Хуссарирыстойнаг боксер Цхуырбаты Давид дыккаг бынат бацахста 15-16-аздзыд боксерты ‘хсæн Цæгат Кавказы Федералон зылды чемпионаты. Тренер Бестауты Чермены хъомылгæнинаг архайдта 66 кг уæзы категорийы. Ирон спортсментæй сыгъзæрин майдантæ рамбылдтой Торчынты Максим (60 кг) æмæ Махъоты Николай (75 кг). Дыккаг бынæттæ ма рамбылдтой Гæджиты Станислав (46 кг), Цæлойты Сæрмæт (70 кг) æмæ Уазæгты Эмир (+80 кг).
ДЗЮДО
Ташкенты уагъд æрцыд дзюдойæ дунеон рейтингон турнир «Большой шлем». Хайад дзы райстой 68 бæстæйæ 500 спортсмены бæрц. Турниры +100 кг уæзы категорийы бронзæйон хорзæх рамбылдта ирон спортсмен Тасойты Инал.
ФУТБОЛ
Зымæгон паузæйы фæстæ сног Уæрæсейы Фыццаг дивизионы чемпионат. Дзæуджыхъæуы «Алани» йæ ног сæйраг тренер Евгений Калешины къухдариуæгадæй чемпионаты фæлгæтты акодта фыццаг хъазт. Фæлæ, хъыгагæн, фембæлд æнтыстджын нæ рауад. Командæ уазæгуаты 3:0 хыгъдæй фембылд Нижнекамскы «Нефтехимик»-æн. Фембæлды 20 минутыл тæрхонгæнæг сырх карточкæ равдыста дзæуджыхъæугæгты хъахъхъæнæг Хъæцмæзты Сосланæн, кæцы гуымир хъазт акодта фысымты æрдæгхъахъхъæнæг Кокойты Давиды ныхмæ. Уыцы хабар тынг бандæвта хъазты цыдыл. Уæдмæ пурти фылдæр уыд алайнæгтæм, фæлæ уый фæстæ уавæр цæхгæр фæивта.
ХУРИТЫ Батрадз
