Цхинвалы Æрыгон натуралистты станцы кусджытæ Экологы бонмæ бафснайдтой суадæттæ æмæ цæугæдæтты былгæрæттæ. Уый тыххæй нын радзырдта куыстыты хайадисæг, станцы бæрнон кусæг Джиоты Нана.
Джиоты чызг куыд загъта, афтæмæй уыдон бафснайдтой «Судзгæ суадон» æмæ Хеиты суадоны алвæрстæ. «Æфснайæн куыстытæ бакодтам æрыгон натуралистты станцы директор Гæбæраты Дзерассæйы фæндонмæ гæсгæ. Банысангонд суадæттæ сты тынг хæрзад, арæх сæм цæуынц республикæйы æмбæстæгтæ æмæ туристтæ. Уæлдай цымыдис æвзæрын кæны судзгæ суадон. Хъыгагæн, бирæтæ ам сæ рæстæг куы арвитынц, уый фæстæ сæ фæстæ хæрзæфснайд нæ бакæнынц, æмæ дзы æрæмбырд дзы вæййы бирæ брæттæ. 5-æм июны æппæт бæстæйы дæр нысан кæнынц Экологы бон, уый цытæн куыд æрвыл аз, афтæ та ныр дæр, мах нæхимæ райстам экологийыл аудыны сæраппонд куыстытæ. Ацы суадæтты алыварс территоритæ бафснайыны хайад райстой станцы педколлектив. Ахуыргæнинæгтæн фæлварæнтæ кæй ис скъолаты, уый тыххæй сæ нæ бахъыгдардтам», – загъта Джиоты чызг.
Станцы кусæг куыд загъта, афтæмæй уыдон апрелы мæйы дæр æрвылазон традицион акци «Зæххы бон»-ы фæлгæтты бафснайдтой горæты бирæ кувæндæтты, цæугæдæтты æмæ æндæр нысаниуæгджын территоритæ. Ныр та сентябры мæйы акци «Очистим планету от мусора»-йы фæлгæтты сæхи цæттæ кæнынц ахæм куыстытæм.
«Æхсызгон вæййы, рæзгæ фæлтæр ахæм акциты зæрдиагæй кæй райсынц хайад. Сæ архайдæй барухс вæййы адæймаджы зæрдæ æмæ æнæрахатгæ нæ вæййæм, æрдзыл кæй аудынц ыл æмæ сæ разылæууæг хæстæ зæрдæргъæвдæй феххæст кæнынц. Ахæм куыстытæн ма ис хъомыладон нысаниуæг дæр», – зæгъы Джиоты чызг.
ХУЫГАТЫ Миленæ
