Хыгъд радта ветеранты Совет

Цхинвалы ветеранты горæтон Советæн уыд хыгъдон æмбырд ацы азы фыццаг æрдæджы бакæнгæ куыстæн. Фарсты фæдыл раныхас кодта Советы сæрдар Гобозты Æхсар. Уый куыд банысан кодта, афтæмæй Совет æрвылхатт дæр йæ куыст фæкæны развæлгъау саразгæ нывæзтмæ гæсгæ.

– Совет кодта активон куыст, – загъта Гобозы фырт, хайад истам горæты уагдæттæ æмæ скъолаты ауадзгæ мадзæлтты. Æмбæлдыстæм скъоладзаутæ æмæ фæсивæдон организацитимæ. Хæсты хайадисджытæ æмæ фæсчъылдымы ветерантæ æрыгон фæлтæртимæ æмбæлгæйæ, сæ раныхæсты æмбарын кодтой, кæй хъæуы уарзын райгуырæн бæстæ, æфтыдтой сæ патриотон хъуыддæгтыл, хæрзæгъдауыл. Ахæм хъомылад райстой нæ хæстон æмбæстæгтæ, Стыр Фыдыбæстæйон хæсты сæхи æцæг патриоттæй чи равдыста, ирон адæмæн стыр кад чи скодта, уыдон.

Ныртæккæ горæты Ветеранты советы хыгъды ис 1250  адæймаджы, уыдонæй Стыр Фыдыбæстæйон хæсты хайадисджытæ – 14. Азы райдианы ма бæргæ уыдысты 19 адæймаджы, фæлæ, хъыгагæн, уыцы цыбыр рæстæджы фæзиан сты Æлборты Тамарæ, Джиголаты Андрей, Майсурадзе Димитр, Дзабиты Степан æмæ Цхуырбаты Олгъæ.

Уыдонæн ветерантæ сæ ном ссардтой æдзæмæй алæугæйæ.

Къаддæр кæнынц хæсты ветеранты идæдз цардæмбæлттæ дæр. Нæ Советы кусджытæ хæдзаргай зылдысты уыцы бинонтыл. Уыдон ма бæрцæй сты 37 адæймаджы. Куысты ветеранты нымæц та у 930 адæймаджы. Афганистаны хæсты хайадисджытæ – 77, хæстон азты фæсчъылдымы ветерантæ – 129, уыдонæй 64 сты нæлгоймæгтæ æмæ 65 та – сылгоймæгтæ, куысты ветерантæ – 930, уыдонæй 280 – нæлгоймæгтæ æмæ 650 та – сылгоймæгтæ, Афганы хæсты хайадисджытæ – 77, Венгрийы –  14, Мидхъуыддæгты хайады ветерантæ – 31, Гарзджын тыхты ветерантæ – 10, æфсады инвалидтæ – 8, Кубæйы цауты хайадисджытæ –  2.

Банысанкæнинаг у уый, æмæ нæ ветерантæ активон хайад кæй истой, Стыр Уæлахизыл 73 азы сæххæсты сæраппонд цы бирæ мадзæлттæ уагъд цыд ахуыр-хъомыладон уагдæтты, библиотекæты, фæсивæдон организациты, уыдоны. Хæсты хайадисджытæ æмæ фæсчъылдымы ветерантæ Дзеранты Шота, Тедеты Никъала, Цоциты Амиран, Уалыты Лидæ æмæ æндæртæ хуынд цыдысты скъолатæм, æмбæлдысты ахуыргæнинæгтимæ, ныхас кодтой канд патриотизмыл нæ, фæлæ ма монон-хæрзæгъдауы фарстытыл дæр, фæсивæды зæрдыл сын лæууын кодтой, Стыр Фыдыбæстæйон хæсты нæ ирон адæм цы хъайтардзинад æвдыстой, сæ райгуырæн бæстæйы тыххæй сæ сæртæ нывондæн куыд хастой, амыдтой сын, цæмæй æнувыд уой фыдыбæстæйыл, дарддæр кæной, нæ фыдæлтæм цы хорз традицитæ уыд, уыдон.

