Цхинвалы уагъд æрцыд Паддзахад Аланийы фыццаг гом чемпионат пауэрлифтингæй. Уыцы иурæстæджы ма дыккаг хатт уагъд æрцыд чемпионат афтæхуыйнæг «жим лежа»-йæ дæр. Ивгъуыд аз ацы ерыстæ стыр цымыдисдзинад сæвзæрын кодтой спортуарзджытæм. «РХИ-йы пауэрлифтингы федераци»-йы президент Æлборты Леваны ныхæстæм гæсгæ, уый бахынцгæйæ, ацы аз сфæнд кодтой ерыстæ пауэрлифтингæй дæр ауадзын. Хайад сæ райстой 30 спортсмены бæрц. Уыдон уыдысты куыд Цхинвал, афтæ ма Ленингор, Дзау æмæ Знауыры районтæй.
Чемпионат уагъд цыд дунеон ерысты фæткмæ гæсгæ. Фæтк æххæст кæнынмæ сæ хъус дардтой тæрхонгæнджыты коллегийы уæнгтæ, кæцыйы сконды уыдысты дунеон турнирты уæлахиздзау Икъаты Сæрмæт æмæ Хуссар Ирыстоны ивгъуыд азы чемпионаты уæлахиздзау Сиукъаты Алымбег.
Æлборты Леван куыд банысан кодта, афтæмæй ерысты фæстиуджытæм гæсгæ арæзт æрцæудзæн Хуссар Ирыстоны æмбырдгонд командæ, кæцы хайад исдзæн алыгъуызон ерысты.
Чемпионат официалонæй байгом кæныны церемонийы æрæмбырдуæвджытæ, иу уысм æмырæй алæугæйæ, ссардтой, Украинæйы сæрмагонд хæстон операцийы рæстæджы чи фæмард, уыдоны рухс нæмттæ. Ерысты хайадисджыты раз раныхас кодта РХИ-йы Фæсивæдон политикæ æмæ спорты фæдыл комитеты сæрдар Зассеты Сергей. Йæ ныхæстæм гæсгæ Хуссар Ирыстоны бирæ тыхджын лæппутæ ис æмæ сын ныр фадат фæцис ерысты сæхи равдисынæн.
Ерысты фæстиуджытæм гæсгæ пауэрлифтингæй чемпионаты уæлахиздзаутæ систы Гаглойты Леван, Джиоты Ацæмæз, Джиоты Роберт, Сиукъаты Ацæмæз, Æлборты Леван æмæ Тадтаты Олег. Тадтаты Олег ма Вилксы коэффициентмæ гæсгæ нымад æрцыд чемпионаты абсолютон уæлахиздзауыл. Уый æртæ дисциплинæйы равдыста 740 киллограммы бæрæггæнæн.
«Жим лежа» кæй хонынц, уым та фыццаг бынæттæ бацахстой Гаглойты Леван, Джиоты Ацæмæз, Икъаты Хетæг, Гæбæраты Марат, Карсанты Марат, Æлборты Леван æмæ Тадтаты Олег. Ам та Вилксы коэффициентмæ гæсгæ абсолютон чемпион ссис Карсанты Марат.
Пауэрлифтингы федерацийы президент Æлборты Леван куыд фехъусын кодта, афтæмæй ма ацы аз хъавынц тыхон экстремæй ерыстæ ауадзын «Паддзахад Аланийы иууыл тыхджындæр адæймаг», зæгъгæ, ахæм номимæ.
Пауэрлифтингы федераци æмæ Фæсивæдон политикæ æмæ спорты комитетмæ стыр плæнттæ ис спорты ацы хуызы размæцыды фæдыл. Зæгъæм, уæззау атлетикæйы скъолайы гом æрцыд пауэрлифтингы секци дæр.
Хуриты Батрадз
Comments are closed, but trackbacks and pingbacks are open.