Æруынаффæ кодтой дискусситы радон раунды боны фæткыл

Ацы бонты Хуссар Ирыстонмæ кусæгон балцы æрцыдысты Женевæйы дунеон дискусситы æмсæрдæрттæ Евроцæдис, ЕÆÆО æмæ ИНО-йæ. Сæ балцы нысан уыд, дискусситы радон раунды боны фæткы фарстытыл æруынаффæ кæнын. Дунеон дискусситы минæвæрттæ фембæлдысты хуссарирыстойнаг делегацийы уæнгтимæ.

Хуссар Ирыстонæй дзы хайад райстой Фæсконфликтон фарстытæ бæстон кæныны фæдыл РХИ-йы Президенты æххæстбарджын минæвары хæдивæг Коцты Егор æмæ Адæймаджы бартæ хъахъхъæныны фæдыл Президенты цур æххæстбарджын минæвар Тасойты Инал.

Дискусситы Хуссар Ирыстонæй делегацийы сæргълæууæг, Президенты паддзахадон уынаффæгæнæг Коцты Константин куыд банысан кодта, уымæ гæсгæ дискусситы сæйраг нысан у æдасдзинад æмæ стабилондзинад ифтонг кæнын Хуссар Ирыстон æмæ Абхазы зæххыл. Уый тыххæй архайы 2008 азы октябры мæйæ фæстæмæ женевæйаг формат æмæ йын ис стыр нысаниуæг.

Хъыгагæн, бирæ фарстатæ нырма сты бæстонкæнинаг – къухты цæмæй бафта, тыхæй пайда кæй нал æрцæудзæн, уыцы юридикон бæрнджын документ. Ууыл бирæ куыст цæуы, фæлæ йæ къуылымпы кæны гуырдзиаг фарс. Ацы куыстмæ æрæвналын у æнæмæнг, уымæн æмæ дискусситæ цы уæвынад кæнынц, уымæй хуссарирыстойнаг фарс æппынæдзух размæ кæны ацы ахсджиаг фарст.

Ахсджиаг ма у паддзахадон арæнтæ – Гуырдзыстон-Хуссар Ирыстон æмæ Гуырдзыстон-Абхазы æхсæн делимитаци æмæ демаркацийы фарст. Йæ æрбæстон кæнынæй бæстон æрцæуиккой стабилондзинад æмæ бирæ æндæр хъуыддæгтæ. Уымæн æмæ бирæ æмбæстæгтæ нæ фæзонынц арæнтæ кæуылты цæуынц, уый.

Гуманитарон фарстаты æхсæн ахсджиаг у æбæрæгæй сæфт æмбæстæгты фарст. Фæлæ гуырдзиаг фарс ацы фарсмæ дæр дары уæлæнгай ахаст. Æмсæрдæрттæн бузныг загъта Коцты Константин, æмбаргæ ахаст кæй дарынц ацы проблемон фарс­тмæ.

«Нæ разы бирæ фарстатæ ис, кæцытæ хъæуы лæмбынæг бацæттæ кæнын радон раундмæ», – дзырдта Константин.

Евроцæдисæй æмсæрдар Тойво Клаар банысан кодта, зæгъгæ, Женевæйы дискусситæ, æцæгæйдæр, сты Фæскавказы стабилондзинад æмæ æдасдзинады фактор.

«Цы дæргъвæтин рæстæджы æмбæлæм, уымæй биноныг цæуы регионы стабилондзинад æмæ ноджыдæр бæлвырд цæуы нæ куысты эффективондзинад. Нæ разы бирæ бæстонкæнинаг фарстатæ ис. 2008 азы кæрон цы æхсæз пунктæй сразыдзинад ист æрцыд, уый кæронмæ æххæст не ‘рцыд. Мах хъуамæ ууыл бакусæм. Нæ абоны фембæлды нысан у, цæмæй æруынаффæ кæнæм абоны дискусситы уавæрыл æмæ дарддæр цы аразын хъæуы, цæмæй фæхъомысджындæр кæнæм куыст æмæ размæ цæуæм», – дзырдта уый.

