Сочийы федералон центр «Сириус»-ы цы Фæсивæдон дунеон фестиваль уагъд цыд, уым Хуссар Ирыстоны делегаци уыд иууыл активондæртæй сæ иу. 20 мин хайадисæджы æхсæн уыд нæ бæстæйы 130 минæвары.
Хуссар Ирыстоны делегацийы сæргълæууæг, Президенты администрацийы къухдариуæггæнæджы хæдивæг Тыбылты Алан «Спутник»-ы пресс-центры брифинджы рæстæджы куыд банысан кодта, уымæ гæсгæ дунейы бæстæтæй 160 делегациты æхсæн нæ хайадисджытæ уыдысты хуыздæртæй сæ иу. Ахæм уыд сæ хъуыды, фестиваль чи сорганизаци кодта, уыдонæн.
«Хуссар Ирыстон сæрыстыр хъуамæ уа йæ фæсивæдæй. Уыдон сæхи равдыстой иттæг хорз æмæ фестивалы фæзуаттыл райстой активон хайад. Цы егъау хæс ныл уыд, уый мæ хъуыдымæ гæсгæ, сæххæст кодтам», – банысан кодта уый.
Тыбылты Алан куыд радзырдта, афтæмæй фестивалы рæстæджы нæ делегаци фембæлд æндæр бæстæты делегациты минæвæрттимæ. Ахæм хъарм фембæлдтытæ уыдысты Болгари, Аргентинæ æмæ Беларусийы делегацитимæ, стæй Донецкы Адæмон Республикæйы делегацийы хайадисджытимæ дæр. Мысæн чингуытæ æмæ рæстæджы капсулæтæ балæвар кодтой кæрæдзийæн, кæцытæ байгом кæндзысты радон форумы рæстæджы æмæ сæ бакæсдзысты, цы фæндиæгтæ сæ фыст ис, уыдон.
«Аргентинæйы делегацийы минæвæрттæ немæ афтæ схæлар сты, æмæ сæ информацион фæрæзтæй сæ иуы фыццаг фарсыл цы æрмæг ныммыхуыр кодтой, уым нæ фæсивæды минæ-вæрттимæ сæвæрдтой къам», – банысан кодта Алан.
Уымæй ноджыдæр фæбæрæг, Хуссар Ирыстон цæттæ æмæ æргом кæй у дунейы алы бæстæты минæвæрттимæ æмгуыстадмæ.
Фестивалы рæстæджы ма хуссарирыстойнаг минæвæрттæ фембæлдысты Уæрæсейы Федерацийы разамынады бæрнон кусджытимæ. Уæрæсейы Федерацийы Æдасдзинады советы сæрдары хæдивæг Дмитрий Медведевæн балæвар кодтой æвзист монетæ. Фембæлдысты УФ-йы Фæсарæйнаг хъуыддæгты министр Сергей Лавровимæ дæр.
Ацы ахсджиаг дунеон форумæн йæ нысан уыд дæргъвæтин рæстæгмæ бастдзинæдтæ саразын дунейы алы бæстæты фæсивæды минæвæрттимæ.
Хуссарирыстойнаг делегацийы сæргълæууæг ма куыд банысан кодта, уымæ гæсгæ Хуссар Ирыстоны сæрды цы фæсивæдон форум уагъд цæудзæн, уырдæм фæхуыдтой хæлар бæстæты фæсивæды минæвæртты.
Хуссар Ирыстонæй Фæсивæдон дунеон фестивалы хайадисджытæй сæ иу Цхуырбаты Дианæ куыд банысан кодта, уымæ гæсгæ сын фадат уыд сæхи базонын кæнынæн, ног зонгæтæ ссарынæн.
«Нæ активондзинадмæ нын сæ хъусдард аздæхтой æндæр бæстæты делегациты хайадисджытæ, фадат нын фæцис ног зонгæтæ ссарынæн, культурон æмархайд рæзын кæнынæн, егъау æвæрццаг эмоцитæ райсынæн», – дзырдта Дианæ.
Фестивалы æндæр хайадисæг Гæджиты Арсен та радзырдта, форумы рæстæджы хуссарирыстойнаг делегаци æндæр бæстæтæн кæй равдыста йæ бæрзонд культурæ.
«Дыууæ кафты хъуамæ сæххæст кодтаиккой, фæлæ нын уыйас рæстæг кæй нæ уыд, уымæ гæсгæ æрмæстдæр «Хохаг кафт» акодтам. Форум уагъд æрцыд бæрзонд æмвæзадыл, райс-там дзы стыр фæлтæрддзинад», – банысан кодта уый.
Форумы æвзонг хайадисджытæ бузныджы ныхæстæ дзырдтой ацы егъау æмæ нысаниуæгджын фестивалы организатортæ æмæ волонтертæн.
Тыбылты Алан ноджыдæр бузныг загъта дунеон фестивалы æвзонг хайадисджытæн æмæ бæстæйы сæргълæууæг Гаглойты Аланæн дæр, балц сорганизаци кæнынæн финансон æххуыс кæй бакодта, уый тыххæй.
КЪÆБУЛТЫ Маринæ
