Куыд ма хъусын кодтам, афтæмæй нæ республикæйы Æрыгон натуралистты станцы кусджытæ 22-æм мартæй 28-æй апрелмæ ауагътой акци «Зеленый росток». Кæронбæттæны жюрийы уæнгтæ сбæлвырд кодтой уæлахиздзаутæ æмæ активондæр хайадисджыты.
Жюрийы уæнгтæ уыдысты: РХИ-йы Ахуырад æмæ зонады министрады уæлæмхас ахуыры хайады гæс Буджиты Замирæ, Организаци «Зеленая Алания»-йы къухдариуæггæнæг Габайты Зæлинæ, РХИ-йы Экологи, геологи æмæ æрдззонынады комитеты кусæг Кочысаты Роксанæ, Æрыгон натуралистты станцы экологи æмæ биологийы хайады гæс Джиоты Любæ, методист Чилæхсаты Заирæ.
«Зеленый росток»-ы организатортæ куыд загътой, афтæмæй акцийæн ис уæрæх æрдззонынадон æмæ хъомыладон нысаниуæг.
«Ацы акци бирæ азты дæргъы уадзæм æрвылаз. Баст у Зæххы бонимæ. Хайад дзы райсынц куыд горæты, афтæ районты скъолатæ дæр. Уыдон се ‘ппæт дæр активонæй бацæттæ кæнынц æмæ сæххæст кæнынц акцийы домæнтæ. Акцийы сæйраг нысан у рæзгæ фæлтæрæн æрдзы сусæгдзинæдтæ æргом кæнын, амонын сын зайæгойты миниуджытæ, се схъомыл кæныны амæлттæ, æрдзмæ аудгæ ахаст дарын. Сывæллон йæхи къухтæй зайæгой куы байтауа, куы йыл бафыдæбон кæна, уæд, кæй зæгъын æй хъæуы, арфдæр æй банкъардзæнис æмæ йæм дардзæн аудгæ ахаст. Афтæмæй акцийæн ис хъомыладон нысаниуæг дæр», – загъта акцийы организатор Гæбæраты Зæринæ.
Станцы кусджытæ развæлгъау бацæттæ кодтой дидинджытæ æмæ зайæгойты тауинæгтæ æмæ талатæ æмæ сæ байуæрстой акцийы хайадисджытыл. Уыдон, нывæзтмæ гæсгæ, райдайæны бафснайдтой сæ ахуырадон уагдæттæ æмæ уыдонмæ æввахс территоритæ, цæугæдæтты æмæ суадæтты былгæрæттæ, ныссагътой зайæгойтæ, алыгъуызон дидинджытæ. Цыдысты æрдзы хъæбысмæ экскурситы æмæ зонгæ кодтой æрдзимæ. Сарæзтой гербаритæ æмæ къулын газеттæ. Бирæтæ уыдысты Цхинвалы национ музейы, федтой археологион ссарæнтæ æмæ райстой тынг бирæ цымыдисон зонæнтæ. Ахуыргæнджытæ сын ауагътой викторинæтæ æмæ æндæр ахæм мадзæлттæ æрдзимæ баст темæйыл. Æппæт ацы куыстытæ кæнгæйæ истой фото æмæ видео æрмæджытæ. Акцийы фæуды кæронбæттæн мадзалы жюрийы уæнгтæ фото æмæ ви-део æрмæджытæм гæсгæ сбæлвырд кодтой уæлахиздзауты.
«Зеленый росток»-ы хайад райстой Цхинвалы 9-æм, 12-æм æмæ 6-æм астæуккаг скъолатæ, Дзауы районы скъола-интернат, Гуфта, Терегуан, Балта æмæ Бехъмары астæуккаг скъолатæ. Уыдоны ‘хсæн уæлахиздзау ссис Терегуаны астæуккаг скъола, дыккаг бынат райста Балтайы астæуккаг скъола, æмæ æртыккаг бынат та – Бехъмары астæуккаг скъола. Уыдон схорзæхджын кодтой зынаргъ сувениртæ æмæ зæрдылда-рæн лæвæрттæй, æппæт иннæ хайадисджытæн та радтой акцийы хайадисæджы тыххæй грамотæтæ.
Мадзалы кæрон Габайты Зæлинæ загъта, ахæм мадзæлттæн кæй ис ахсджиаг нысаниуæг рæзгæ фæлтæры хъомылады. «Уымæн æмæ «бæлас талайæ тасы, адæймаг – сабийæ», абон мах нæ фæсивæды цæуыл сифтонг кæнæм, цы сын бацамонæм, уымæй бирæ кæнгæ у фидæны сæ зонд, сæ уагахст. Куыд æрвылаз, афтæ та ныр дæр, ацы акцийы фæлгæты рæзгæ фæлтæримæ бакодтам ахсджиаг хъомыладон куыст, ахуыргæнинæгтæ райстой тынг бирæ ног зонæнтæ, бамбæрстой æрдзыл аудын, хъахъхъæнынæй кæй хъæуы. Рæзгæ фæлтæримæ ахсджиаг куыст бакодтой ахуыргæнджытæ æмæ æрыгон натуралистты станцы кусджы-тæ æмæ сын иумæйагæй зæгъын бузныг», – загъта Габайты чызг.
Акцийы организатор æмæ мадзаламонæг æрыгон натуралистты станцы хъомылгæнæг Битеты Аллæ та загъта: «Мах райгонд стæм акцийы хайадисджыты куыстытæй. Тынг æхсызгон у ахæм бæрнон ахаст кæй равдыстой æмæ кæй сæххæст кодтой æппæт домæнтæ дæр. Уый ахъаз уыдзæн азæй-азмæ акци рауæрæхдæр кæнынæн».
Акци «Зеленый росток» уадзыны идея фыццаг хатт фæзынд натуралистты станцы ахуыры хайады гæс Гасситы Дзерассæмæ.
ХУЫГАТЫ Миленæ
