Æхсæнхицауадон æмгуысткæнынад уынаффæйæ фидауы

2-æм июлы уыдис Хицауады рауæрæхгонд рабадт Уæрæсейы Федерацийы Экономикон рæзты министрады делегацийы хайадистæй. Уæрæсейаг делегацийы сæргъ уыд Уæрæсейы Экономикон рæзты министры хæдивæг Дмитри Вольвач.  Æмбырды уынаффæ кодтой  дыууæ бæстæйы ‘хсæн социалон-экономикон фарстатыл.

«Ацы аз фыццаг хатт æрцыдтæн республикæмæ. Алан Эдуарды фыртимæ ныхас кодтам æмгуысткæнынады  ахсджиагдæр фарстатыл. Банысан кодтам, цы ахсджиаг фарстатæ аскъуыддзаг кæнын нын бантыст, уыдон. Уынаффæ ма кодтам, нæ дарддæры хъусдард цы фарстатæ домынц, уыдоныл дæр. Куыст цæуы, Уæрæсейы Федерацийы бюджеты нывæрдтой, æввахс æртæ азæн цы финанстæ хъæуы, уыдон æмæ мах нæ хæстæ сæххæст кæн­дзыстæм, нæ бæстæты ‘хсæн цы хæслæвæрдтæ ис, уыдонмæ гæсгæ», – загъта Воль­вач.

Уый хъусдард аздæхта, Хуссар Ирыстоны инвестицион рæзтæн ахъаз чи уыдзæн, уыцы ног проекттæм. Йæ ныхæстæм гæсгæ, ныридæгæн ис, кæй равзæрстой æмæ кæмæн баххуыс кæндзысты, цалдæр ахæм проекты.

«Хатырон финанскæнынадыл куы дзурæм, уæд æз бирæ рæстæг дзырдтон, цæмæй ацы рæзтæн ахъазгæнæг мадзæлттæ  ауагътаиккой, цæмæй кредиты æхцатæ дæр цыдаиккой республикон проекттæм. Дарддæр дæр равзарын хъæуы уыцы проектты. Цæмæй гъæдджын уой, финансон плантæ æмбæлон уой, уый тыххæй сæм кæсын хъæуы, абоны боны уавæртæ бахынцгæйæ. Мæнмæ гæсгæ, уый нæ бон бауыдзæн», – загъта уый  æмæ ма йæ ныхасмæ бафтыдта, зæгъгæ, Инвестпрограммæйы æппæт объекттæ реализаци цæуынц, пла­ны уæвæг проектты арæзтады фæдыл цæуы æнтыстджын  куыст.

«Дзурæм республикæмæ цы дон цæуы, уый гуырахст бирæ-бæрцæй  фæфылдæр кæныныл.  Уый тыххæй дæр стыр инженерон куыст бахъæудзæн, æмбæлон æмгъуыдмæ уыцы фарст аскъуыддзаг кæныны тыххæй.  Мæнæн æхсызгон у, дæргъвæтин бадзырдты фæстæ иу хъуыдымæ кæй æрцыдыстæм æмæ проект кæй сфидар кодтам. Тагъд рæстæджы æрæвналдзыстæм легендарон 2-æм астæуккаг скъолайы ног корпусы арæзтадмæ. Нал дзурдзынæн, финансгонд чи цæуы æмæ æвæстиатæй эксплуатацимæ кæй ратдзыстæм, уыцы ахсджиаг социалонкультурон æмæ цардифонггæнæн объектты тыххæй», – загъта  уæрæсейаг уазæг.

Вольвач хорзыл банымадта, Хуссар Ирыстон фактон æгъдауæй евразиаг экономикон цæдисы таможнæйон стандарттæм кæй рахызт, уый. Йæ ныхæстæм гæсгæ, уый хорзæрдæм бандавдзæн республикæйы бюджетыл.

«Ивгъуыд азты тынг стыр æнтыст у, республикæ фактон æгъдауæй евразиаг экономикон цæдисы стандарттæм гæсгæ таможнæйон администрир кæнынмæ кæй рахызт, уый. Хуссар Ирыстон æмæ Уæрæсейы Федерацийы ‘хсæн товарæрзылд хорз æмвæзадыл бахъахъхъæдтам, азы фæстиуджытæм гæсгæ,  бæрæгæй зыны йæ рæзт. Æз афтæ хъуыды кæнын, æмæ уымæн ахъаз уыдзæн, планы цы проекттæ ис, уыдоны активизаци», – загъта Вольвач.

Джуссойты Константин бузныг загъта уазджытæн, Республикæ Хуссар Ирыстоны социалон-экономикон рæзты фарстатæ скъуыддзаг кæнынæн алыварсонæй кæй æххуыс кæнынц, уый тыххæй. Йæ ныхæстæм гæсгæ, уый ныфс ис эффективон æхсæнхицауадон æмгуысткæнынадæй.

«Махмæ Инвестицион программæ реализаци цæуы æххæст гуырахстæй, уыимæ реализаци цæуынц æндæр инвестицион проекттæ дæр. Бузныг, Хуссар Ирыстонæн кæй æххуыс кæнут, уый тыххæй», – загъта Джуссойты Константин.

Дарддæр рабадт ацыд æнæ информацион фæрæзты хайадистæй.

Банысан кæнын хъæуы уый, æмæ дыццæджы Хуссар Ирыстонмæ кусæгон балцы æрцыд уæрæсейаг делегаци, Экономикон рæзты министры хæдивæг Дмитри Вольвачы сæргълæудæй. Уæрæсейаг делегацийы сконды уыдысты  Уæрæсейы Федерацийы Экономикон рæзты министрады специалон программæты æмæ проектты департаменты директоры хæдивæг  Антон Мельник, Республикæ Хуссар Ирыстоны бюджетон инвестицитæ æмæ инвестицион архайдæн æххуыс кæныны хайады разамонæг  Максим Смирнов æмæ Специалон проектты реализацийы департаменты директоры хæдивæг Петр Воронцов.