Республикæ Хуссар Ирыстон æмæ Уæрæсейы Федерацийы хицауадты ’хсæн 2020 азы октябры мæйы, Мæскуыйы, бакондæуыд Хуссар Ирыстоны æдзухон базарадон минæварад. Йæ сæргълæууæгæй снысан кодтой Таймураз Гогиновы. Уый стыр тыхтæ хардз кæны дунеон фæзуæтты республикæйы интерестæ размæ кæныны хъуыддаджы. 14-æм декабры йын фембæлд уыд информацион агентад «Спутник»-ы дзыллон-информацион фæрæзты минæвæрттимæ.
«Ныртæккæ мах лæууæм нæ бæстæйы экономикæ сфидар кæныны къахдзæфты къæсæрыл. Уый хуымæтæг этап нæу, хъæуы йыл бирæ кусын. Фæлæ мах лæмбынæг нæ хъус дарæм ацы процессмæ. Нæ хæс у нæ стратегион партнер — Уæрæсейы Федерациимæ хæларадон æмгуыстадон фæндагыл фидарæй цæуын. Уыдон, сæйраджыдæр, сты базарады къабазы фарстатæ: импорт æмæ экспорт æмæ инвестицитæ», — загъта Таймураз Гогинов.
Уый ма дзырдта, УФ цæттæ кæй у кæрæдзийæн пайдайы экономикон æмгуыстадмæ, стæй Хуссар Ирыстоны территорийыл æнтыстджын проекттæ реализаци кæнынмæ. Кæрæдзийæн пайдайы фадæттæн абон æвдисæн сты ахæм инвестицион бавæрдтытæ, куыд Ленингоры «Бæгæныфыцæн завод», Арæнгонд бæрндзинады æхсæнад «Сæндуцæн» завод«, дыргъгуысты фадыджы «Южный сад» æмæ æндæртæ.
Гогинов куыд зæгъы, афтæмæй иумæйагæй сисгæйæ Хуссар Ирыстоны экономикон политикæ æвдисы æвæрццаг динамикæ. Зæгъæм, ковид-19 куы апарахат, уæд Фæскавказы адæмтæй иууыл активондæр уыд Хуссар Ирыстоны базарадон минæварад, мах хайад истам æппæт экономикон мадзæлтты.
Зæгъæн ис, Ирыстоны кæй ис æппæт фæрæзтæ дæр, цæмæй базарадон фæзуаты йæхи равдиса аккагæй. Махмæ цы суадоны дæттæ ис, уыдон уæрæсейаг экономикон армукъа «Продэкспро»-йы алы хатт дæр бацахсынц призон бынæттæ. Инвестицион агентады фæрцы цы проекттæ реализаци æрцæуынц, уыдон финанскæнынадæн фадат дæр алы хатт ссары хицауад. Ивгъуыд азты финансон фæрæзтæ райста «Сывæллæтты цымыдисон улæфтæй сифтонг кæнын»-ы проект дæр. Фылдæр хатт-иу республикæйы цæрджыты бахъуыд сæ сабиты алыгъуызон хиирхæфсæн атракционтæм Цæгат Ирыстон-Аланимæ акæнын. Инвестициты иумæйаг гуырахстæй ацы проектæн хицæн æрцыд 90 милуан сомы. Инвестор та дзы сæвæрдта 60 милуан сомы. Æмæ ныр уыцы аттракционтæ кусынц, нæ сабитæ сæхи кæм ирхæфсой, уый сын ис.
2023 азы «Продэкспро»-йы экономикон армукъайы та хайад райсдзысты Хуссар Ирыстоны минералон хосгæнæн дæттæ, кæцытæ зындгонд сты сæ пайдайы миниуджытæй. Уыдон иттæг зындгонд сты республикæйы æддейæ дæр. Уымæй дарддæр ма Хуссар Ирыстоны ис цалдæр транспортон компанийы, кæцытæн сæ бон у нырыккон — уæлдæркъласон лæггæдтæ бакæнын. Товартæ æрвитæм Мæскуымæ æмæ сæ стæй уырдыгæй дистребьютортæ фæхæццæ кæнынц Уæрæсейы Федерацийы регионтæм. Зæгъæм, Хуссар Ирыстоны цы сæндуцæн завод ис, уымæн йæ товар фенæн ис Сыбыр æмæ Якутийы дуканиты тæрхджытыл. Стыр цымыдис æвзарын кæнынц Ирыстоны минералон дæттæ. Бонæй-бон УФ-йы регионтæ архайынц нæ суадæттæ стырдæр партитæй балхæныныл.
Фидæныл дзургæйæ, базарадон минæвар приоритетон бынаты сæвæрдта туризм æмæ курортон-дзæбæхгæнæн комплексы рæзт.
«Тынг æхсызгон мын у „Путеводитель по Южной Осетии“-йы рауагъд, уымæн сæрибарæй балхæнæн ис, кæннод та йæ фенæн ис интернет тыгъдад „Литрес“-ы. Рауагъдады тираж у 10 мин экземпляры. Уым дзырд цæуы Хуссар Ирыстоны фенддагдæр бынæттыл, националон хæринæгтыл æмæ афтæ дарддæр. Æхсызгон мын у ацы рауагъдад аккаг бынат кæй ссардта туризмы сферæйы»
Уый ма загъта:
«Туризмы æгъдауæй республикæ хъуамæ суа зæрдæмæдзæугæ регион. Фылдæр туристтæ нæм цæудзæн, туристон маршруттæ цæттæ куы уой, зондджын, арæхстджын гидтæ æмæ экскурсоводтæй æххæст куы уæм, уæд. Нæ климат адæмыл хорзæрдæм ауды, нæ æрдзы бакаст дæр аив æмæ фидауцджын у. Туризм Хуссар Ирыстоны рæзты фæндæгтæй сæ иу у. Уый тыххæй нæм алы уавæртæ дæр ис, транспортон инфраструктурæ хорз куы кусид, уæд. Историон æмæ æрдзон бынæттæй хъæздыг стæм, хорз уаид, куы ма нын бантысид хæрзгъæд мини-уазæгдæттæ саразын алы районы дæр, уæд. Агурын хъæуы инвестортæ, ацы фадыджы. Хорз уаид цалдæр национ проекты райсын туризмы къабазы», — дзырдта Хуссар Ирыстоны базарадон минæвар Таймураз Гогинов.
Уазæгты Марфæ
