Сывӕллӕтты сӕ чысылӕй фӕстӕмӕ тынг фӕцымыдис кӕны ӕфсӕддон хъуыддаг, уӕлдайдӕр та лӕппуты. Уыдоны тынг фӕфӕнды ӕввахсмӕ фенын ӕхсӕнгӕрзтӕ, ӕфсӕддон техникӕ, ӕмӕ ацы профессиимӕ баст архӕйдтытӕ. Куыд фарон, афтӕ та ацы аз дӕр милицийы Сӕрмагонд нысаниуæджы къордмӕ фӕуазӕг сты нӕ горӕты хистӕр кълӕсты ахуырдзаутӕ. Фарон ардӕм фӕуазӕг сты ӕртӕ горӕтæй ӕмӕ иу та Цхинвалы районӕй скъолаты ахуырдзаутӕ. Ныр та уыдысты Цхинвалы 10-ӕм, 11-ӕм ӕмӕ 12-ӕм астӕуккаг скъолатӕй.
Милицийы кусджытӕ ӕрыгон уазджытӕн равдыстой ӕфсӕддон техникӕйы хуызтӕ, ӕхсӕнгӕрзтӕ ӕмӕ алыгъуызон хотыхтӕ, кӕцытӕй фӕпайда кӕнынц сӕ ӕрвылбонон куысты. Скъоладзаутӕ стыр цымыдисимӕ хъуыстой инструкторы ныхӕстӕм, лæвæрдтой йӕм фарстатӕ, стӕй ахуырдзауты къухтӕм радтой ӕхсӕнгӕрзтӕ ӕмӕ сын кастысты сӕ арӕхстдзинадмӕ ӕхсӕнгарзимӕ архайгӕйӕ. Скъоладзаутӕн ауагътой ерыстӕ ӕхсӕнгарз чи тагъддӕр райхалдзӕнис ӕмӕ сӕмбырд кӕндзӕнис, уымӕй. Уымӕй уӕлдай ма хӕрз ӕввахсмӕ федтой ӕфсӕддон техникӕ. Милицийы кусджытӕ сӕ сбадын кодтой йӕ мидӕг ӕмӕ сын фенын кодтой практикон ӕгъдауӕй, куыд кусы ацы техникӕ ӕмӕ йӕ уӕлӕ цы прибортӕ æмӕ ӕхсӕнгӕрзтӕ лӕууынц, уыдон.
Фыдгӕнджыты куыд фӕахсынц милицийы кусджытӕ, сӕ къухты куыд бафтынц рӕвдз архӕйдтытӕ, – ӕппӕт уыдӕттӕ дӕр тынг цымыдис кодтой ахуырдзауты ӕмӕ сын милицийы кусджытӕ инсценировкӕйы хуызы равдыстой фыдгӕнджыты ӕрцахсыны процесс. Ноджы ма сын равдыстой кинологты куыст дӕр. Милицийы цы службӕйон ӕрмахуыр куыйтӕ ис, уыдон цалдӕр хатты машинӕйы ссардтой арф ӕмбӕхст ӕхсӕнгарзы ӕмӕ ацы хабар стыр дисы бафтыдта ахуырдзауты. Кӕронбӕттӕны скъоладзауты базонгӕ кодтой милицийы кусджыты ӕрвылбонон куыстимӕ, сӕ бартимӕ ӕмӕ ма сын цавӕр хӕстӕ ис ӕхсӕнады сабырдзинад ӕмӕ ӕдасдзинад бахъахъхъӕныны фӕдыл, ӕппӕт уыдӕттимӕ. Ахуырдзаутӕ экскурсийӕ баззадысты райгондӕй ӕмӕ дзы райстой стыр ӕхцондзинад.
ДЖИОТЫ Александр
Comments are closed, but trackbacks and pingbacks are open.