Цæгат ирыстоны

СÆЙРАГДÆР – АДÆМЫ ÆДАСДЗИНАД

Ацы бонты цыма республикæйы цард бындуронæй базмæлыд, афтæ зыны. Цæстдарæг æмæ барадхъахъхъæнæг органтæ æнæсгæрст ницыуал уадзынц. Алы куыстуæтты, организациты, ахуырадон уагдæтты иртасынц зынгсирвæзтæй тæссаг бынæттæ. Республикæйы разамынд йæ разы сæвæрд-та хæс: Кемеровойы цы трагеди æрцыд, ахæм макуыуал хъуамæ æрцæуа.

Битарты Вячеслав цы æнæрадон æмбырд ауагъта, уым æмбæлон органты бафæдзæхста, цæмæй зынгсирвæзты ныхмæ æппæтæй дæр цæттæ чи нæу, уыдонæн сæ куыст бауромой. Æдæппæт планмæ хаст æрцыд 155 объекты сбæрæг кæнын. Афтæмæй кæрæдзи фæдыл æхгæд æрцыдысты стыр фæлхасадон центртæ ЦУМ, “Глобус”, “Арктика”, сывæллæтты хиирхæфсæн центр “Рио”, культурон центр “Центр – К”, кинотеатртæ æмæ æндæртæ. Ныридæгæн рабæрæг минæй фылдæр законхалыны цауы. Ацы объектты разынд цардæн тæссаг бирæ аиппытæ. Кæм къултæ фæлгонц уыдысты æнцон ссудзæн æрмæгæй, кæм та бахъуаджы заман цы фæсауæрц ахизæнтæ вæййы, уыдон нæ уыдысты, бирæ рæтты нæ куыстой зынгсирвæзты сигнализацитæ, зынгхуыссынгæнæг системæтæ æмæ бирæ æндæр аиппытæ. Æдæппæтæй арæзт æрцыд 56 ад-министративон æрмæджы. Уавæр хуыздæр кæм уыд, уыдонæн сæ аиппытæ аиуварс кæнынæн радтой æртæ боны æмгъуыд, кæд сæ сæххæст кæной, уæд кусдзысты дарддæр. Тæссаг уавæр кæм сæвзæрд, уыцы объектты та бакодтой прокуратурæйы бар.

Зынгсирвæзты ныхмæ мадзæлттæ аразыны уæлдай ма цæстдарæг органтæ сбæрæг кодтой законхалыны æндæр цаутæ дæр: сывæллæтты спортивон секцитæ кæнæ хиирхæфсæн залтæ уыдысты ныккæндты, кæнæ æртыккаг уæладзыгæй уæлæмæ. Уымæн та æруадзæн ницыхуызы ис. Уыдон дæр æхгæд æрцыдысты.

“Ахсджиаг объекттæ æрмæст трагедийы фæстæ ма хъуамæ цæуой бæрæг, фæлæ æрвылаз дæр. Адон та ссæдзгай азтæ куыстой ахæм аиппытимæ. Кæм уыдысты уæд æмбæлон органтæ, цæуылнæ сæ бæрæг кодтой? Мах нырæй фæстæмæ хъуамæ кусæм æмзондæй, кæрæдзи æмбаргæйæ. Сæй-рагдæр искæй бизнес бахъахъхъæнын нæу, фæлæ адæмы æдасдзинад. Æз адæмы цардæй базар кæныны бар никæмæн ратдзынæн”, – загъта республикæйы сæргълæууæг Битарты Вячеслав.

Уый ма карзæй бафæдзæхста цæстдарæг æмæ барадхъахъхъæнæг органты, цæмæй законхалджытæн хатыр ма кæной, æдзух уавæр бæрæг кæной æмæ йын сæ хъусын кæной.

Нæ уацх.