Горæт Цхинвалы милицийы управленийы æнахъомты хъуыддæгты фæдыл инспекцийы хайады кусджытæ бабæрæг кодтой Дудайты бинонты, кæцытæн сæ цардуагон уавæртæ сты мæгуырау. Цæрынц текстилы фабрикæйы æмдзæрæндоны бынтон къуындæг, æвадат уавæрты. Уымæй уæлдай ма 22 декабры сæ бинонтæ иу фæфылдæр сты — райгуырд сын чызг.
Инспектортæ семæ бахастой хæлцадон продукттæ, памперстæ æмæ ма ноггуырд сывæллонæн цы фæхъæуы, ахæм дзаумæттæ. Сæ цæрæнуаты ис антисанитари, къуымы лæууы пец, фæлæ сæ сугтæ цалдæр боны фаг йедтæмæ нал сты. Сывæллоны ныййарджытæ æрцыдысты Бихъары хъæуæй — уым дæр сын цæрæуат нæ уыд. Кусгæ никуы кæнынц æмæ ма сын уыимæ горæты регистраци дæр нæй. Сæ документтæ уагыл арæзт кæй не сты, уый фæстиуæгæн сывæллонæн социалон фиддонтæ дæр нæ райстой æмæ ма сæ бон хæдзар райсыны рады слæууын дæр нæу.
Сæвзæргæ уавæры фæдыл милицийы инспектор Гатайты Лали фехъусын кодтæ æппæт инстанцитæм æмæ æмбæлон службæтæм, цæмæй ацы æвæрæз бинонтæм сæ хъус æрдарой.
Джиоты Алыксандр