ИНО-йæ æмсæрдар Джихан Султаноглу банысан кодта, алы хатт дæр æхсызгонæй кæй цæуы Хуссар Ирыстонмæ. Ныфс бавæрдта, радон раунды æнтыстджын куыст кæй бакæндзысты. Нæ дыууæ­фарсон консультацитæ радон раунды агъоммæ ам дæр æмæ Женевæйы дæр ахъазгæнæг уыдзысты, цæмæй нæ къухты фæстиуджытæ бафта.

ЕÆÆО-йæ æмсæрдар Виорел Мошану куыд загъта, афтæмæй йæ коллегæтимæ иумæ уый дæр хæст у æнтыстджын куыст бакæныны хъуыдыйыл, хуыздæр бацæттæ кæнын, дискусситы боны фæткы цы фарстытæ ис, уыдонмæ.

 

Фембæлды фæстиуджытыл дзургæйæ

Евроцæдисæй æмсæрдар Тойво Клаар, фембæлдæн фæстиуджытæ аразгæйæ, банысан кодта, зæгъгæ, нын уыд продуктивон фембæлд. Уынаффæ цыд дискусситы радон раунды боны фæткы æппæт фарстытыл. Хорз фактыл банымадта уый дæр, æмæ цæрджытæн организаци кæй æрцæуы бæрæгбонты рæстæджы арæнтыл хи­зынæн уæлæмхас уавæртæ. Уый сæйраджы баст у, уадзæн пункттæ цалдæр бон кæй байгом вæййынц æмæ уый фæстиуæгæн къаддæр кæнынц арæнхалджытæ. Нысан æрцыд уый дæр, æмæ регионы æдасдзинады уавæр бæрæг кæй фæхуыздæр.

«Кæй зæгъын æй хъæуы, тыхæй пайда цæмæй мауал æрцæуа, паддзахадон арæнты делимитаци, æнæпилотон тæхæн аппаратты æнæзакъонон тахтытæ æмæ æбæрæгæй сæфт æмбæстæгты тыххæй фарстытæ сты сæйраг Женевæйы дискусситы фæлгæтты. Ныфс нæ ис ацы ахсджиаг фарстыты фæдыл мидисджын дискусситæ уагъд кæй æрцæудзæн, уымæн æмæ уыдон сты ахсджиаг», – банысан кодта Клаар.

ИНО-йæ æмсæрдар Джихан Султаноглу банысан кодта, зæгъгæ, æмбæрстгонд у, стабилондзинад æмæ æдасдзинады хъуыддагмæ Женевæйы уагъдцæуæг дис­кусситæ стыр хайбавæрд кæй хæссынц. Хайадисджытæ дискусситæм кæй æрцæуынц æмæ дзы хайад кæй исынц, уый дæр дзурæг у ууыл, æмæ нæ куыстæн аргъ кæй ис.

«Алы хайадисæгæн дæр алыгъуызон позици ис, уыцы позицитæ æрæмных кæнын вазыгджын у. Фæлæ уыцы-иу рæстæг Женевæйы дискусситы формат цы объективон куыстмæ здæхт у, уыдон сты æхсæз пункты æххæст кæнын, кæцытæ раздæр фидар æрцыдысты. Куыд æмсæрдæрттæ, афтæ мах тырнæм, цæмæй уыцы нысæнттæ нæ къухты бафтой», – дзырдта уый.

Хуссар Ирыстон дæргъвæтин рæстæджы рæгъмæ хæссы æмæ ахсджиаг бынаты æвæры æбæрæгæй сæфт æмбæстæгты хъысмæт рабæрæг кæнын. Уыцы фарсты тыххæй Султаноглу банысан кодта, зæгъгæ, кæцыфæнды хъаугъаты фæстиуæгæн уыцы фарст иууыл тынгдæр фæтыхсын кæны æмбæстæгты.

ЕÆÆО-йæ æмсæрдар Виорел Мошану банысан кодта, зæгъгæ, дискусситы архайдæй фæстæмæ хæстон архæйдтытæ нал райтынг сты æмæ æдасдзинад биноныг кæй цæуы, уый дзурæг у нæ куысты эффективондзинадыл.

Фембæлдæн фæстиуджытæ аразгæйæ, банысан кодта, зæгъгæ, мах хъуамæ алы фарсимæ дæр уадзæм консультацитæ, цæмæй радон раундмæ хуыздæр бацæттæ кæнæм нæхи.

Женевæйы дискусситы радон раунд уагъд æрцæудзæн 25-26 июны.

КЪÆБУЛТЫ Маринæ