Арæзт æрцыд улæфæн комплекс

Знауыры районы Балтайы хъæуы Плиты Лаврик сарæзта улæфæн комплекс «Лесная сказка», зæгъгæ. Уый ныр цæттæ у улæфджытæ райсынмæ.

Уазджытæн ам арæзт  æрцыд воллейболон фæзуат, найæн бынат, хъеллаугæнæнтæ, уырыссаг абана, ис дзы бæхтæ, кæцытыл ис атезгъогæнæн. Хæдзарон карк, бабызтæ, цицыртæ æмæ тæрхъусы фыдæй физонæгæй аминас кæнын кæдфæнды дæр фадат уы-дзæн ардæм минас кæнынмæ чи æрбацæуа, уыдонæн.

Ацы улæфæн комплексæн Плиты бинонтæ, кæд нырма ивгъуыд аз æрæвæрдтой бындур, уæддæр сын бирæ бантыст. Фидæны уыдон ам хъавынц  уазæгдон саразын дæр, цæмæй горæтæй улæфынмæ чи æрбацæуа, уыдонæн фадат уа æхсæв дæр баззайынæн.

Плиты Лаврик куыд зæгъы, афтæмæй йæ зæрды ис улæфæн зонæйы дыргъдон æмæ бæрзбæлæсты къох саразын дæр. Зæгъы ма, зæгъгæ, йæ комы цы рæсугъд бынæттæ ис, уыдон хъуамæ зоной нæ республикæйы æндæр районты цæрджытæ дæр. «Улæфæн зонæйы хорз уавæртæ ис, цæмæй дзы спортсментæн уагъд цæуа сбортæ дæр. Ам сыгъдæг уæлдæфы хорз уаид спортивон спаррингтæ кæнынæн. Хъæууон уавæрты балхæнæн ис экологон æгъдауæй сыгъдæг продукттæ дæр. Кæд нæм нырма нæй, æхсæвиуат кæм бакæной улæфджытæ, ахæм бынат, уæддæр архайæм, уыцы фадыджы куыст баххæст кæны-ныл дæр».

Плиты Лаврик ма куыд зæгъы, афтæмæй сæ улæфæн зонæмæ арæх æрбацæуынц уазджытæ, уыцы нымæцы районмæ хæстæг цы арæнхъахъхъæнæг заставæтæ ис, уыдоны службæгæнджыты бинонтæ. Ам сæрдыгон æнтæф бонты уыдон фæирхæфсынц сæ сывæллæтты, цы найæн бынат дзы ис, уый арф кæй нæу, уымæ гæсгæ дзы æдæрсгæ фæнайынц кæстæр кары сывæллæттæ дæр.

Уазæгты Марфа