Æвзонг поэт Плиты Николь ногæй ссис аивадон сфæлдыстады фæдыл Уæрæсейы Федерацийы Кубокы уæлахиздзау. Фыццаг бынат бацахста «Семейная история»-йы номинацийы 11 азæй 13 азы онг кæуыл цæуы, уыцы сывæллæтты ’хсæн. Чызг бакаст йæ мадыл йæхи фыст æмдзæвгæ «Она». Хорзæхджын æрцыд диплом æмæ сыгъзæрин майданæй. Хорзæхджын кæныны церемони уыд Мæскуыйы, Кузнецкий мосты равдыстыты центры.

«Ацы аз æз хайад истон мæхи фыст æмдзæвгæимæ, ме ’мдзæвгæты æртыккаг æмбырдгонд „Я научусь верить“-æй. Ныффыстон æй дæс азы мыл куы цыд, уæд. Кæй зæгъын æй хъæуы, æхсызгон мын у уæлахиздзау суæвын, уымæн æмæ Уæрæсейы Кубокы алыхатт дæр тыхджын кæсджытæ вæййы», — загъта Плиты Николь.

Ацы хорзæх Плиты чызгæн аивадон сфæлдыстады фæдыл Уæрæсейы Кубокы у йæ 15-æм сыгъзæрин майдан. Конкурсы Николь хайад исы 4-5 аздзыдæй фæстæмæ. Фыццаг сыгъзæрин рамбылдта 5-аздзыдæй «Проза»-йы категорийы. Уымæй дарддæр ма чызгæн ис дыууæ æвзист æмæ иу бронзæ майданы.

Уæ зæрдыл уын лæууын кæнæм, Плиты Николь Уæрæсейы телеуынынады 1-æм каналы хайад кæй иста программæ «Лучше всех»-ы. 7-азæй фæстæмæ у Мæскуыйы Фысджыты цæдисы уæнг. Чызгæн рацыд æмдзæвгæты æмæ нывты дыууæ æмбырдгонды. Ныртæккæ уый уадзы программæтæ «О» æмæ «Карусель», исынц æй киноты, хъазы театры. Николь амыдта Сывæллæтты КВН, преми «Главные герои 2018, 2019», театралон преми «Гвоздь Сезона» æмæ скодта Кремлы Наз бæласæй репортаж.