Нæ горæты цады территорийыл арæзтадон куыстытæ æххæст цыдысты æнæсанкционæй. Уый тыххæй ИА «Рес»-æн фехъусын кодта Цхинвалы администрацийы сæргълæууæг Къадзты Гено.
Социалон хызæгты хуссарирыстойнаг сегменты активонæй дзырд цыдис горæты цады территорийыл цы арæзтадон куыстытæ æххæст цыдысты, уыдон тыххæй æмæ æнæразыдзинад æвзæрын кодта горæты цæрджытæм.
«Сæрдыгон кафейы арæзтадæн зæххы фадыг арендæйы радтыны тыххæй бар лæвæрд æрцыд 2012 азы. Фæлæ 2019 азы цадмæ хæстæг хæдзæртты цæрджытæй администрацимæ хъæстытæ кæй цыдис, уымæ гæсгæ арендæйы тыххæй бадзырд йæ тыхы нал уыд», – загъта Къадзты Гено.
Горæты администрацийы сæргълæууæджы ныхæстæм гæсгæ уый фембæлд арендаторимæ æмæ йын бамбарын кодта, зæгъгæ, ацы бынаты арæзтад нымад цæуы æнæзакъоныл, уымæн æмæ бадзырд хæлд æрцыд. Ныртæккæ уынаффæ цæуы арендаторæн горæтæн æддейæ æндæр территори радтыны тыххæй фарстыл.
Цадмæ хæстæг территорийыл кæм скъахтæуыд, уый хæрзарæзт æрцæудзæн.
