Арæнгæрон гуырдзиаг хъæу Эргнетмæ хæстæг Инциденттæ ма æруадзын æмæ сæм хъусдард здахыны фæдыл механизмты фæлгæтты цы радон фембæлд уагъд æрцыд, уым сæйраг хъусдард здæхт æрцыд паддзахадон арæнтæ халын æмæ демаркаци æмæ делимитацийы фарстытæ.
Механизмты куысты хайад райстой Хуссар Ирыстон, Уæрæсейы Федераци æмæ Гуырдзыстоны минæвæрттæ, афтæ Евроцæдис æмæ ЕÆÆО-йы минæвæрттæ.
Хуссар Ирыстонæй делегацийы сæргълæууæг, РХИ-йы Президенты Паддзахадон уынаффæгæнæг Санахъоты Дауыт фембæлдæн хатдзæгтæ аразгæйæ, банысан кодта, зæгъгæ, уынаффæ кодтой арæнтыл æрцæугæ цаутæ æмæ арæнтыл хизынимæ баст фарстытыл.
«Механизмты куысты фæстаг фембæлдæй фæстæмæ паддзахадон арæнтæ фехалыны тыххæй ахст æрцыд 23 æмбæстаджы, уыдонæй 7 сты Гуырдзыстоны æмбæстæгтæ. Ныридæгæн дзы æхсæз æмбæстаджы æмбæлон процедурæтæ ауадзыны фæстиуæгæн сæрибар æрцыдысты.
Гуырдзиаг информацион фæрæзты минæвæртты та радон хатт цымыдис кодта Гиунашвили Георгийы хъысмæт. Уый ахст æрцыд, РХИ-йы Паддзахадон æдасдзинады комитеты хъусынгæнинагмæ гæсгæ диверсион-террористон архайды зæрдæхсайгæ кæй уыд, уый тыххæй. Санахъоты Дауыты ныхæстæм гæсгæ Гиунашвилийы фæдыл нырма цæуы фæдысгарæн мадзæлттæ. Уыцы фарстыл дзырд цыд фембæлды дæр, фæлæ абоны онг нырма ницы ног информаци ис. ”Фæдысгарæн мадзæлттæ куы фæуой, уæд алы фарстæн дæр лæвæрд æрцæудзæн конкретон дзуаппытæ”, – загъта Санахъоты Дауыт.
Паддзахадон арæнтæ дилимитаци æмæ демаркацийы фæрстытыл дзырд куы цæуа, уæд хуссарирыстойнаг делегацийы сæргълæууæг куыд банысан кодта, афтæмæй фембæлды ацы фарстыл дзырд цыд лæмбынæг.
«Ацы фарст аскъуыддзаг кæнын баст у, арæнгæрон территорийыл чи цæры, уыцы æмбæстæгты цы тыхсын кæны, ахæм гуманитарон фарстытæ æрбæстон кæныныл. Уый хауы Гуырдзыстоны æмбæстæгтæм дæр. Хуссарирыстойнаг фарс æдзухдæр дзуры уыцы проблемæйыл. Фæнды мæ банысан кæнын уый, æмæ Гуырдзыстоны æмбæстæгтæ хъуамæ æмбарой, бар сын кæй нæй Хуссар Ирыстоны территорийыл хъæууонхæдзарадон куыстытæ кæнын. Арæнтыл ахæм уавæртæ цæмæй мауал уой, уый тыххæй æнæмæнгæй гуырдзиаг фарсимæ иумæ хъæуы бакæнын паддзахадон арæнтæ демаркаци æмæ делимитацийы фæдыл куыстытæ, цæмæй йæ адæм æмбарой, паддзахадон арæн кæуылты цæуы æмæ йæ мауал халой», – банысан кодта Санахъоты Дауыт.
Гуырдзиаг хъæу Собисы тыллæг æмбырд кодтой гуырдзиаг информацион фæрæзтæ куыд хъусын кæнынц, уымæ гæсгæ, ома, уæрæсейаг арæнхъахъхъæнджытæ æмæ æфсæддонтæ, ома, хæдтæхджытæ æмæ танкты руаджы. Уый фæдыл Санахъоты Дауыт карзæй бафæдзæхста, зæгъгæ, дæ бæстæйы æмбæстæгты нæ хъæуы сайын, цыфæнды политикон æфтиæгтæ дзы куы исай, уæддæр. Ам бæрндзинад ис, ацы мæнг информаци чи парахт кæны, уыдоныл.
Радон механизмты фæлгæтты куыст дарддæр уагъд цæудзæн 28 сентябры.
Къæбулты Маринæ
Comments are closed, but trackbacks and pingbacks are open.