Æнæниз фос канд хæрзхуыз нæ уыдзæн, фæлæ ма уыимæ иумæ рæздзæн йæ продуктивондзинад дæр.
Уыцы ахсджиаг æмæ æнæмæнгхъæуæг хæс зæрдыл даргæйæ, Цхинвалы районы ветеринарон службæ æппæт йæ тыхтæ æмæ фæлтæрддзинад здахы уымæ, цæмæй сæ бæрны цæрджыты фос хызт уой алыгъуызон низтæй. Ацы куыст районы куыд æвæрд у, уый тыххæй нын радзырдта эпизоотолог Лолоты Владимир. Уый куыд банысан кодта, уымæ гæсгæ къордгæйттæй цæуынц хъæутæм, цæмæй рæстæгæй спайда кæной ахадгæдæрæй.
Фосæн уыцы-иу рæстæджы бакæнынц æнæмæнгхъæуæг æххуыс, анализы тыххæй сисынц туг æмæ æхсыр æмæ сæ уый фæстæ æрвитынц лабораторимæ бæрæг кæныны тыххæй. Уыцы хæстæ æххæст кæнынæй рамбулынц рæстæг, сфæсауæрц кæнынц æртаг æмæ фосæн хос кæныны æнæаргъæвгæ хæс сæххæст кæнынц цыбыр рæстæгмæ.
Фосы æнæниздзинады тыххæй сæ хицæуттæн сæ фæндонмæ гæсгæ лæвæрд цæ-уынц бæлвырдгæнæнтæ. Зындгонд куыд у, афтæмæй фосдарды продукци чи уæй кæны, уыдонмæ сæ фосы æнæниздзинады тыххæй хъуамæ уа ахæм бæлвырдгæнæнтæ, цæмæй фæлхасгæнæг ма дызæрдыг кæна продукцийы гъæдыл.
Зындгонд куыд у, афтæмæй фос дæр бирæ низтæй фæрынчын вæййынц æмæ уыцы хъуыддагыл канд сæ хицæуттæ нæ архайынц, фæлæ ветеринарон службæтæ дæр. Стуртæ фæрынчын вæййынц рæуджыты низæй дæр æмæ уый сбæрæг кæныны фæстæ уымæн бакæнынц æнæмæнгхъæуæг æххуыс низ фесафыны тыххæй. Судзин аразынæн сын ис сæрмагонд ифтонггарз æмæ хосы дозæ бацæуы царммæ. Уымæй æртæ суткæйы фæстæ, ветеринар бæрæг кæны, йæ реакци куыд у, уый. Судзин арæзт кæм æрцыд, уыцы бынаты кæд царм 3 мм фылдæр афæтæн, уæд у рынчын æмæ йын æвæстиатæй хъæуы схос кæнын. Фосы иннæ низ та у сыбыраг хъæдгом æмæ уыцы низ рабæрæг кæнын æмæ йæ ныхмæ мадзæлттæ райсыныл дæр куыстæуы. Лолойы фырт куыд банысан кодта, уымæ гæсгæ ацы низæй канд фос нæ рынчын кæнынц, фæлæ адæм сæхæдæг дæр. Йæ низы гъæдмæ гæсгæ тæвд схизы 41 градусмæ, хатт дзы гуыбын дæр фæриссы, стур сцъутхæлттæ вæййы, фæулæфы тынг зынтæй æмæ амæлы иу кæнæ æртæ боны фæстæ. Ацы низы ныхмæ дæр арæзт цæуы вакцинæ.
– Цармы низы ныхмæ бирæ дзурæм, фæлæ цæрджыты фылдæр хай нæ разы кæнынц сæ фосæн вакцинæ саразыныл, ацы низмæ сæ хицæуттæ кæсынц куыдфæндыйы цæстæй, уæддæр æвзонг стуртæн саразæм судзинтæ, уымæй дарддæр ма вакцинаци кæнæм эмкар низы ныхмæ дæр, – зæгъы Лолоты В..
Афтæ æмæ районы ветеринарон службæйæн сæ хæстæ бирæ сты æмæ сыл кусынц æнæкъуылымпыйæ.
ХУЫБИАТЫ Никъала
Comments are closed, but trackbacks and pingbacks are open.