Арфӕ

Республикæ Хуссар Ирыстоны Президент Бибылты Анатоли раарфæ кодта Дзæуджыхъæуккаг æмæ Алайнаг Архиепископ Леонид, Игуменья Ноннæ, Алагиры сылгоймæгты моладзандоны архайджытæ æмæ æрбацæуджытæн нысаниуæгджын бæрæгбон – хъизæмаргæнæг Стыр Къниазы ус Елизаветæ Федыры чызг æмæ инокинæ Варварæйы æмæ Алагиры сылгоймæгты моладзандоны сырæзтыл 15 азы сæххæсты цытæн.

Арфæйы телы дзырдæуы:

«Дæ бæрзонддзинад!

Абон Алагиры сылгоймæгты моладзандон нысан кæны ны-саниуæгджын бæрæгбон хъизæмаргæнæг Стыр Къниазы ус Елизаветæ Федыры чызг æмæ инокин Варварæйы цытæн æмæ Алагиры сылгоймæгты моладзандоны сырæзтыл15 азы сæххæсты бон.

Ацы нысаниуæгджын бæрæгбоны мæ фæнды раарфæ кæнын Игуменья Ноннæйæн, афтæ ма моладзандоны архайджытæн æмæ æрбацæуджытæн. Ирыстоны чырыстон дины историйыл цæуы 2 мин азы. Нæ эрæйы фыццаг æнусты нæ фыдæлтæ, апостолтæ Андрей, Фомæ æмæ Чырыстийы æндæр ахуырдзауты амындтытæ фехъусгæйæ, сарæзтой раст равзæрст. Уыдонæн сæ фылдæр, афтæ ма алайнаг паддзахады фырт Сухий æмæ йе ‘фсад,  Стыр Антонийы ахуырдзаутæ – Алоний æмæ Сарматийæн кад кæнынц Дунеон Аргъуаны. Официалон æгъдауæй Алани чырыстон дин райста X æнусы. Абоны бон Ирыстоны уыдон эстафетæ дарддæр парахат кæнынц Алайнаг æмæ Дзæуджыхъæуккаг епархийы лæггадгæнджытæ, уыцы нымæцы Алагиры  сылгоймæгты моладзандон.

Хуссар Ирыстоны хорз хъуыды кæнынц моладзандоны цæрджыты сгуыхтдзинад, 2008 азы уый ссис иунæг æмбæхсæн бынат республикæйы мингай лигъдонтæн, кæцытæ Гуырдзыстоны фарсæрдыгæй баййæфтой хæстон агресси. Хуссар Ирыстоны адæм æнустæм бузныгæй баззайдзысты, се ‘ввахс хиуæтты чи фесæфта, уыцы лигъдонтæ ам æнцойдзинад кæй ссардтой, цæфтæм кæй зылдысты, гуманитарон æххуыс Цхинвалмæ кæй æрвыстой, уый тыххæй. Уый фæстæ азты Хуссар Ирыстоны сывæллæттæ реабилитаци рацыдысты Сывæллæтты центры. Æмæ абон дæр  республикæйы бирæ цæрджытæ сты Алагиры моладзандоны æрбацæуджытæ.

Моладзандонæн бындур æрæвæрыны боны æмæ нысаниуæгджын бæрæгбоны цытæн мæ цæст уарзы моладзандонæн сабырад, дидинæфтад æмæ фæрныгад, моладзантæн та – æнæниздзинад æмæ уды хъæддыхдзинад.