Нæ республикæйы уæлæмхас ахуырадон уагдæттæй иу у Æвзонг техникты станц. Уырдæм æрвылаз дæр алыгъуызон кружоктæм цæуынц сæдæгай ахуырдзаутæ. Станцы кусджытæ æвæллайгæ куыст кæнынц астæуккаг скъолаты ахуыргæнинæгтимæ куыд бынаты, афтæ районты дæр — афтæмæй сæ архайдимæ зонгæ кæнынц нæ бæстæйы ахуырадон уагдæтты ахуырдзауты.

11-æм октябры Æвзонг техникты станцы кусджытæ сæ директор Къалаты Нариманы сæргълæудæй Знауыры поселочы ас-тæуккаг скъолайы ахуыргæнинæгтæн ауагътой мастер-къластæ.

«Æрæджы нæм телефоны фæдзырдта Æвзонг техникты станцы ахуыры хайы сæргълæууæг Тедеты Эммæ. Уый нын фехъусын кодта, зæгъгæ, уæм æрбацæудзысты станцы кусджытæ, ауадздзысты мастер-къластæ. Уыдон семæ æрластой станоктæ æмæ алыгъуызон инструменттæ. Уыдысты нæм „Резьба по дереву“-йы ахуыргæнæг Къалаты Нариман, „Техническое конструирование“ — Цхуырбаты Роланд, „Выжигание“ — Икъоты Светланæ, „Техническое моделирование“ — Ефименко Алан, „Робото-техника“ — Плиты Инал. Семæ ма уыдысты видеофотограф Гасситы Антон æмæ педагог-организатор Лолоты Ингæ.

Станцы кусджытæ семæ æрластой сæхи къухтæй арæзт куыстытæ дæр æмæ сæ партæтыл равæрдтой скъолайы кæрты. Скъоладзаутæ семæ зонгæ кодтой стыр цымыдисимæ, бацамыдтой сын станокимæ кæнæ инструментимæ куыд архайын хъæуы æмæ уый фæстæ ахуырдзаутæ сæхæдæг дæр райдыдтой станоктыл кусын. Семæ ма сывæллæттæн æрластой алыгъуызон æрмæджытæ, цæмæй сывæллæттæн кусыны фадат уыдаид. „Судомоделизм“-ы кружокы къухдариуæггæнæг Табуты Георги дæр æрбарвыста йæ куыстытæ æмæ уыдоны дæр равæрдтой иннæ куыстытимæ. Мастер-къластæм æрбацыдысты сывæллæтты ныййарджытæ æмæ уыдонмæ дæр стыр цымыдисдзинад сæвзæрын кодта уазджыты арæхстдзинад æмæ сæ баззадысты райгондæй. Се ’рцыдæй уыдон стыр пайда æрхастой рæзгæ фæлтæрæн. Гæнæн ис сомбоны уыдонæй бирæтæ равзарой æрмгуысты дæсныйад, гæнæн ис æмæ ахуыргæнинæгтæй бирæтæн райхæла сæ курдиат ацы дæсныйæдты фæдыл æмæ сомбоны суой аккаг специалисттæ. Мæхи æмæ скъолайы коллективы номæй æгæрон бузныджы ныхæстæ зæгъын. Æвзонг техникты станцы кусджытæн сæ директор Къалаты Нариманы сæргълæудæй сывæллæттæн ахæм бæрæгбон кæй балæвар кодтой, уый тыххæй», — радзырдта нын Знауы-ры поселочы астæуккаг скъолайы директор Хуыгаты Валентинæ.

Стыр æхсызгонæй мæ банысан кæнын фæнды уый дæр, æмæ ахуырадон уагдоны директоры ныхæстæм скъолайы кæй ахуыр кæны 191 ахуыргæнинаджы æмæ уый та цъус нæу. Ацы аз сæм фыццаг къласмæ æрбацыд 16 скъоладзауы. Хуыгаты Валя куыд банысан кодта, афтæмæй йæ дæлбар уагдоны уагъд цæуы ирон æвзаджы къуыри, кæцы баст у Хетæгкаты Къостайы райгуырæн бонимæ.

Æвзонг техникты станцы ахуыры хайы сæргълæууæг Тедеты Эммæ нын радзырдта. «Æрвылаз дæр ацæуæм районты скъолатæм æмæ сæ базонгæ кæнæм нæ станцы архайдимæ. Ацы аз уал уыдыстæм Знауыры поселочы астæуккаг скъолайы æмæ кæд хорз боныгъæдтæ ахæссой, уæд ма ацæудзыстæм æндæр районты скъолатæм дæр, цæмæй рæзгæ фæлтæрмæ цымыдисдзинад сæвзæрын кæнæм нæ кружоктæм. Уазал æмæ къæвда бонты нын фадат нæй мастер-къластæ ауадзынæн, уымæн æмæ сæ фæуадзæм скъолаты кæртыты станоктæ мидæмæ баххæсыны фадат нын кæй нæ вæййы, уымæ гæсгæ», — банысан кодта Тедеты Эммæ.

ДЖИОТЫ Екатеринæ

Comments are closed, but trackbacks and pingbacks are open.