Цалдæр боны ма баззад 2016 азæй æмæ æрбалæудзæн ног 2017 аз. Афæдзы кæрон ахуырадон уагдæтты уагъд цæуынц алыгъуызон мадзæлттæ, хатдзæгтæ арæзт цæуынц афæдзы куыстæн. Иу ахæм ногазон мадзал уагъд æрцыд Тедеты Георгийы номыл фыццæгæм музыкалон скъолайы. Ацы скъолайы традицион ссис æрвылаз дæр ахæм ногазон концерттæ уадзын. Мадзалмæ æрбамбырд сты музыкалон ахуыргæнæндоны ахуыргæнинæгтæ, сæ ныййарджытæ, аивадæн табугæнджытæ, РХИ-йы Культурæйы министрады æмæ горæт Цхинвалы администрацийы минæвæрттæ. Банысан кæнын ма хъæуы уый дæр, æмæ  уыцы бон скъолайы коллектив кæй нысан кодтой, уагдон кæй ном хæссы, уый – Тедеты Георгийы  райгуырды 90 азы. Мадзаламонæг Котолиты Тамарæ раарфæ кодта æрæмбырдуæвджытæн Ног азы цытæн æмæ цыбыртæй æрдзырдта Тедеты Георгийы цардвæндаджы тыххæй.

Тедеты Георги райгуырд 1926 азы Дзауы районы Нæзыджыны хъæуы. Уый уыд Советон Гуырдзыстоны адæмон æмæ сгуыхт артист. Астæуккаг ахуыры фæстæ каст фæцис ХИПИ-йы физикæ-математикæйы факультет. Хуссар Ирыстоны паддзахадон институт каст фæуыны фæстæ куыста æндæр æмæ æндæр скъолаты математикæйы ахуыргæнæгæй: Дзауы районы Хъорсеуы астазон скъолайы, Цхинвалы 2-æм астæуккаг скъолайы. 1971 азы та каст фæцис В. Сараджишвилийы номыл Тбилисы паддзахадон консерваторийы хоры дирижерон къласы хайад. Георги уыд тынг курдиатджын кафæг, къахкъухтыл сиргæ кафт тынг хорз чи æххæст кодта, уыдонæй сæ иу. Афтæ ма куыста музыкалон скъолайы æмæ ахуыргæнæндоны директорæй, зард æмæ кафты Паддзахадон ансамбль “Симд”-ы аивадон къухдариуæггæнæгæй. Стыр хайбавæрд бахаста ирон аивады рæзтмæ. Уыцы азты Тедейы фырт ацы ансамблы кафыд, цагъта националон инструменттыл, афтæ ма æвæрдта националон кæфтытæ æмæ фæстæдæр та ссис ансамблы аивадон къухдариуæггæнæг æмæ сæйраг дирижер.

Тедеты Георги хайад райста Советон Гуырдзыстоны уагъдцæуæг бирæ олимпиадæты. Ахæм мадзæлтты рæстæджы-иу банысан кодтой Хуссар Ирыстоны кафты ансамблы диссаджы  архайд. «Цас хъуыдытæ, цас сабырдзинад æмæ уæздандзинад ис сæ кафты! Ирон кæфтытæ сты диссаг æмæ ахадгæ», – фыстой-иу дзыллон информацийы фæрæзты минæвæрттæ.

Ахуыргæнæджы куысты æмрæнхъ ма Тедеты Георги рæстæг уардта æхсæнадон куыстæн дæр. Бирæ хæттыты æвзæрст æрцыд горæтон советы депутатæй дæр. Тедейы фырт егъау бавæрд бахаста æвзонг сфæлдыстадон кадрты бацæттæ кæныны хъуыддагмæ. Йæ цæсгомджын куыст æмæ æвзонг сфæлдыстадон кадрты хъомыладæн ын стыр æнтыстытæ кæй уыд, уый тыххæй йын лæвæрд æрцыд “Кады Нысан”-ы орден. Абоны онг дæр Тедеты Георгийы аивадæн табугæнджытæ нæ рох кæнынц курдиатджын кафæджы сфæлдыстад. Банысан кæнын хъæуы уый дæр, Хетæгкаты Къостайы уацмысмæ гæсгæ арæзт киноныв «Фатимæ»-йы кадрты сиргæ кафт кæй æххæст кæны Тедеты Георги. 2014 азы 1-æм музыкалон скъолайæн лæвæрд æрцыд Тедеты Георгийы ном.

