Æрæджы уыд Фæлхасгæнджыты бартæ хъахъхъæныны бон.

Нæ республикæйы фæлхасгæнджыты бартæ хъахъхъæныныл чи кусы, уый у фæлхасгæнджыты бартæ хъахъхъæныны къабазы хъусдарды æмæ цæрджыты фæрныгады фæдыл комитет. Ацы комитеты товарты гъæды æмæ фæлхасгæнджыты бартæ хъахъхъæныны фæдыл хайады сæргълæууæг у Санахъоты Жаннæ. Уый нын куыд радзырдта, афтæмæй Хуссар Ирыстоны цæрæг æмбæстæгты фæлхасадон культурæ бонæй-бонмæ хизы уæлдæр æмвæзадмæ. Ууыл дзурæг у уый дæр, æмæ нæ адæм арæхдæр цæуын райдыдтой комитетмæ сæ бартæ хъахъхъæнынмæ.

Санахъоты Жаннæ куыд зæгъы, афтæмæй фæлхасгæнджыты куырдиæттæ æмæ хъæстытæн ис ахсджиаг нысаниуæг, сæ бартæ сын кæм фехæлдтой, уыцы объектты басгарынæн. «Махæн æрмæстдæр афæдз иу хатт ис базарадон æхсæнадон хæлцады объекттæ, салонтæ æмæ æндæр ахæм бынæттæ басгарыны бар. Уымæ гæсгæ разынынц ахæм амалиуæггæнджытæ, кæцытæ нæ басгæрсты фæстæ уайтагъд халын райдайынц фæлхасгæнджыты бартæ. Уæдæ тынг ахсджиаг у, цæмæй фæлхасгæнæг зона йæ бартæ æмæ йын хъахъхъæд куы-нæ цæуой, уæд махмæ æрбахата», – зæгъы Санахъоты Жаннæ.

Уый ма куыд загъта, афтæмæй фæстаг рæстæджы фæлхасгæнджытæн фæзынд ахæм бар дæр, цæмæй иу кæнæ иннæ магазинмæ бацæуыны рæстæджы æрдомой хъæстыты чиныг, уæйгæнæджы санитарон чиныг. Фыццаг рады уыдæттæ хауынц, цæттæ хæринæгтæ цы къæбицты ис, уыдонмæ. Уымæн æмæ сæ кусджытæй медицинон чиныг кæмæ нæй, уый алы хатт дæр хæссы тæссагдзинад инфекцион низтæ апарахат кæны-нæй. Фæлхасгæнджыты бартæ æххæст куынæ æрцæуой, уæд комитеты кусджытæн ис æрмæст объект ивар кæныны нæ,  фæлæ ма йæ бынтондæр сæхгæныны бар дæр. «Мæ бон у иу ахæм цауы тыххæй зæгъын. Уæлибыхтæ цы къæбицы цæттæ кодтой, уым санитарон домæнтæ æххæст кæй нæ цыдысты, уымæ гæсгæ нæ амындмæ гæсгæ æхгæд æрцыд. Æнæмæнгхъæуæг домæнтæ куы сæххæст кодтой йæ кусджытæ, уæд амалиуæггæнæгæн ногæй лæвæрд æрцыд бар йæ архайд адарддæр кæнынæн», – загъта Санахъоты Жаннæ.

Йæ ныхæстæм гæсгæ ахæм цауты рæстæджы амалиуæггæнджытæ фылдæр хатт æрцæуынц ивар. Цæвиттон, йе ‘мгъуыд цы продукцийæн ацыд, уый уæй куы цæуы, уæд уæйгæнæг ивар æрцæуы 10-20 мин сомы онг. Юридикон гоймаг куы уа, уæд та – 20-35 мины. Иуæй-иу хатт, чысыл  фæткхæлдтыты рæстæджы нæ комитеты кусджытæ сæ цæстытæ сæхгæнынц æмæ рекомендацитæ радтынц, кæд дзы фæлхасгæнæджы æнæ-низдзинадæн разиан кæнынæй тас нæ вæййы, уæд.

 Фæлхасгæнджытæй сæм цы хъæстытæ æрбацæуы, уыдонæн сæ фылдæр аскъуыддзаг вæййынц фæлхасгæнæджы пайдайæн. Фæлæ Санахъоты чызг куыд зæгъы, афтæмæй хъастгæнджытæй вæййы ахæмтæ дæр, кæцытæн сæ претензитæ вæййынц æнæбындур. Ахæмтæн радтынц æмбæлон, объективон дзуапп.

Махæй алчи дæр вæййы фæлхасгæнæджы бынаты. Æмæ нæ алчи дæр хъуамæ зона йæ бартæ æмæ уыимæ фæраза уыцы бартыл тох кæнын дæр.

УАЗÆГТЫ Марфа

Comments are closed, but trackbacks and pingbacks are open.