Ныртæккæ æмбæстæгты фылдæр хай чингуыты бæсты пайда кæнын райдыдта æндæр æмæ æндæр фæрæзтæй. Уымæ гæсгæ библиотекæты цасдæрбæрцæй фæкъаддæр чиныгкæсджыты нымæц. Фæлæ уæддæр чиныгыл æнувыд æмæ иузæрдион æмбæстæгтæ дæр дзæвгар сты æмæ уый та зæрдæйæн æхсызгон у.
Анахарсисы номыл национ библиотекæйы ирон хайад (йæ сæргълæууæг Сланты Заирæ), куыд кусы, уый тыххæй бацыдтæн ацы культурон уагдонмæ. Мæ зæрдæ барухс хæрзæфснайд æмæ рæнхъæвæрд чингуыты уындæй. Сланты чызг библиотекæйы рагæй кусы æмæ фæлтæрдджын кусæг у, чиныгкæсджытыл сæмбæлы зæрдæхæларæй. Цы литературæмæ фæцымыдис кæнынц, уый сын уайтагъд сæ разы æрæвæры æмæ дзы баззайынц райгондæй. Фæлæ уыимæ иумæ Сланты чызг тынг катай кæны, йæ чингуыты фылдæр хай кæй базæронд. Фæнды йæ, цæмæй рауагъдад уыдоны ногæй рауадзыныл куса. Уыимæ нæ рауагъдады цы ног чингуытæ рацæуы, уыдонæй нæ фæхай кæнынц библиотекæйæн. Афтæмæй кæсджытæ та æдзухдæр фæфæрсынц ног уагъд литературæ. Сланты чызджы ныфс ис, ног директор кæй бакусдзæн хъуыддагыл, уымæй.
Æнæуый та сæ чингуыты нымæц хæццæ кæны 5 минæй фылдæрмæ: ирон фысджыты уацмыстæ, тæлмац литературæ, æвзагзонынады чингуытæ æмæ æндæр ахæмтæ. Ацы аз чиныгкæсджыты нымæц уыд сæдæмæ æввахс, сæ фылдæр хистæр кары адæм. Къаддæр не сты скъоладзау кæсджытæ дæр, уый та у, ирон æвзаг æмæ литературæйы ахуыргæнджыты æнтыстдзинад, уымæн æмæ сæ уыдон разæнгард кæнынц мадæлон æвзагыл чингуытæ кæсынмæ. Къостайы райгуырдæн боны хæдразмæ кæсджыты нымæц алы хатт фæфылдæр вæййы. Хъыгагæн, бынтон цъус сты нæ университеты кæсджыты нымæц. Активон чиныгкæсджытыл нымад сты Къуезерты Петр, Пъапъашвили З., Къæбысты Ирæ, Икъаты Нанули æмæ æндæртæ.
Сланты чызг ирон фысджыты сфæлдыстадыл бацæттæ кæны æмæ ауадзы изæртæ, юбилеон мадзæлттæ. Зæгъæм, фæстаг рæстæджы библиотекæйы уыди цалдæр сфæлдыстадон изæры: Бестауты Георги, Нартыхты Михал, Чеджемты Геор, Нартыхты Григолы цытæн. Активон хайад дзы райстой чиныгкæсджытæ. Уыимæ иумæ Къостайы цытæн ам æдзухдæр вæййы равдыст йæ чингуытæй, афтæ ма равдыстытæ саразы æндæр æмæ æндæр зæрдылдарæн бонты цытæн.
Хуыбиаты Никъала
