9 майы Стыр Фыдыбæстæйон хæсты уæлахизыл 79 азы сæххæсты цытæн Æнусон арты раз обелискыл Республикæйы Уæлдæр сæйрагкомандæгæнæг, Президент Гаглойты Алан сæвæрдта Кады æмæ Мысынады гирляндæ.
Ацы кадджын мадзалы ма хайад райстой хицауады бæрнон кусджытæ, Хуссар Ирыстоны Уæрæсейы Æххæстбарджын минæвар Марат Кулахметов, бæстæйы раздæры президент Тыбылты Леонид, министртæ æмæ ведомствоты къухдариуæггæнджытæ, парламенты депутаттæ æмæ æхсæнады минæвæрттæ.
Уыдон дæр обелискыл сæвæрдтой дидинджытæ æмæ веноктæ.
Мадзалы хайадисджытæ æмырæй алæугæйæ ссардтой, Стыр Фыдыбæстæйон хæсты азты тохы быдыры чи фæмард, уыдон рухс нæмттæ.
Мысæн мадзалы рæстæджы Хъæбатырты Аллейы нæ горæты гимнази «Альбион»-ы ахуыргæнинæгтæ æмæ Хуссар Ирыстоны сгуыхт артист Бекъойты Ванойы хайадистæй уагъд æрцыд чысыл концерт. Æфсæддон азты музыкæйы зæлтæм уыдон сæххæст кодтой зарджытæ æмæ кæфтытæ.
Мадзаламонæг куыд банысан кодта, уымæ гæсгæ æнæ ивгъуыдæй абоны бон дæр нæй. Уымæ гæсгæ нæ хъæуы рох кæнын, милуангай адæймæгты цард чи байста, уыцы тугкалæн хæст, нæ бæстæйы историйы ацы сыфтæ. Ныллæг нæ сæрæй кувæм нæ фыды фыдтæ æмæ уыдон фыдтæн, нæ сæрмæ сабыр арв кæй ис, уый тыххæй. Хæсджын стæм сабырад, рæсугъд уалдзæг æмæ нын цард чи балæвар кодта, уыдон раз. Цалынмæ мах уыцы сгуыхтдзинад хъуыды кæнæм, уæдмæ цæрдзыстæм, уæдмæ ацы бæрæгбон уыдзæн иууыл райдзастдæр æмæ хъæлдзæгдæр.
Мысынад у ахæм уæлахиз, кæцы бахсыст пиллон арты, мысынад у хуымæтæг советон салдаты – æвзонг æмæ ас, рæнхъон æмæ инæларты онг, фистæгæфсæддон æмæ денджызоны, танкисттæ æмæ хæдтæхæгскъæрджыты тыххæй.
Мысынад у алы горæттæ æмæ районты зындгонд æмæ æбæрæг сæфт хæстонты номыл цы обелисктæ æвæрд сты, уыдон.
Нæ уацх.
