Уæззау уыдысты советон адæмæн Стыр Фыдыбæстæйон хæсты азтæ. Уыдон æрмæст фронты нæ тох кодтой уæлахизы сæраппонд, фæлæ хъазуатонæй фæллой кодтой Хуссар Ирыстоны фæллойгæнджытæ дæр фæсчъылдымы æмæ сын сæ удуæлдай куыстæн аргъ кæнынц абоны фæлтæр. Абон ма нæ республикæйы цы фæсчъылдымы ветерантæ æмæ Стыр Фыдыбæстæйон хæсты идæдзтæ ис, уыдон дæр се ‘ххуысы хай хастой колхозон быдыртæ æмæ хисæрмагонд хæдзарадты фæллой кæнгæйæ æмæ сын уый тыххæй абон дæр кад кæнынц.
Ацы хъуыддаджы бафæзминаг у нæ горæты Ветеранты совет, йæ сæрдар Джиоты Русланы сæргълæудæй. Совет хорз хъусдард здахы сæ ветерантæм æмæ сын балæггад кæнынц куыд сæ зæрдæбын узæлдæй, афтæ финансон фæрæзтæй дæр. Уæлахизы 79 азы хæдразмæ та уыдонæн бакодтой финансон æххуыс фæйнæ 5 мин сомы. Æххуыс чи райста, уыдон нымæц æдæппæт у 33 адæймаджы, уыцы нымæцы сты Бибылты Мухар, Уалыты Лидæ, Гаглойты Замирæ, Хъуылымбегты Герсан, Бабаты Лидæ, Бекъойты Тамарæ, Ходты Феня, Тъехты Люся, Хаситы Владимир æмæ æндæртæ. Ветерантæн зæрдиаг арфæтæ ракодтой Ветеранты Советы сæрдар Джиоты Руслан æмæ йæ хæдивæг Дриаты Гия, бафæндыд сæ уыдонæн æнæниздзинад æмæ хæрзиуджытæ сабырадон царды.
ХУЫБИАТЫ Никъала