Уый фæстæ сæ арæхстдзинад æвдыстой скъолайы ахуыргæнинæгтæ. Концертмæ ма æр-бацыдысты сывæллæтты ныййарджытæ. Зал уыд бæрæгбонвæлыст. Сывæллæттæ уæлдай рæсугъддæр уыдысты бæрæгбонон уæлæдарæсы.

Ногазон концерты хайад райстой музыкалон скъолайы фортепиано, хор, скрипкæ, гитарæ, аккордеон, вокалон æххæсткæнынады, домрæйы хайадты хъомылгæнинæгтæ. Бæрæгбонон концерт байгом кодтой иумиагскъолайон кæстæр кълæсты хоры хайадисджытæ, РХИ-йы сгуыхт ахуыргæнæг Тасойты Валентинæйы къухдариуæгадæй æмæ сæххæст кодтой зарæг “Листья в саду” æмæ “Новый год”. Алы музыкалон уацмыс дæр цымыдисон вæййы, йе ‘ххæстгæнæг æй куыд сæххæст кæна, текст куыд сахуыр кæна æмæ йын йæ характер сценæмæкæсæгæн куыд равдиса, уымæ гæсгæ. Программæ адарддæр кодтой, нырма фæлтæрддзинад кæмæ нæй, уыцы фыццагкъласонтæ. Кæд сценæйыл ахуыргæнинæгтæ тынг тыхстысты, уæддæр сæ арæхстдзинад иттæг хорз равдыстой Максим Савицкий, Боровак София. Уæлдай тынгдæр сценæмæкæсджыты зæрдæмæ фæцыдысты 2-аг къласы ахуыргæнинæгтæ Гулиты Артур, Плиты Аннæ, Козаты Дианæ. Дыккæгæм къласы ахуыргæнинаг Къацты Мария йæ ахуыргæнæг, культурæйы сгуыхт архайæг Гæджиты Жаннæимæ сæххæст кодтой композитор А.Рамиресы уацмыс “Музыка из телепередачи в мире животных”, афтæ ма композитор А. Диабелийы сонатæ “Романс” сæххæст кодтой хотæ Джиоты Анитæ æмæ Мария. Уый фæстæ концерт адарддæр кодтой иннæ æххæстгæнджытæ, кæцытæ тырныдтой сæ арæхстдзинад иттæг хорз равдисынмæ. Залы хъуыстысты зынгæ композитортæ Бетховен, Рамирес, Майкапар, Бажилин, Кабалевский, Чайковский, Мусоргский, афтæ ма ирон композитортæ Хæбæлаты З., Магкоты А., Гæздæнты Б., Хаханты Д., Гуырдзыбегты Г. уацмыстæ.

Сæ арæхстдзинадæй ма сценæмæкæсджыты зæрдæтæ барухс кодтой 3-æм къласы ахуыр-гæнинæгтæ дæр: Тасойты Анастасия, Хаситы Ланæ, Пæррæстаты Аннæ, Мамытаты Дзерассæ, Гæззаты Аленæ, Гæджиты Кирæ æмæ æндæртæ. Концерты хайадисджытыл æмбæлдысты тыхджын къухæмдзæгъдимæ.

Музыкалон скъолайы директор Тедеты Маринæ ногазон арфæтимæ ахуыргæнинæгтæн сæ но-мырты фæстæ бакодта зæрдылдарæн лæвæрттæ.

Чертхъоты Ж.

Comments are closed, but trackbacks and pingbacks are open.