Тæрккъæвда æмæ ихы уацары бахаудысты Знауыр æмæ Цхинвалы районы цæрджытæ. Тыхджын дымгæ ныппырх кодта арæзтæдтæ, бæлæсты цæнгтæ, бæстыхæйтты сæртæ. Адæмы хæдзæрттæ, ныккæндтæ доны бын фесты. Æрдæг сахаты йедтæмæ нæ ахаста, фæлæ цы знаггад æрхаста, уый аиуварс кæнынæн та дзæвгар рæстæг бахъæудзæн.

Æрдзон фыдбылыз æппæты фылдæр зиан æрхаста Знауыры районы. Бынтондæр сын фесæфта сæ тыллæг, цæхæрадоны халсартæ æнæфтиаг фесты, æрсастысты сæнæфсиры къалиутæ. Раивылдысты цæугæдæттæ æмæ сæм хæстæг хæдзæрттæ та донæй байдзаг сты. Районы администрацийы сæргълæууæг Гобозты Алан бабæрæг кодта фыдбылызы бахауæг цæрджыты. Арæзт æрцыд къамис æмæ бæрæг кæнынц тыхджын къæвда æмæ ихы фæстиуджытæ. Дымгæ цы бæлæстæ афæлдæхта, уыдон æфснайынæн æххуыс кæнынц районы коммуналон кусджытæ.

Знауыры районы администрацийы сæргълæууæг Гобозты Алан ныфс бавæрдта, йæ тыллæг кæмæн фесæфт, уыцы цæрджытæн: «Нæ сæйраг хæс ныртæккæ у, оперативонæй саргъ кæнын æрхæсгæ зианæн. Хицауады радон æмбырды дзурдзыстæм ацы фарстыл. Хъæуы фæкæсын, сæ агъуыстытæ кæмæн фæхъыгдард сты, уыцы адæммæ, цæмæй сыл мауал æруара».

***

Æрдзон бæллæхы азарæй бабын сты Ленингоры районы цалдæр стуры. Уыдон хызтысты, дымгæ электроны хахх кæм аскъуыдта, ахæм бынатмæ хæстæг.

Тыхдымгæ æмæ ихуарды аххосæй Ленингоры районы хъæууон быдыртæ  æдзæллаг уавæрмæ æрцыдысты.

Дымгæйы фæстиуджытæ ацы бонты иуварс кодтой Транскамы автомагистралы дæр. Энергетиктæ куыд зæгъынц, афтæмæй æвзæрстыты бон æнæ рухсæй бирæ хъæутæ аззадысты. Фæстиуджытæ иуварс кодтой «Энергоресурс-Хуссар Ирыстон»-ы кусджытæ. Иуæй-иу электрохызæгтæ уайтагъд сцалцæг кодтой, фæлæ дæрддзæф хъæутæм дыккаг бонмæ нæ бахæццæ сты, тæрккъæвдатæ кæй уарыд, уый аххосæй. Бирæ хъæутæм фæндæгтæ фехæлдысты æмæ ныр сыгъдæгкæнинаг сты. Коммуналон службæтæ, уавæр вазыгджындæр кæм у, уырдæм фæтагъд кодтой æмæ иуварс кæнынц тæрккъæвдаты фæстиуджытæ: сыгъдæг кæнынц фæндæгтæ æмæ хидты бынтæ дæр дурты цæндтæй, бæ­лæсты къалиутæй.

Тæрккъæвдатæ рафыдбылыз кодтой Цхинвалы хицæн цæрджытæн дæр. Бирæ хисæрмагонд хæдзæртты фыццаг уæладзгуытæ байдзаг сты донæй æмæ йæ сæнцъирыныл куыстой Уæлвæткон уавæрты министрады кусджытæ. Хъыгагæн, дымгæ ныцъцъæл кодта бæлæсты цæнгтæ æмæ сæ быны фесты цалдæр машинæйы, уыдон хъыгдард баййæфтой  бæлæсты уæзæй. Горæты æфснайæн куыстытæ та бакодта Хæрзарæзтады комбинат.

УАЗÆГТЫ Марфа

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.