Республикӕйы ӕвзонг натуралистты станцы ахуыргӕн-джыты коллектив, куыд ӕрвылаз, афтӕ та ныр дӕр Цхинвалы скъолаты ахуыргӕнинӕг-тимӕ сорганизаци кодтой экологион акци «Цъæх æвзар».
Ацӕугӕ къуыри та ацы экологион акцийӕн сарӕзтой хат-дзӕгтӕ, йӕ хайадисджытӕ та уыдысты, куыд горӕты, афтӕ районты астӕуккаг скъолаты ахуыргӕнинӕгтӕ дӕр. Ӕвзонг натуралистты станцы ахуыры хайы сæргълæууæг Гасситы Дзерассæ куыд загъта, афтӕмӕй фыццаг акци коллектив сорганизаци кодтой 2005 азы ахӕм девизимӕ «Превратим наш город в цветущий сад».
«Ацы акцийы хайад райстой канд астӕуккаг скъолаты ахуыргӕнджытӕ ӕмӕ ахуыргӕнинӕгтӕ нӕ, фӕлӕ ма Цхинвалы цæрджытӕй дæр бирӕтӕ, кӕцытӕ сӕ хӕдзӕртты раз ныссагътой талатӕ ӕмӕ дидинджытӕ» – банысан кодта Гасситы Дзерассæ. Азӕй-азмӕ фылдӕр кӕны экологион акциты хайадисджыты нымӕц.
Гассион ма куыд зӕгъы, афтӕмӕй ацӕугӕ фондз азы дӕргъы акци «Цъæх æвзар»-ы хайад райстой горӕты 1-аг, 3-аг, 5-ӕм,6-ӕм, 9-ӕм, 11-ӕм ӕмӕ 12-ӕм скъолаты ахуыргӕнинӕгтӕ, афтӕ ма Цхинвалы скъола-интернат, Дзауы астӕуккаг скъола ӕмӕ скъола-интернат, Гуфтайы скъола, Ленингор, Орчъосан, Цъинагар, Зар, Цъунары скъолатӕ ӕмӕ Республикӕйы районты бирӕ ӕндӕр скъолатӕ.
Ацы акцийы жюрийы уӕнгтӕ уыдысты РХИ-йы Хъӕды хӕдзарады управленийы хисдæры хæдивæг Къӕбулты Инал, «РХИ-йы Сырх чиныг»-ы автор ӕмӕ редактор Къӕбулты Зауыр ӕмӕ РХИ-йы Ахуырады министрады минӕвар Джиоты Эльзӕ. Уыдон хатдзӕгтӕ сарӕзтой экологион акци «Цъæх æвзар»-ӕн. Жюри куыд аскъуыддзаг кодта, уымӕ гӕсгӕ ӕртыккаг бынат адих кодтой акцийы дыууӕ хайадисджытыл – Цхинвалы скъола-интернат ӕмӕ Знауыры районы Балтайы скъола. Дыккаг бынат саккаг кодтой Цхинвалы 9-ӕм астӕуккаг скъолайӕн. Фыццаг бынат та бацахста Ленингоры районы Цъинагары астӕуккаг скъола. Ацы скъолайы ахуыргӕнинӕгтӕ се скъолайы алыварс ныссыгъдӕг кодтой ӕмӕ ныссагътой талатӕ. Уымæй уæлдай ма хъӕуы ӕмӕ йӕ алыварс цы брон ныттымбыл, уыдон дӕр асыгъдӕг кодтой ӕмӕ хъӕуы цӕрджытӕм ӕрсидтысты, цӕмӕй сӕ алыварс ӕрдз ма чъизи кӕной.
Фембӕлды фӕстӕ Ахуырады министрады минӕвар раарфӕ кодта акцийы хайадисджытӕн, афтӕ зӕрдиагӕй кӕй аудынц ӕрдзыл ӕмӕ Хуссар Ирыстоны ӕрдзы фæсауæрцтæ бахъахъхъӕныныл.
Ӕвзонг натуралистты станцы директор Мӕргъиты Ирбег раарфӕ кодта акцийы уæлахиздзаутæн ӕмӕ сын радта зӕр-дылдарӕн сувениртӕ.
Гуыцмæзты Евелинӕ
Comments are closed, but trackbacks and pingbacks are open.