Кусынц дыууæ сменæйы

Ивгъуыд аз, фабрикæ БТК-4 нысан æрцыд ног къухдариуæггæнæг –  Тубеты Инал. Уый архайы, кондад цы продукци уадзы, уымæн йæ ассортимент рауæрæх кæныныл. Стæй фабрикæйы нырмæ кæд æрмæстдæр иу сменæ куыста, уæд дзы ныр та кусдзæн дыккаг сменæ дæр.

Йæ нысан цы уыд, уый фæдыл нын директор радзырдта, зæгъгæ, ныртæккæ фабрикæйы кусынц 600 адæймагæй фылдæр. Уыдонæй йæ бынатæй сæрибар ничи ‘рцыд, фабрикæ æндæр куысты режиммæ кæй ахызт, уый аххосæй. Куыст, дисциплинæ куыд амоны, афтæмæй æнæхъæн бон хуыйæн машинæйы фарсмæ бадын у зын. Фæлæ зæгъын хъæуы уый, æмæ ам чи кусы, уыдонæй бирæты зæрдæмæ тынг нæ фæцыд, æндæр уавæрмæ кæй ахызтысты, уыцы ситуаци. Кæд кусджытæн зын уыд райсомæй изæрмæ кусын, уæддæр сæ мызд бæрзонд кæй уыд, уымæ гæсгæ сæ фæллад мурмæ дæр нæ дардтой. Фæлæ  фабрикæйы къухдариуæгады куысты хорз фæстиуæгæй дарддæр хъæуы æнæниз кусджытæ дæр.

Фабрикæйы куысты æндæр ахсджиаг фарстаты  тыххæй нын радзырдта, зæгъгæ, фабрикæ йæ архайды азы дæргъы паддзахадон бюджетмæ бахаста зынгæ фæрæзтæ хъалонты хуызы. Йæ кусджытæ та, зæгъгæ, цы мызд исынц, уымæй сæ бинонты дарын сæ бон у. Уымæй дарддæр ма архайынц кусджыты хицæн дæсныйадтыл ахуыр кæныныл. Периодикон æгъдауæй уыдонæй бирæтæ сæ квалификаци фæбæрзонддæр кæныны нысанæн æрвыст æрцæуынц, Уæрæсейы сын цы профилон филиалтæ ис, уырдæм. Æрæджы дæр горæт Шахтийы цалдæрæй рацыдысты практикæйы.

Сæ квалификаци фæбæрзонддæр кодтой административон персонал, экономисттæ, бухгалтертæ æмæ кадрты хайады кусджытæ. Ацы аз ма фæнд кæнынц кæрдæн цехы мастерты арвитын. Нырмæ фабрикæйы нæ уыд техникон кабинет, кæцы куыстаид æдасдзинады фарстатыл, цалдæр мæйы размæ скъуыддзаг æрцыд уыцы фарст дæр.

Мах ма бацымыдис кодтам, республикæйы районты территорийыл БТК-4 фæнд кæны æви нæ филиалтæ бакæнын. Фæ-лæ уый фæдыл фабрикæйы ныры генералон директор загъта, зæгъгæ, ацы аз нæ хъавæм кондад рауæрæхдæр кæнынмæ. Ныртæккæ ам  кусы æртæ хуыйæн æмæ иу та – кæрдæн цехтæ. Йæ ныхæстæм гæсгæ фидæны хъавынц кондад рауæрæхдæр кæнын, фæлæ, зæгъгæ, абон фабрикæйы цы хуыйджытæ кусы, уыдонæн сæрибарæй сæ бон у рауадзгæ продукцийы ассортимент фæфылдæр кæнын. Ныртæккæ дæр нæм, зæгъгæ, фабрикæйы базæйыл ахуыр кæнынц 20 хуыйæджы, цæмæй кæдфæндыдæр ифтонг уой резервон кусджытæй.

Нæ уацх.