Абон у энергетикты бæрæгбон
Цхинвалы районы Дменисы хъæуы цæрæг Кобесты Сослан ныр æртын азæй фылдæр кусы Паддзахадон унитарон куыстуат «Энергоресурс-Южная Осетия»-йы. Уый йæ хъус дары Дменисы хъæуы электрохæххытæм. Сослан хорз зоны, адæмы царды сæйраг рахæцæнтæй кæй у электроны тых æмæ йæ куысты, æдзухдæр, æвдисы раппæлинаг ахаст. Зоны, къæвда æмæ талынг рæстæджы кæй не ’мбæлы авари иуварс кæнын, фæлæ ахæм уавæрты кусын куы бахъæуы, уæд Сослан развæлгъау бацæттæ кæны бынат, æмæ æрмæст афтæмæй æрæвналы цухдзинад аиуварс кæнынмæ.
Йæ куыстмæ ахæм ахасты тыххæй ацы хъæуы цæрджытæй кæимæ ныхас кодтон, уыдонæй алчи дæр раппæлыдис Сосланæй. Къусраты Анатоли банысан кодта, зæгъгæ, — Сосланæй хъæуы цæрджытæ се ’ппæт дæр сты райгонд. Сæйраджыдæр уымæн, æмæ йæм чи фæнды, кæцыфæнды афон ма бахата, уæддæр никуы фæзивæг кæны, æнæрухсæй никæй ныууадзы. Æцæг, ахæм цаутæ арæх нæ вæййы, уымæн æмæ рæстæгæй рæстæгмæ Сослан бакæны профилактикон куыстытæ, сгæрсты рæстæджы кæд йæ зæрдæ исты цух-дзинадмæ фехсайдта, зæгъгæ, уæд æнæаргъæвгæйæ аиуварс кæны.
Уыимæ ма Сослан зæрдæхæлар адæймаг у, хъæуы цæрджытæн æндæр лæггæдтæ бакæнынмæ дæр у цæрдæг. Искæйы æххуыс куы бæхъæуы, уæд Сослан вæййы сæ фæдисон.
Цæрджытæ сæхæдæг электроны хæххытæм цахæм ахаст дарынц, уый тыххæй та Сослан банысан кодта, зæгъгæ, адæм, раздæримæ абаргæйæ, электроны хæххытæм дзæвгар фæ-хуыздæр кодтой сæ ахаст. Раздæр-иу уыд ахæм цаутæ дæр æмæ-иу телхъæдтæм бацæуæнтæ сæхгæдтой, фæкодтой-иу сæ æмбондты мидæг, бар нæ райсгæйæ-иу сæм бахастой ивындзинæдтæ, уæд ныр ахæм митæ кæнæ ничиуал кæны, кæнæ бынтон цъус систы.
Уымæй дарддæр ма Сослан банысан кодта, йæхи исты æх-хуыс куы бахъæуы, уæд хъæуы цæрджытæ дæр йæ фарсмæ æрбалæууынц. Кæмæй раппæлыд, сæрыстыр кæмæй у æмæ йæ бузныг зæгъын кæмæн фæнды, уыдон ’хсæн та сты Къæбулты Валери, Гобозты Наирæ æмæ æндæртæ.
Гæззаты Иван
