Нымад бонтæ ма ӕмӕ ӕрбалӕудзӕн, хоркуыстгӕнӕгӕн ахс-джиаг рæстæг- хуымгӕрдӕн. Уый йӕм йӕхи бацӕттӕ кӕны рагацау, цӕмӕй йӕм бавнала афоныл ӕмӕ тыллæг ӕфснайд ӕрцӕуа ӕнӕсӕфтытӕй. Уыцы хӕс сӕххӕст кӕнын та ӕрмӕст йӕхицӕй кӕнгӕ нӕу, фӕлӕ ма техникӕйы ифтонгдзинад ӕмӕ куыстхъомдзинадӕй дӕр. Уӕдӕ нӕ республикӕйы хӕдзарадтӕ сæхи куыд бацæттæ кодтой хуымгӕрдӕнмæ, уыцы фарстимӕ бахатыдтӕн «Ирагропромсервис»-ы директор Саккаты Виталимӕ ӕмӕ мын уый афтӕ радзырдта:

– Нӕ республикӕйы хӕдзарадты ӕфсирон культурӕты хуымты фӕзуат ӕдӕппӕт ахсы 2740 гектары. Хицӕнтӕй сисгӕйӕ, ӕппӕты фылдӕр бабӕстонкӕнинаг ис Ленингоры районӕн – Цъинагар, Абреу ӕмӕ Орчъосаны хӕдзарадтӕ иууыл иумӕ байтыдтой 1200 га, Знауыры районы ӕркӕрдинаг ис 1000 га ӕмӕ Цхинвалы районы та – 540 га. Кӕй зӕгъын ӕй хъӕуы, уыдон афтӕ цъус дӕр не сты абоны уавӕртӕм гӕсгӕ, уымӕн ӕмӕ нӕм нырма фаг нӕй комбайнтӕ, хуымгӕрдӕнӕн та йӕ афон куы ӕрбалӕууы, уӕд ӕм бавналын хъӕуы, кӕннод кӕрдиппӕрд кӕны. Фӕлӕ уӕддӕр ӕппӕт дӕр арӕзт ӕрцӕудзӕн уый тыххӕй, цӕмӕй зӕхкусӕг ма фӕтыхса ӕмӕ баззайа райгондӕй. Афтӕ уыд фарон аз дӕр, уӕд дӕр комбайнертӕ равдыстой фердӕхтдзинад ӕмӕ сӕ ӕнувыд ӕмӕ иузӕрдион куысты фӕрцы республикӕйы тыллӕг ӕфснайд ӕрцыд банысангонд ӕмгъуыдмӕ.

Зындгонд куыд у, афтӕмӕй республикӕйы хорӕфснайӕн комбайнтӕ ис 8, ӕрӕджы ма нӕм ӕрбафтыд фарастӕм, ног комбайн, дӕр. Уый у хъомысджындæр. Æнтысы йын, раздæры «Нива» ӕртӕ комбайны цас ӕркӕрдой, уый бӕрц. Ӕппӕты фылдӕр хуымтӕ бабӕстонкӕнинаг Ленингоры районӕн кӕй ис, уымӕ гӕсгӕ ног техникӕ йӕ куыст ӕххӕст кӕндзӕн уыцы районы хӕдзарадты. Цӕмӕй куысты рӕстӕджы ма фæкъуылымпы уой, уый тыххӕй комбайнертӕй алчи дӕр йæ бæрныуæвæг техникæйы кæны куыстæввонг, цалцæг сæ кæнынц. Уыцы куыстытæ фæуыдзысты къуырийы ӕмгъуыдмӕ. Сӕ уӕлхъус ӕдзухдӕр сты сӕйраг инженер Сиукъаты Имеда ӕмӕ бригадиртӕ. Куыстӕввонг сӕ скӕнынӕн ӕнӕмӕнг фӕхъӕуы ивӕн хӕйттӕ ӕмӕ уыдон рӕс-тӕгыл амал æрцыдысты – ӕдӕппӕт 332 мин сомы аргъ. Директор ма куыд банысан кодта, афтӕмӕй хуымгӕрдӕн ӕрбалӕудзӕн мӕйы фӕстӕ ӕмӕ уӕдмӕ цæттæ уыдзæнис техникӕ.

Хуыбиаты Никъала

Ацы æрмæджытæ дæр бакæс:

Брытъат. Ирыстоны фенддаг кæмттæй сæ иу Раззагон хæдзарады куысты фæстиуджытæ Default ThumbnailЦæмæй быдыртæ донæй æфсæдой… Default ThumbnailКуыстуарзондзинад сын фыдæлтæй баззад Default ThumbnailӔххæст кæнынц цæрджыты домæнтæ

Comments are closed, but trackbacks and pingbacks are open.