Хъуылымбегты Роберт, Историон зонæдты кандидат, этнограф æмæ журналист
– Æз куыд этнограф, афтæ мæ фæнды цæмæй газеты фæрстыл ныхас цæуа адæмон æгъдæутты тыххæй. Æрмæст сæ кой скæнын фаг нæу, хъуамæ нæ республикæйы цæрджытæ æрцæуой иу хатдзæгмæ æмæ иугъуызон аразой зианы, чындзæхсæвы, куывды, фидауыны æгъдæуттæ. Æнæмæнгхъæуæг нæу æмæ Цæгат Ирыстонимæ æмхуызон уой, фæлæ, кæй зæгъын æй хъæуы, хорз уаид, æнгæс куы уаиккой. Цæмæй йæ адæм æмбарой, цæй тыххæй у уыцы æгъдау æмæ йæ цы охыл аразынц, уый. Бирæ цыдæртæ хъæуы фæивын æмæ сæ, æвæццæгæн, хъæуы фæивын мыхуыры фæрæзты фæрцы, цæмæй адæмы æхсæн парахат кæной нæ фыдæлты рæсугъд æгъдæуттæ. Зонын æй, алчи разы нæ уыдзæнис уыцы хъуыдытимæ. Хорз уаид æмæ газеты иу ахæм къуым куы фæзынид, цæмæй дзы адæм сæ хъуыдытæ æргомæй дзурой. Æнæмæнг нæу æмæ ахуыргæндтæ уой. Бирæ хатт хуымæтæг кувджытæ фылдæр фæзонынц фынджы æгъдæуттæ æмæ æгъдауы мидис.
Дзæдзойты Зæринæ, нæ горæты цæрæг
– Мадæлон ирон æвзаг мадау адджын кæмæн у, уый газет «Хурзæрин»-ы фæрстыл куыннæ хъуамæ фæнда фенын рагон цымыдисаг, зондæн ахъаз таурæгътæ. Тынг мæ фæнды газет куы расидид конкурс æрыгон фæсивæды æхсæн ахæм ахсджиаг темæтыл: «Цæмæй дæн æз ирон?», «Нæ рагфыдæлты намысы фæндагыл куы нæ цæуæм, уæд чи уыдзыстæм?», «Цæмæн систы нæ кувæндæттæ рæстæг æрвитæн, ирон фынг та – минасы фæрæз?» æмæ афтæ дарддæр. Цымыдисаг уаид уый фæстæ газеты фæрстыл бакæсын нæ æрыгон фæсивæды хъуыдытæ. Æндæр æвзæгтыл цъыбар-цъыбур кæнæм, нæ мадæлон æвзагыл дзурын та нæ сæрмæ нæ хæссæм. Хорз уаид, газеткæсджытæ арæхдæр куы кæсиккой рохуаты цы дзырдтæ аззадысты, уыдон нысаниуæг, цæмæй зонæм æмæ пайда кæнæм нæхи рæсугъд дзырдтæй.
Джиголаты Павел, Цхинвалы цæрæг
– Бынæттон телеуынынад æмæ газетты цы информаци вæййы, адæмæн афæдзгай цы ныфсытæ февæрынц, уыдон-иу се ‘ппæт дæр кæронмæ æххæст куы æрцæуиккой, уæд сæм адæмы æууæнк дæр фылдæр кæнид. Ноджыдæр ма уый æмæ хъæутæй информаци фаг нæ цæуы. Районтæн хистæртæ куы снысан кæнынц, уæдæй фæстæмæ сæ кой нал райхъуысы, æмæ, кæй зæгъын æй хъæуы, раст нæу. Адæймаг бæрнон куысты куы куса, уæд æй хъуамæ цæсгомджынæй æххæст кæна, цæмæй йæ дæлбар кусджыты зæрдæтæ дæр рухс кæной.
Хуыгаты Анатоли, Хуссар Ирыстоны чингуыты рауагъдады сæйраг редактор
– Газеты фæрстыл мæ фылдæр фæнды уынын критикон æрмæджытæ. Хъæууон-хæдзарады цардыл, кæй зæгъын æй хъæуы, вæййы æрмæджытæ, фæлæ арф нæ вæййынц. Йæ размæцыдыл цы аххосæгтæ æндавынц, уыдон нысан кæнын хъæуы. Нæ республикæйы хъæздыг зæххытæ ис æмæ сындæггай схъæд сты, кусæг сæ нæй. Уыдоны нымæцы сты Еред, Орчъосан, Цъинагар, Къостайыхъæуы быдыртæ æмæ æндæртæ. Æмæ уыдоныл фыссын хъæуы. Цæмæн ласæм халсæрттæ Цæгат Кавказæй, Гуырдзыстон, Турк æмæ æндæр рæттæй, кæд æмæ ахæм фадæттæ саразæн ис нæхи республикæйы дæр? Æмæ æппæт уыдæттыл дзурын æмæ фыссын хъæуы.
Дзæгъойты Геннади, Цхинвалы цæрæг
– Газеттæ æмæ бынæттон телеуынынад горæты æрцæугæ хабæртты тыххæй алы хатт дæр оперативонæй радтынц информаци. Горæты цæрджытæй фадат кæмæн нæ фæвæййы телеуынынадмæ бакæсын, уый информаци бакæсы газеты фæрстыл. Мæнмæ гæсгæ, уый тынг æнцонвадат у.
КОКАЙТЫ Зæринæ
