Æвæццæгæн, ахæм адæймаг нæ разындзæн кæм райгуырд, цæуын, дзурын кæм базыдта, уыцы уæзæджы ма уарза. Райгуырæн бæстæмæ сæм цахæм æнкъарæнтæ ис, уый фæдыл ныхас кодта нæ горæты цæрджытæй цалдæримæ.
Джиоты Уасил – пенсиисæг. Тагъд ме стай азы мæхи ‘рдыгæй фæуыдзысты. Ацы горæты райгуырдтæн æмæ схъомыл дæн. Адæймаг уал азы кæм цæры, уыцы горæты куыд хъуамæ ма уарза. Уарзын æй æз дæр. Уарзын æй уымæн, æмæ дзы æнусты дæргъы цæрынц ме мирон адæм, кæцытæн стыр аргъ кæнын сæ фидар удыхъæды тыххæй. Æндæр адæмтимæ æмæ хицæнæй дæр бирæ æмæ алыгъуызон зын фæлварæнты сæрты рахызтысты нæ горæты цæрджытæ, фæлæ сæ уыцы уæззау цаутæ хицæнтæ æмæ дихтæ нæ ныккодтой, æмæ сæ тынгдæр æрбангом кодтой æмæ æппæт зынты сæрты дæр хызтысты иумæ. Чизоны, абон кæрæдзийыл раздæрау æнувыд нал стæм, фæлæ уый бирæбæрцæй баст у царды фæивдимæ.
Цхинвалы ма уарзын уымæн æмæ куыд мæ мад æмæ мæ фыд, афтæ мæ цардæмбалы ныййарджытæ дæр райгуырдысты ам. Ам райгуырдысты æмæ схъомыл сты нæ кæстæртæ, ам хъомыл кæнынц нæ кæстæрты кæстæртæ. Мæ алыварс куы æрбамбырд вæййынц, горæты уынгты семæ куы фæцæуын, уæд мæхи банымайын алкæмæй амондджындæрыл.
Уалыты Анатоли – ахуыргæнинаг. Цхинвалы бирæ уарзын уымæн æмæ мын дзы ис бирæ хорз зонгæтæ. Арæх амбæлæм, йæ уынгты фæтезгъо кæнæм æмæ райсæм стыр æхцондзинад.
Цхинвал ма мын уарзын кæны иуæй-иу æмбæстæгты ахаст дæр. Кæд ницы хæсджын вæййынц, уæддæр хорзырдæм аудынц горæты рæсугъхд æмæ сыгъдæгдзинадыл æмæ уый мах цахъхъæнты разæнгард кæны, цæмæй тынгдæр уарзæм нæ горæт, аудæм ын йæ сыгъдæгдзинадыл
Æлборты Аннæ – студенткæ. Куыд æндæртæн, афтæ мæнæн дæр бар нæй æмæ йæ ма уарзон Цхинвалы. Уымæн æмæ райгуырдтæн æмæ схъомыл дæн ам, ам цæрынц мæ ныййарджытæ, мæ хотæ æмæ æфсымæртæ, ирон адæм. Фæстаг æртæ азы ахуыр кæнын æндæр горæты æмæ мын куыддæр рæстæг фæзыны, афтæ æрцæуын æмæ фæцин кæнын, хорзæрдæм кæй ивы ууыл.
Кæд мæ ахуыр фæуд кæнын дыууæ азы фæстæ, уæддæр мæм абон дæр стыр тырнындзинад ис, цæмæй тагъддæр æрæздæхон Цхинвалмæ. Куыддæр мæ диплом райсон, афтæ æрыздæхдзынæн, царды ад кæм бавзæрстон, уыцы райгуырæн горæт Цхинвалмæ.
Гæззаты Иван
Comments are closed, but trackbacks and pingbacks are open.