БТК-4 банысан кодта йæ бæрæгбон

Ивгъуыд къуырийы кæрон Цхинвалы хуыйæн фабрикæ БТК-4-йы коллектив банысан кодтой сæ профессионалон бæрæгбон. Бæрæгбонон мадзал уагъд æрцыд Рог сæудæджерады кусæджы боны – 11 июны.

Хуыйæн фабрикæйы кусджытæн раарфæ кæнынмæ æрбацыдысты РХИ-йы Президент Бибылты Анатоли, Хицауады Сæрдар Пухаты Эрик, Сæудæджерад, транспорт æмæ энергетикæйы комитеты сæргълæууæг Бекъойты Геннади.

Фабрикæйы кусджыты раз раныхас кодта Бибылты Анатоли Уый зæрдиагæй раарфæ кодта кусджытæн сæ профессионалон боны цытæн. Банысан кодта, зæгъгæ, кад кæнын хъæуы уыцы адæймæгтæн, кæцытæ сæ куыствæллойæ дарынц сæхи æмæ сæ бинонты дæр. «Фабрикæйы куыстмæ кæсгæйæ, фидарæй зæгъæн ис, нæ рог сæудæджерадæн кæй ис хорз фидæн. Сымахæй бирæтæ хуыйæн фабрикæйы куыстой Советон дуджы дæр. Стыр бузныг уын уый тыххæй! Мах, нæ фадæттæ нæ куыд амоной, афтæ æххуыс кæндзыстæм фабрикæйæн, цæмæй рæза æмæ размæ цæуа нæ рог сæудæджерад. Ныртæккæ нæ республикæйы цы уæрæх инвестицион проекттæ æххæст æрцыдысты, уыдонæй иууыл ахадгæдæр у БТК-4. Сæ уæззау, фæлæ цæсгомджын куысты руаджы йæ кусджытæ ном кæнынц нæ республикæйæн», – загъта Президент.

Уый ма фабрикæйы кусджытæн радзырдта, æрæджы цы дам-думтæ айхъуыст, ома, фабрикæ хъуамæ æхгæд æрцæуа, кæннод та кусджыты нымæц фæкъаддæр уа, зæгъгæ, уыдонæн бындур кæй нæй. «Уый нæ, фæлæ хыгъд, республикæйы къухдариуæгад аразы æппæт дæр, цæмæй куыстуат ноджы рауæрæхдæр уа æмæ республикæйы фæзына ноджы фылдæр куысты бынæттæ».

Хицауады Сæрдар Пухаты Эрик та загъта. «Æцæгдæр, хуыйæн фабрикæ егъау хайбавæрд бахаста Хуссар Ирыстоны рог сæудæджерады размæцыды хъуыддагмæ. Рæстæг цæуы æмæ уыимæ иумæ хуыйæн фабрикæ дæр хъуамæ æххæст цæуа ифтонггæрзтæй æмæ кусджытæй дæр. Кусджыты ‘хсæн цы æнгомдзинад ис, уый мах федтам, æрæджы уæм цы чысыл инцидент æрцыд, уымæй. Сымах фæуæлахиз стут дам-думгæнджытыл æмæ æнтыстджынæй адарддæр кодтат уæ куыст. Уæ куыст кæнут гъæдджынæй æмæ уымæн та æвдисæн сты, фабрикæ цы бирæ закъазтæ исы, уымæй», – загъта Хицауады Сæрдар.

Фабрикæйы генералон директор Бибылты Аидæ арфæйы ныхæсты фæстæ банысан кодта, зæгъгæ, куыстмæ исгæйæ, алкæй  дæр хорз сахуыр кæнынц æмæ,  ныртæккæ стыр райзæрдæйæ зæгъæн ис, фабрикæйы кусджытæ кæй сты сæ дæсныйады специалисттæ. Уый фæрцы, зæгъгæ, махæн бантыст хорз бæрæггæнæнтæ бафтын нæ къухты.

Уый фæстæ хорзæхтæ æмæ премитæ радтой, куысты хуыздæр фæстиуджытæ чи равдыста, уыдонæн.

Бибылты Анатоли æмæ Сæудæджерад, транспорт æмæ энергетикæйы комитеты сæргълæууæг Бекъойты Геннади дæр Кады грамотæтæй схорзæхджын кодтой цалдæр кусæджы.

Бæрæгбонон мадзал фæци концертон программæйæ.

Уазæгты М.