæгтæ системон æгъдауæй æмбырд кæнынц гуманитарон æххуыс æмæ йæ æрвитынц нæ хæстонтæн. О, фæлæ гуманитарон æххуыс цæмæй бынатмæ фæхæццæ кæной, уый тыххæй сæвзæрынц бæрæг проблемæтæ, системæ бæстонгонд кæй нæу, уый тыххæй. Мæн фæнды, цæмæй арæзт æрцæуа æхсæнадон организаци, кæцы архайдзæн æрвылбонон фарстатыл, уыцы нымæцы гуманитарон æх-хуыс æмбырд æмæ йæ æрвитыны фарстатыл дæр», — загъта Гаглойты Алан.

Йæ ныхæстæм гæсгæ, æххуыс кæндзысты Сæрмагонд хæстон операцийы хайадисджытæн дæр æмæ сæ бинонтæн дæр.

«Бæрæг проблемæтæ кæй сæвзæрд, уый мах зонæм. Уыцы проблемæты хъæуы системонæй скъуыддзаг кæнын. Стыр хъыгагæн, Сæрмагонд хæстон операцийы хайадисджыты ‘хсæн ис фæмардуæвджытæ дæр. Сæ бинонтæн хъæуы баххуыс кæнын. Уый тыххæй та хъæуы саразын зонæнты базæ, статистикæ аразын æмæ уавæрмæ хъус дарын, цæмæй æххуыс цæуа системон æгъдауæй æмæ нысанмæздæхтæй», — загъта Президент æмæ бахæс кодта, цæмæй ацы фарсты фæдыл дæр фæндæттæ бацæттæ кæной æмæ сæ иу къуырийы æмгъуыдмæ арвитой республикæйы Хъахъхъæнынады министрадмæ.

Нæ уацх.