Фæтагъд кæнæм бынæттон мыхуыр рафыссыныл

Мадӕлон ӕвзаджы рӕзтæн ахъазгæнæг сты мыхуыры фӕрӕзтӕ дӕр ӕмӕ сӕм хорз ахаст чи дары, уыдон сты сӕ иузӕрдион хӕлӕрттӕ. Нӕ республикӕйы ӕмбӕстӕгтӕн 95 азмӕ ӕввахс уырдыг лӕууы газет «Хурзӕрин» ӕмӕ сын уал азы дӕргъы кӕны цӕстуарзон лӕггад. Фӕлӕ ма адӕм фӕзӕгъынц, лӕггад дыууӕрдӕм у, зӕгъгӕ. Уый та афтӕ ӕмбарын хъӕуы, ӕмӕ дын ӕппӕт йӕ хъару ӕмӕ тых чи нӕ ӕвгъау кӕны, ӕрвылбон дӕ мыхуыры фӕлмӕн дзырдтӕй чи рӕвдауы, уыцы газет дӕр йӕ кӕсӕгӕй домы цахӕмдӕр ныфсы таг. Уый та у, цӕмӕй йӕм кӕсӕг йе ‘ргом тынгдӕр раздаха, балӕууа йе ‘нцой.

Фӕлӕ йӕ ӕргомӕй зӕгъӕм: азӕй аз къаддӕр кӕнынц, Хуссар Ирыстоны цы мыхуыры органтӕ цӕуы, уыдон рафысджыты нымӕц. Зӕгъӕм, «Югосетпечать»-ы хистӕр Саулохты Зоя мын 18-ӕм декабры цы зонӕнтӕ радта, уыдон сты ахӕм: газет «Хурзӕрин» рафыстой 232 адӕймаджы, «Южная Осетия» – 369, «Республика» – 373 ӕмӕ журнал «Фидиуӕг» та ӕрмӕстдӕр 77 экземпляры. Нырма сӕм зонӕнтӕ нӕй районтӕй, фӕлӕ уыдон дӕр зӕрдӕйы фӕндиаг кӕм уыдзысты. Зӕгъӕм ӕй комкоммӕ: раздӕр азты-иу периодикон мыхуыр рафыссыны кампанийы рӕстӕджы цырд фӕлӕууыдысты куыстуӕттӕ, уагдӕттӕ ӕмӕ организациты сӕргълӕуджытӕ ӕмӕ фыссын кодтой сӕ дӕлбаруӕвӕг кусджытӕн газеттӕ ӕмӕ журналтӕ. Фӕлӕ, хъыгагӕн, ныр ахӕм куыст нал ӕнкъардӕуы.

Зынаргъ ӕмбӕстӕгтӕ, рафыссут ӕмӕ кӕсут бынӕттон мыхуыры фӕрӕзтӕ, цалынмӕ нӕ байрӕджы, уӕдмӕ.

ХУЫБИАТЫ Никъала