Цæвиттон, горæты æртыккæгæм скъолайы уагъд цыд мадзал Уæлахизы 73 азы цытæн «И память нам покоя не дает». Дыккæгæм скъолайы – «Герои-земляки в Великой Отечественной войне», фыццæгæм скъолайы, скъола-интернаты, æвдыст цыдысты инсценировкæтæ, ирон æмæ уырыссаг фысджытæ хæстон темæтыл цы уацмыстæ ныффыстой, уыдонмæ гæсгæ. Зындгонд куыд у, уымæ гæсгæ ацы аз 100 азы сæххæст Советон Цæдисы Хъайтар Цоциты Васяйы райгуырдыл. Уый ном хæссы горæты 10-æм скъола. Цоцийы фырт хайад иста Сталинград, Таганрог, Донбасс, Мариупол æмæ æндæр горæттæ ссæрибар кæныны тохты. Ирон хъайтар хорзæхджын уыд Ленины, Сырх Тырысайы æмæ А. Невскийы ордентæй, Фыдыбæстæйы хæсты I къæпхæны æмæ бирæ æндæр  майдантæй. Ацы скъолайы коллектив цытимæ банысан кодтой уыцы цау. Мадзалы хайад райста нæ Республикæйы Президент Бибылты Анатоли, Стыр Фыдыбæстæйон хæсты ветерантæ. Ахуыргæнинæгтæ кастысты æмдзæвгæтæ, зарыдысты хæстон темæйыл фыст зарджытæ, равдыстой Плиты Грисы «Авд цухъхъа»-мæ гæсгæ инсценировкæ, адæмы зæрдæтæ барухс кодтой ирон æмæ уырыссаг кафтытæй.

Ветерантæ хайад истой 9-æм майы Уæлахизы парады, трибунæйы хицауады бæрнон кусджытимæ уыд Стыр Фыдыбæстæйон хæсты хайадисæг 101-аздзыд Гатыгкоты Захар дæр. Парады ма уыдысты Тедеты Никъала, Хæныкъаты Любæ, фæсчъылдымы хæсты ветеран Уалыты Лидæ, стæй куысты ветерантæ дæр

Докладгæнæг куыд банысан кодта, афтæмæй сæйраг хæс у, цæмæй фылдæр хъусдард здахæм нæ ветеранты цардуагмæ, ахуыр сын кæнæм сæ уавæртæ æмæ гæнæн куыд ис æмæ сын нæ бон баххуыс цæмæй у, уымæй сæм фæкæсæм. Стæй ма нæ горæты территорийы цы цыртдзæвæнтæ æвæрд ис нæ хæстон хъайтартæн, уыдон сыгъдæгдзинадмæ æдзухдæр нæ хъус дарæм, уый у не ‘ппæты хæс дæр æмæ уый рох кæнын нæ хъæуы. Бузныджы ныхæстæ загъта нæ республикæйы Æнæниздзинад хъахъхъæныны министр Тотчиты Георгийæн. Уый фæрцы ацы аз июны мæйы нæ ветерантæн балцæгтæ æнæаргъæй самал чындæуыд санатори «Тамиск» æмæ «Нагутни»-мæ, ныртæккæ дæр иу цалдæ-рæй æрвыст æрцыдысты, цæмæй се ‘нæниздзинад фæхуыздæр кæной. Уымæй размæ нын, зæгъгæ, уыцы фадат никуы уыд.

Доклады фæдыл сæ ныхæстæ загътой РХИ-йы Ветеранты советы сæрдар Бесаты Вячеслав, хæсты хайадисæг Дзеранты Шота, хæсты ветеран Уалыты Лидæ æмæ æн-дæртæ. Æрæмбырдуæвджытæ ацы азы фыццаг æрдæгæн горæты Ветеранты советы куыст банымадтой рæстæмбисыл.

КОЗАТЫ Павел,

Цхинвалы горæты Ветеранты

советы сæрдары хæдивæг