Цхинвалы цæрæг Дзабиты Иналы амæлæты æмæ Цхуырбаты Николай æмæ Хъуылымбегты Герсаны фæнæмыны тыххæй хъуыддагмæ æркастысты Цхинвалы горæтон тæрхондоны 1-æм августы. Тæрхонгæнджыты коллегийы сконды уыдысты Тыбылты Инал (сæрдар), Кокойты Оксанæ æмæ Брикалова Мадинæ. Уый размæ Цхинвалы горæтон тæрхондонмæ æмбæлон куырдиат балæвæрдта фæмардуæвæджы идæдз Соттиты Оксанæ.
Хъуыддаджы фæдыл æдæппæтæй аххосджынтыл нымад цæуынц авд адæймаджы, уыдонæй дыууæ – Наниты Ацæмæз æмæ Багаты Алан сты ахст. 2020 азы августы кæрон Хуссар Ирыстоны мидхъуыддæгты министрады криминалон милицийы бæстыхайы бафарстыты фæстæ амард Цхинвалы цæрæг Дзабиты Инал. Ацы фыдракæнд расайдта уæрæх æхсæнадон резонанс, кæцы æркодта РХИ-йы хицауады отставкæмæ.
Цхинвалы горæтон тæрхондон Дзабиты Иналы хъуыддаг фæстæмæ раздæхта прокуратурæмæ ногæй фæдагуырд ауадзынмæ.
«Мах куырдиат балæвæрдтам, цæмæй хъуыддаг фæстæмæ здæхт æрцыдаит прокуратурæмæ, уымæн æмæ дзы ис уголовон-процессуалон кодексы бархæлынæдтæ, ома номхуындæй уыцы бындуртæ, кæцытыл бындуриуæг кæны фæдагурæг фæаххосджын кæныны хатдзæджы, уыдон хъуамæ фидаргонд цæуой бæлвырдгæнæнтæй. Ацы бæлвырдгæнæнты цыбыр мидис кæнæ кæй фæрсынц, уыцы адæймæгты номхыгъд æвдисæнты хуызы хъуамæ бацамынд æрцæуой аххосджынгæнæн хатдзæджы. Тæрхондонæн йæ бон аххосджынгæнæн хатдзæджы фæлгæттæй ахизын кæй нæу, уымæ гæсгæ сæ бон нæу сæрмагондæй хъуыддаджы цахæмдæр æрмæджытæ сахуыр кæнынæн, цæмæй уæлæмхас бæлвырдгæнæнтæ ссардæуа. Уым ис ахæм конкретон рæдыдтытæ, номхуындæй бацамынд æрцыд, зæгъгæ, Дзабиты Иналы амæлæт банысан æрцыд 13:52 сахатыл, фæлæ аххосджынгæнæн хатдзæджы уый бафидар не рцыд. Уымæ гæсгæ бархалынæдтæ аиуварс кæныны тыххæй хъуыддаг æрвыст æрцыд фæстæмæ прокуратурæмæ. Æмæ тæрхон кæуыл цæуы, уыцы адæймæгты сæйрагг фарст уыд, зæгъгæ, прокуратурæ цахæм æмгъуыдты хъуамæ сраст кæна æруадзгæ бархалынæдты. Уыдоны фæндит, цæмæй архайа уый размæ райсгæ нормæ, зæгъгæ, фондз боны æмгъуыдмæ прокуратурæ хъуамæ басгара хъуыддаджы, аиуварс кæна бархалынæдтæ æмæ хъуыддаг æркæсынмæ арвита тæрхондонмæ.
Фæдагуырд нымад цæуы фæуыдыл. Тæрхонгæнæг дæр æй абон банысан кодта йæ хатдзæджы, зæгъгæ, архайды квалификацийæн аивæн нæй. Хъæуы сбæрæг кæнын фæдагуырды рæстæджы æруадзгæ бархалынæдты. Фæлæ мæ ныфс ис, хъуыддаджы æрмæджытæ сахуыр кæнынмæ куы æрывналæм, уæд нын уыдзæн конкретон куырдиæттæ иуæй-иу бæлвырдгæнæнты банымайынæн гæнæн кæй нæй, уый тыххæй»,- банысан кодта адвокат Гатагонова Фатимæ.
КОКАЙТЫ Зæринæ
Comments are closed, but trackbacks and pingbacks are open.