ДÆ ЦÆСТ АХÆСС ДУНЕЙЫЛ

Владимир Путин фембæлд

журналисттимæ

Мыхуыры боны размæ УФ-йы Президент Владимир Путин газет «Комсомольская правда»-йы редакцийы æрæмбырд кодта зынгæ уæрæсейаг газетты редакторты æмæ информацион агентадты къухдариуæггæнджыты. Фембæлды рæстæджы Президент дзуаппытæ радта журналистты бирæ-нымæц фарстытæн, уыцы нымæцы Сирийы УФ-йы объектты æнæпилотон тæхæн аппаратты атакæйы, Корейаг æрдæгсакъадахы, АИШ æмæ Украи-нæимæ бастдзинæдтæ æрнывыл кæныны фæдыл. Афтæ ма Путин æрдзырдта 2018 азы марты УФ-йы президентон æвзæрстыты æмæ бирæ æндæр ахсджиаг фарстыты тыххæй.

Польшæ фæнд кæны Евроцæдисæй

рахизын

Польшæ, гæнæн ис, рахиза Евроцæдисы хайадисджыты скондæй, кæд æмæ ацы организацийæ финанскæнынад нæ иса, уæд, – уый тыххæй фехъусын кодта Евросоветы сæргълæууæг æмæ бæстæйы раздæры премьер-министр Дональд Туск. РИА Новости зæрдыл лæууын кæны, зæгъгæ, Польшæйæн тæссаг у, Евроцæдисы бюджетон фæрæзтæй куынæуал иса. Афтæмæй Польшæ гæнæн ис, æмæ фесафа йæ хъæлæс Евроцæдисы советы.

Урæд æрцыд теракты организатор

Турчы полици æрцахста ацы бæстæйы УФ-йы æххæстбарджын минæвар Андрей Карловы амарыны сæйраг организаторы. Дипломаты фехстой 2016 азы декабры мæйы Анкарайы фоторавдысты байгом кæныны церемонийы ныхас кæныны рæстæджы. Ацы теракты æххæстгæнæджы амард-той полицийы спецоперацийы рæстæджы. Ныр туркаг хицауад фехъусын кодта, зæгъгæ, ссардтой фыдракæнды организаторы. Йæ ном ын нæма раргом кодтой.

 

Ссис Эквадоры æмбæстаг

Портал WikiLeaks-ы бындурæвæрæг Джулиан Ассанж бахатыд Эквадоры хицауадмæ æмбæстагдзинад ын радтыны тыххæй æмæ йæ куырдиат æххæст æрцыд, – фехъусын кодта бæстæйы фæсарæйнаг хъуыддæгты министр Мария Фернанда Эспиноса. Пресс-конференцийы рæстæджы уый банысан кодта, зæгъгæ, бæстæйæн ис æххæстбартæ адæймаджы бахъахъхъæныны тыххæй. Афтæ ма министр фехъусын кодта, зæгъгæ, Эквадор бахатыд Стырбританимæ Джулиан Ассанжæн политикон статус радтыны тыххæй, фæлæ Лондон не сразы. 2012 азæй фæстæмæ Ассанж ис Лондоны Эквадоры минæварады. Фæстаг рæстæджы Ассанжæн бастдзинад уыд æддагон дунеимæ, уыцы нымæцы Twitter-ы руаджы дæр.

 

Сырæзтысты УФ-йы дунеон

фæсауæрцтæ

2018 азы 5 январмæ Уæрæсейы дунеон фæсауæрцтæ систы 432, 6 миллиард доллары, – уый тыххæй фехъусын кодта Уæрæсейы банг. 2017 азы 29 декабрмæ Уæрæсейы дунеон фæсауæрцтæ уыдысты 432,1 миллиард доллары. Афтæмæй уыдон иу къуыримæ фæфылдæр сты 0,5 миллиард доллары.

 

Генштаб сбæрæг кодта æнæпилотонтæ кæцæй стахтысты, уый

Сирийы уæрæсейаг æфсæддон базæты сата-кæ кæныны тыххæй æппæт æнæпилотон тæхæн  аппараттæ уагъд æрцыдысты иу бынатæй æмæ иу рæстæджы, – фехъусын кодта Уæрæсейы Генштабы хистæр Александр Новиков. Генштабы бæрæггæнæнтæм гæсгæ, уый размæ боевиктæ спайда кодтой æрмгусгæ (кустарный) рауадзгæ æнæпилотон аппараттæй. Фæлæ 2016 азы æмбисы уыдонмæ фæзындысты фæсарæйнаг рауагъдады квадрокоптертæ. Уый ма банысан кодта, зæгъгæ, раздæр террористтæ дронтæй, сæйраджыдæр пайда кодтой уæлдæфон развæдсгæрсты тыххæй.

Хæцæнгарз истой АИШ-æй

Украинæйы нæ сæттынц сæ Гарзджын тыхтæ  хæцæнгарз АИШ-æй кæй истой, ууыл, цалынмæ уый Урс хæдзар официалонæй хорзыл банымадта, уæдмæ. Уыимæ хæцæнгарз комкоммæ æрвыстой батальон «Азов»-мæ, цыран не ‘мбæхсынц радикалон-национ цæстæнгас. Ацы хъуыддаг куы раргом, уæд ныгуылæйнаг прессæйы «Азов»-ы сайтæй аппæрстой америкæйаг рауагъды гранатометтимæ боевикты нывтæ. Фæлæ иу хатт Интернетмæ цы бахауа, уымæн æнцонтæй бамбæхсæн нал вæййы.

 

         Уæрæсе йæ делегаци  нæ арвитдзæн

Уæрæсе йæ делегаци нæ арвитдзæн Европæйы Советы Парламентон Ассамблеяйы январы сессимæ. УФ-йы Паддзахадон Думæйы вице-спикер Петр Толстой фехъусын кодта, зæгъгæ, Ассамблеяйы пленарон рабадты куысты хайад ма райсын йæ тыхы ис, уымæн æмæ Ассамблеяйы регламентмæ хаст не ‘рцыдысты барасткæнинæгтæ национ делегациты дискрминацийæ бахъахъхъæныны тыххæй. «Фæлæ Европæйы Советы Парламентон Ассамблеяйы уæнгтимæ консультацитæ уагътам æмæ дарддæр дæр уадздзыстæм, цæмæй бауырнын кæнæм нæ коллегæтæн, зæгъгæ, национ делегациты дискриминаци иууыл раздæр зиан хæссы организацийæн йæхицæн», – загъта Петр Толстой. Уый ма куыд загъта, уымæ гæсгæ январы сессийы фæстæ Ассамблеяйы президентон комитеты уæнгтæ, гæнæн ис хуынд æрцæуой Мæскуымæ Уæрæсе æмæ Европæйы Советы фидæны æмгуыстадыл æруынафæ кæныны тыххæй. Уæ зæрдыл уын лæууын кæнæм, 2014 азы Уæрæсейы минæвæрттæн ист æрцыдысты хъæлæс кæныны  бартæ æмæ Ассамблеяйы къух-дариуæггæнæг бынæтты кусыны фадат.

Информацион агентадты хъусынгæнинæгтæм гæсгæ