Цхинвалы хуыйæн фабрикæ БТК-4-йы кусджытæ банысан кодтой сæ профессионалон бæрæгбон – Рог æмæ текстилон сæудæджерады бон. Цытджын мадзалы хайад райстой РХИ-йы Парламенты Сæрдар Гасситы Петр, Транспорт, сæудæджерад æмæ энергетикæйы комитеты сæрдар Бекъойты Геннади.

Фабрикæйы кусджыты раз раныхасгæнгæйæ Гасситы Петр нæ паддзахады къухдариуæгады номæй зæрдиагæй раарфæ кодта куыстуаты кусджытæн сæ профессионалон боны цытæн. Уый банысан кодта, зæгъгæ, кад кæнын хъæуы уыцы адæймагæн, кæцы йæ куыствæллойæ йæхи дары  æмæ ма уыимæ у «паддзахады бындур дæр». Парламенты Сæрдар стыр бузныг загъта фабрикæйы кусджытæн се ‘рвылбонон, уæззау куысты тыххæй. Стыр бузныг ма загъта фабрикæйы Генералон директор Хъоцыты Хъазбегæн йæ дæлбар  кусджытæм йе стыр хъусдард æмæ бæрндзинады тыххæй.

Бекъойты Геннади кусджытæн раарфæ кæныны фæстæ загъта, зæгъгæ, фабрикæйы рæзтмæ кæсгæйæ, фидарæй зæгъæн ис, нæ рог сæудæджерадæн кæй ис хорз фидæн.

«Мах та, нæ тыхтæ нæ куыд амоной, уымæй æххуыс кæндзыстæм фабрикæйæн, цæмæй рæза æмæ размæ цæуа рог сæудæджерад».

Йæ дæлбар куыстуаты кусджытæн раарфæ котда БТК-4-ы Генералон директор Хъоцыты Хъазбег дæр. Уый банысан кодта, зæгъгæ, хуыйæн фабрикæ егъау хайбавæрд бахаста Хуссар Ирыстоны рог сæудæджерады размæцыды хъуыддагмæ.

«Рæстæг цæуы размæ æмæ уыимæ иумæ хуыйæн фабрикæ дæр хъуамæ æххæст цæуа куыд алыгъуызон ифтонггæрзтæй, афтæ кусджытæй дæр».

Хъоцыты Хъазбег загъта, зæгъгæ, фабрикæйы рауадзгæ продукци у гъæдджын, кæцы фадат радта фабрикæйæн заказтæ исынæн.

«Æрæджы махмæ фæуазæг базарадон компани «Leokid»-ы минæвар, кæцыты фæнды ныззаказ кæнын сывæллоны къанверттæ. Æмæ æз дæр стыр райзæрдæимæ сразы дæн ацы закъаз райсыныл, уымæн æмæ ноггуырдтæн хуыйын у диссаджы хорз куыст.

Зæгъæн ис æмæ фабрикæ йæ куыст райдыдта ногæй, республикæйы нæ уыдис специалисттæ æмæ сæ алкæйы дæр хицæнæй кодтам ахуыр. Фæлæ нæ куыст æнæхъуаджы нæ фæцис. Ныртæккæ, стыр райзæрдæйæ, зæгъæн ис фабрикæйы кусджытæ кæй сты сæ дæсныйады специалисттæ»,- банысан кодта Хъоцыты Хъазбег.

Уый ноджыдæр иу хатт раарфæ кодта фабрикæйы кусджытæн сæ профессионалон бæрæгбоны цытæн æмæ банысан кодта, зæгъгæ, ахæм æнгом коллектив, цæсгомджын куыст æмæ кусджыты æхсæн хæларадон ахастыты фæрцы махæн бантыст хорз бæрæггæ-нæнтæ къухты бафтын кæнын.

Уый фæстæ хорзæхтæ æмæ премитæ радтой,  куысты хуыздæр фæстиуджытæ чи равдыста, уыдонæн ахæм номинациты: «Азы старт», «Азы хуыздæр кусæг» æмæ «Компанийы лоялондзинады тыххæй».

Кокайты З.

 

Comments are closed, but trackbacks and pingbacks are open.