Ирон культурæйыл, æппæт ирон адæмыл дæр 99 азы размæ, 1924 азы 1 январы, æрцыд стыр хорздзинад, нæ мадæлон æвзагыл нæм рацыд æцæг дзыллон газет «Хурзæрин».
Ирон адæмы хуыздæр ахуыргонд лæгтæ тырныдтой сæ мадæлон æвзагыл газет уадзынмæ. Бантыст сын цалдæр газеты рауадзын, фæлæ-иу сын бирæ цæрæнбон нæ уыд газет «Рæстдзинад»-æй дарддæр. Цæрæццаг разынд «Хурзæрин» дæр. Уый алы иронмæ дæр равзæрын кодта сæрыстырдзинады æнкъарæнтæ æмæ йын æххуыс кодтой, фыстой газетмæ сæ хъыгтæ, сæ зынтæ, сæ цинтæ. Йæ алы номыр дæр сын хаста æхсызгондзинад. Кæсын чи зыдта, уыдон æй иннæтæн кастысты хъæуты, сыхты, бинонты ‘хсæн, зонгæтæн. Газет сын сæ талынг къуымтæм хаста, рухсы цъыртт, дзырдта ирон адæмы царды ахсджиаг лыггæнинаг фарстатыл, сæ ивгъуыд, сæ абон, сæ фидæныл.
Абон Хуссар Ирыстоны мыхуыры фæрæзты ‘хсæн бæрæг дары газет «Хурзæрин». Фæлæ куыд ацы газет, афтæ аннæ газеттæ дæр информацийы электрон фæрæзтимæ абаргæйæ, сæ оперативондзинад цудын райдыдта.
Фæлæ уæддæр ирон ныхас зынаргъ кæмæн у, уыдон газетыл сæ зæрдæ нæ ивынц. Редакцийы кусджытæ архайынц ууыл, цæмæй сын сæ размæ хæссой цымыдисон æрмæджытæ.
«Хурзæрин» у ирон адæмы иугæнæг тых. «Хурзæрин»-æн уыд, ис æмæ уыдзæн иу ирон адæм, æмæ фидарæй кусы йæ иудзинадыл, йе ‘нгомдзинадыл. Газеты ахсджиагдæр темæтæй иу у дыууæ Ирыстоны баиу кæныны хъуыддаг. Уый у нæ адæмы æнусон бæллиц.
Нæ иумæйаг уарзон Ирыстонæн йæ цин, йæ хъыджы æппынæдзухæй йæ фарсмæ вæййы «Хурзæрин». Уый дæр нæ адæмимæ иумæ дих кæны æппæт нæ цинтæ æмæ нæ хъыгты.
«Хурзæрин» архайы рæстæгимæ æмдзу кæныныл. Парахатæй æвдисы царды ивддзинæдтæ, æргом кæны, размæ цæуын, рæзгæ фæлтæры хъомылады нæ цы цæлхдуртæ, ног фæзындтытæ хъыгдарынц, уыдон.
Редакцийы кусджытæ архайынц, цæмæй газет уа адæмы æцæг иугæнæг, цæмæй ирдæй æвдиса куыстуарзаг æмæ рæстаг ирон адæмы намыс, хъæбатырдзинад, уæздандзинад æмæ хæларзæрдæйы уаг, сæ сæрыстырдзинад.
ДРИАТЫ Лейла
