18-æм мартъийы Информаци æмæ мыхуыры паддзахадон комитеты пресс-центры уагъд æрцыд пресс-конференци. Хайад дзы райстой Ереды трагедийы амæттæгты хæстæджытæ. 33 азы рацыд, зæрдæрисгæйæ кæй æрымысынц ирон адæм, сабыр ирон æмбæстæгты ныхмæ гуырдзиаг лæгмартæ 1991 азы 18 марты цы æбуалгъ фыдракæндтæ сарæзтой уымæй.
Æбæрæгæй сæфт æмæ фæмардуæвджыты бинонты комитет «Память»-ы сæрдар Тедеты Залинæ куыд радзырдта, афтæмæй уыцы бон -18-æм мартъийы уыд йæ куысты. Йæ цардæмбал уыд хъæуы, æмæ уыцы бон горæтмæ рацæуинаг кæй нæ уыд, уымæ гæсгæ уыд æдыхст.
«20 -æм мартъийы рабæрæг ис, къуырисæры Ереды кæй æрцахстой ирон лæппуты æмæ сæ кæй аластой æбæрæг ранмæ, сылгоймæгты æмæ сывæллæтты та кæй рауагътой, уый. Æз æнхъæл нæ уыдтæн, мæ цардæмбал дæр уыцы 12 ирон лæппуйы ‘хсæн ис, уый. Куы рабæрæг ис, зæгъгæ, уыдоны ‘хсæн Важа дæр ис, уæд мах, сæ хиуæттæ, бацыдыстæм турбазæмæ. Уым мын лæмбынæг радзырдтой æрцæугæ цауы тыххæй», – радзырдта уыцы уæззау боны мысинæгтæ Тедеты чызг.
Уæдæй фæстæмæ уыцы 12 ирон лæппуйы хиуæттæн иумиаг ссис сæ рис, сæ маст. Иумæ æртæ азы дæргъы агуырдтой æмæ сгæрстой, цы информаци сæм цыд, уый. Дыууæ аз æмæ æрдæджы фæстæ уыцы трагедийы фæмардуæвæг Тъехты Махары бинонты фæрцы ссардтой Ереды цæрæг адæймаджы. Радтой йæм фæмардуæвджыты къамтæ. Уый сæ ахаста Душетмæ. Уыцы рæстæджы дзырдтой, зæгъгæ, Душеты хъæдты кусынц ирон уацайрæгтæ. Агуырдтой æмæ сæ хъус дардтой алы чысыл информацимæ дæр. Фæлæ, хъыгагæн, бирæ рæстæджы дæргъы хæстæджытæ ницы информацийыл хæст кодтой. Ередаг лæджы фæрцы 12 ирон ахст лæппуйы хиуæттæ базыдтой, уыцы лæппуты кæй амардтой.
– Фехъусын нын кодтой фондзы, дам, дзы уайтагъд амардтой. Зыдтам, кæй дзы амардтой Тъехты Адамы æмæ Тъехты Чермены, фæлæ иннæ æртæ чи уыдысты, уый нæ зыдтам, – радзырдта Тедеты Залинæ.
1993 азы сентябры мæйы ссардтой 12 ирон нæлгоймаджы, сырдон фыдмитæ æмæ нæдтытæ бавзарыны фæстæ удæгасæй ныгæд чи æрцыдысты, уыдоны баззайæццæгтæ.
Ацы хъуыддаджы фæдыл бакондæуыд уголовон хъуыддаг. Уæды рæстæджы прокурорæй куыста Плиты Арон. Уый зæрдæхсайгæты æрбакодта тæрхондонмæ. Уыдонæй сæ иу куыд радзырдта, афтæмæй куыста экскаваторыл, загътой йын, зæгъгæ, хъуамæ Дменисæй Цхинвалмæ цæуæг «Урал» машинæйы фæндаг æрæхгæнай.
Дзабиты Маринæ йе ‘ртæ æнахъом сывæллонимæ йæхæдæг дæр уыцы машинæйы уыд. Йæ ныхæстæм гæсгæ, гуырдзиаг æнæформалтæ никæуыл ауæрстой, чысылæй стырæй надтой бæлццæтты.
«Кæд 33 азы рацыд, уæддæр мæнæн тынг зын у ацы трагедийы тыххæй дзурын. Мах куы рауагътой, уæд турбазæйы цур уыдысты уæрæсейаг информацион фæрæзты минæвæрттæ, уыдон алæвæрдтой информаци уæрæсейаг телеканалтæм. Уыцы рæстæджы мæ цардæмбал Таймуразы фыд каст телевизормæ æмæ куы базыдта, амардтой сæ, уæд йæ зæрдæ уыцы маст нæ баурæдта æмæ æвиппайды ахицæн йæ цардæй», – радзырдта Дзабиты Маринæ.
Пресс – конференцийы рæстæджы дзырд цыд Ереды трагедийы амæттæгты цырты тыххæй дæр. Тедеты Залинæ куыд фехъусын кодта, афтæмæй цырт у цæттæ, фæлæ у тынг стыр æмæ сæ иумæйаг ингæныл нæ бацæудзæн.
Загътой ма сæ фæндон, цæмæй Ереды трагедийы амæттæгты уæлмæрд хæрзарæзт æрцæуа æмæ ног цырт та сæвæрой Ереды хъæуы.
ТАНДЕЛАТЫ Виленæ
