Битарты Зойæ
Филологон зонæдты кандидат, профессор Битарты Зойæ Александры чызг райгуырд 1942 азы 4 июлы Ленингоры районы Горубаны хъæуы. Хуссар Ирыстоны паддзахадон институты ирон æвзаг æмæ литературæйы факультет каст фæцис 1966 азы.
Филологон зонæдты кандидат Хуссар Ирыстоны университеты студенттæн кæсы нырыккон ирон æвзаджы фонетикæ, фонологи, лексикæ, лексикологи, ирон æвзаджы стилистикæ, ныхасы культурæйы лекцитæ.
Битарты Зойæ ахуыр-хъомыладон куыстæй дарддæр кæны зонадон-сфæлдыстадон архайд. У 80 зонадон куысты автор. Се `хсæн æртæ монографийы, фондз ахуыргæнæн чиныджы сывæллæттæн, æртæ студенттæн — филологтæн, æртæ — зонадон популярон чингуытæ.
У РХИ-йы зонæдты сгуыхт архайæг, 2014 азæй Хетæгкаты Къостайы премийы лауреат. Фыццаг сæвзæрст парламенты депутат.
Цыбырты Людвиг
РХИ-йы фыццаг Президент, историон зонæдты доктор, профессор, УФ РЦИ-Аланийы зонæдты сгуыхт архайæг, Уæрæсейы æрдззонынады академийы академик, Хетæгкаты Къостайы номыл лауреат Цыбырты Людвиг райгуырд 1932 азы 19 ноябры, Цхинвалы районы Зары хъæуы. Каст фæцис Цæгат Ирыстоны паддзахадон педагогон институты историон-филологон факультет. Цыбырты Людвиг райдыдта кусын Паддзахадон педагогон институты, уыдис историон-филологон факультеты декан. 1978 азы бахъахъхъæдта докторон диссертаци.
1993 азы йæ сæвзæрстой РХИ-йы Уæлдæр Советы сæрдарæй. 1996 азы æппæтадæмон æвзæрстыты йæ равзæрстой РХИ-йы Президентæй. Ныртæккæ кусы гуманитарон æмæ социалон иртасынæдты Цæгат Ирыстоны институты этнографийы хайады сæргълæууæгæй. У ЦИПУ-йы профессор, Уæрæсейы зонæдты академийы Дзæуджыхъæуы зонадон центры хуссайраг ирæтты культурон антропологийы хайады сæйраг зонадон кусæг, кавказзонæг, этнограф, историк, 300 зонадон куыстæй фылдæры автор.
Тыбылты Леонид
Хуссар Ирыстоны æртыккаг Президент Тыбылты Леонид Харитъоны фырт райгуырд 1952 азы 28 марты, Знауыры районы Уæллаг Дуаны хъæуы. Уæлдæр ахуырад райста Хуссар Ирыстоны паддзахадон педагогон институты физикæ-математикæйы факультеты. 1982 азы каст фæцис Паддзахадон Æдасдзинады комитеты уæлдæр курсытæ горæт Минскы. 1983 азы нысан æрцыд Хуссар Ирыстоны Паддзахадон Æдасдзинады комитеты оперативон бæрнджынæй, 1999 азы та — РХИ-йы Æдасдзинады комитеты министрæй. Æдасдзинады инæлар-майор, 1998 азы нысан æрцыд РХИ-йы хицауады сæрдарæй æмæ уыцы иурæстæджы æххæст кодта Æмхæццæ контролон къамисы æмсæрдары хæстæ дæр. Тыбылты Леонидæн ис «Уæлвæткон æмæ æххæстбарджын минæвары» дипломатон ранг.
2012-2017 азты æвзæрст æрцыд РХИ-йы Президентæй.
Биазырты Роланд
Прозаик, публицист, Республикæ Хуссар Ирыстоны сгуыхт журналист, «Хæлардзинад»-ы орденхæссæг Биазырты Роланд райгуырд 1952 азы 1 августы Дзауы районы Котантойы хъæуы. Астæуккаг ахуырады райсыны фæстæ каст фæцис Хуссар Ирыстоны педагогон институты райдиан ахуырады методикæ æмæ педагогикæйы факультет. 1980 азы кусынмæ бацыд газет «Советон Ирыстон»-ы редакцимæ уацхæссæгæй.
1987 азы йæ ахуыр кæнынмæ арвыстой Ленинграды уæлдæр партион скъоламæ журналистикæйы хайадмæ. Ахуыры фæстæ æрбаздæхт газет «Хурзæрин»-мæ. Куыста пропагандæйы хайады сæргълæууæгæй, редакторы хæдивæгæй, редакторæй. Ныртæккæ дæр кусы газеты редакторы хæдивæгæй.
Журналистон куысты æмрæнхъ архайы литературæйы къабазы дæр. У 9 чиныджы автор.
Гæбæраты Барис
Техникон зонæдты доктор Гæбæраты Барис Арсены фырт райгуырд Цхинвалы. Ахуыр кодта 6-æм астæуккаг скъолайы физикæ-математикæйы къласы æмæ йæ каст фæцис сыгъзæрин майданыл. Йæ ахуыр адарддæр кодта Мæскуыйы энергетикон институты. Студент уæвгæйæ активон хайад иста зонадон иртасæнты, мыхуыр кæнын æй райдыдтой дунеон журналты. Уыимæ зонадон куыстытæ тæлмац кодта англисаг æвзагмæ.
1971 азы кусын райдыдта Мæскуыйы зонад-иртасæн æмæ конструкторон энергетикон институты. Ам, уый кæстæр зонадон кусæгæй схызт генералон бынатмæ.
Ядерон реакторы æдасдзинады проблемæты фæдыл уый бахъахъхъæдта кандидатон диссертаци. Фæстæдæр та докторон диссертаци.
Гæбæраты Барисæн ядерон æмæ термоядерон физикæйы фæдыл ис 21 зонадон æрхъуыдыдзинады. Ныммыхуыр кодта 90 зонадон куысты, дунеон конференциты бакаст 25 докладæй фылдæр.
Джыгкайты Мурат
Цæгат Ирыстон æмæ Уæрæсейы сгуыхт нывгæнæг РЦИ-Аланийы гербы автор Джыккайты Мурат Федыры фырт райгуырд 1947 азы 1 июлы Дзауы районы Дзомагъы хъæуы. 1973 азы каст фæцис Мæскуыйы Уæлдæр аивадон сæудæджерадон ахуыргæнæндон. Кусы станкæйон, мономенталон хуызфыссынады æмæ графикон дизайны къабæзты, иллюстрацитæ скодта 100 чиныгæй фылдæрæн. Йæ куыстытæй ахсджиагдæрыл нымад сты ССР Цæдисы посты юбилейон маркæ Хетæгкаты Къоста, посты конверттæ Ирыстоны символикæимæ, Хетæгкаты Къоста, Абайты Васо, Тæбæхсауты Владимирыл плакаттæ, Хæххон паддзахадон университеты æмæ горæтгæрон культурæйы хæдзæртты монументалон сфæлысты æмæ бирæ æндæртæ.
Хорзæхджын у майдан «Ирыстоны кадæн»-æй, Уæрæсейы аивæдты академийы дипломтæй.
Джыгкайты Мурат кусы ЦИПУ-йы. У хуызфыссынады профессор.
Мыхуырмæ йæ бацæттæ кодта Бестауты Валя
