Ацы аз Ленингоры поселочы кусын райдайдзæн ног хъæууонхæдзарадон базар, кæцы арæзт цæуы йæ централон уынгтæй сæ иуы. Базары аразынц нырыккон домæнтæм гæсгæ, ам районы хъæууонхæдзарадон продукттæ уадзджытæн сæ бон уыдзæн сæ продукци реализаци кæнын нормалон уавæрты. Базары территори дих кæны дыууæ зонæйыл — гом базарадон фæзуат æмæ иууæладзыгон павильон. Гом фæзуаты ныридæгæн арæзт фæцис йæ æмбæрзт, кæцыйы уыдзысты базар кæнынæн хæрзвадат тæрхджытæ. Иууæладзыгон павильон арæзт æрцæудзæн раздæры зæронд базары бынаты. Ам уæй кæндзысты халсæрттæ, дзидза, æхсыры æмæ кæсаджы продукттæ. Бæстыхайы ма уыдзæнис административон хатæн, лæггадгæнæг персоналæн хатæн.

Объект æндидзыд цæуы 2015-2017 азтæн Хуссар Ирыстоны социалон-экономикон рæзтæн ахъазгæнæг Инвестицион программæ реализаци кæныны фæлгæтты. Куыстытæ æххæст кæны уæрæсейаг арæзтадон компани «СоюзСтройПроект» (йæ къухдариуæггæнæг — Григорий  Наумов).

Социалон инфраструктурæйы рæзт у ахсджиаг къахдзæф Ленингоры районы реабилитаци æмæ æндидзын кæныны хъуыддаджы. Ацы районы сæйрагдæр хай бирæ рæстæджы уыдис Гуырдзыстоны оккупацийы бын.

Арæзтадон компанийы фадыджы хистæр Аркади Марков куыд фехъусын кодта, афтæмæй ныртæккæ сæ тæмæны сты æфсæйнаг конструкциты монтажгæнæн куыстытæ, фесты астæрды бетонгæнæн куыстытæ иууылдæр. Ацы объекты кусынц 8 адæймаджы, уыдонæй 6 сты бынæттон цæрджытæ.

«Финанскæнынады нæй проблемæтæ, куыстытæ цæуынц графикмæ гæсгæ. Базар уыдзæн нырыккон, æппæт фадæттæ дæр дзы уыдзæнис базар кæнынæн», — банысан кодта фадыджы хистæр.

Базары сæндидзын кæнынæн ис стыр нысаниуæг Ленингоры районы цæрджытæн, кæцытæн фадат уыдзæнис хисæрмагонд секторы æркæнгæ хъæууонхæдзарадон продукци балхæнынæн.

Comments are closed, but trackbacks and pingbacks are open.