Хуссар Ирыстоны прокуратурӕйы органты сырӕзтыл сӕдӕ азон юбилей нысан ӕрцыд цытджын уавӕрты кино-концертон зал «Чермен»-ы. Хайад дзы райстой Хицауады Сӕрдар Джуссойты Константин, бӕстӕйы раздӕры сӕргълӕууӕг Тыбылты Леонид, Уӕрӕсейы Федерацийӕ Уӕрӕсейы прокуратурӕйы минӕвар Сергей Мусолин, Республикӕ Цӕгат Ирыстон-Аланийы прокуроры фыццаг хӕдивӕг Илья Иванов, Абхазӕй делегаци Генералон прокурор Адгур Агрбайы сӕргълӕудӕй, ӕмӕ ӕндӕртӕ.
Цытджын ӕмбырды хӕдразмӕ мадзалы хайадисджыты рӕхъмӕ хаст ӕрцыд хуссарирыстойнаг прокуратурӕйы органты сырӕзты тыххӕй документалон фильм.
Джуссойты Константин бӕрӕгбоны ӕмӕ юбилейы цытӕн йӕхи ӕмӕ бӕстӕйы сӕргълӕууӕг Гаглойты Аланы номӕй арфӕ ракодта прокуратурӕйы кусджытӕн.
Республикӕйы Генералон прокурор Собаты Григори йӕ арфӕйы раныхасы ӕрдзырдта, Хуссар Ирыстоны нырыккон историйы, пырхӕнтӕ ӕмӕ хӕццӕ уавӕрты нӕ бӕстӕ бындуронӕй куыд арӕзта къухдариуӕгады органтӕ ӕмӕ паддзахаддзинады атрибуттӕ. Паддзахаддзинад аразын ӕмӕ бӕстӕйы барвӕтк биноныг кӕныны хъуыддагмӕ, зӕгъгӕ, стыр хайбавӕрд бахастой прокуратурӕйы органтӕ.
Йӕ ныхӕстӕм гӕсгӕ, прокуратурӕйы органты кусджыты иузӕрдион ахаст сӕ профессимӕ ӕмӕ паддзахадмӕ фидар ныфс дӕтты закъоны уӕлиондзинады хъуыддагӕн. Прокуратурӕйы органты сырӕзты райдиан 1923 азы 1 октябрь, зӕгъгӕ, баст у, хуссайраг ирӕттӕ Гуырдзыстоны рдыгӕй радон геноцид куы ӕвзӕрзтой ӕмӕ хӕцӕнгарзимӕ куы бӕлвырд кодтой, куыд наци, афтӕ цӕмӕй уӕвынад кӕной.
Собаты Григори куыд банысан кодта, уымӕ гӕсгӕ хуссарирыстойнаг прокуратурӕйы кусджыты рӕнхъыты бирӕ хъайтартӕ хъуыды кӕнӕм – уыдон систы историон гоймӕгтӕ. Прокуратурӕйы бирӕ кусджытӕ цы хъӕбатырдзинад ӕмӕ сгуыхтдзинад ӕвдыстой, уый тыххӕй хорзӕхджын ӕрцыдысты паддзахадон хорзӕхтӕй, уыцы нымӕцы бӕрзонд ӕфсӕддон хорзӕх – орден Уацамонгӕйӕ.
«Ныртӕккӕ кӕд ӕппӕтдӕр нывыл нӕу, уӕддӕр мах нӕ бӕстӕйы адӕм ӕмӕ къухдариуӕгадӕн ныфс дӕттӕм, дард 1923 азы прокуратурӕйӕн цы фидар бындур ӕвӕрд ӕрцыд, уый нын ратдзӕн хъомысджын ӕнӕфӕцудгӕ тых, кӕцы цыфӕнды рӕстӕджы дӕр бахъахъхъӕндзӕн ӕмбӕстаджы, ӕхсӕнады ӕмӕ паддзахады интерестӕ ӕмӕ закъӕттӕ» – дзырдта йӕ арфӕйы ныхасы прокурор.
Уӕрӕсейы Федерацийы Генералон прокурор Игорь Красновы номӕй Хуссар Ирыстоны прокуратурӕйы кусджытӕн сӕ юбилеон бӕрӕгбоны цытӕн арфӕ ракодта Сергей Мусолин.
Нырыккон уавӕрты нӕй гӕнӕн ӕмӕ ма аргъ кӕнӕм иумæйаг ӕмархайды нысаниуӕгджын актуалон тӕссагдзинӕдтӕ ӕмӕ дунеон ӕдасдзинады ӕртхъирӕнтӕн. Ныхдуртӕ хъуамӕ ӕвӕрӕм нацизмы рӕзтӕн, уымӕн ӕмӕ уый бирӕ хъизӕмӕрттӕ хӕссы нӕ адӕм ӕмӕ нӕ бӕстӕтӕн» – дзырдӕуы арфӕйы.
Прокуратурӕйы органты кусджытӕн ма сӕ сӕдӕазон юбилейы цытӕн арфӕ ракодта абхазаг минӕвар Адгур Агрба. Банысан кодта, зӕгъгӕ, Хуссар Ирыстоны прокуратурӕ йӕ уӕвынадӕй сбӕлвырд кодта йӕ сӕйраг миниуӕг – закъонмӕ гӕсгӕ, рӕстдзинад ӕмӕ ӕууӕнкджынӕй кӕй службӕ кӕндзысты Фыдыбӕстӕ ӕмӕ сӕ адӕмӕн.
Бирӕ азты дӕргъы Хуссар Ирыстон ӕмӕ Абхазы Генералон прокуратурӕтӕ бафыстгонд сразыдзинӕдты бындурыл ӕмгуыстад кӕнынц сӕ бӕстӕты закъондзинад ӕмӕ ӕхсӕнадӕмон хӕстӕ хынцгӕйӕ», – дзырдта уый.
Цытджын ӕмбырды рӕстӕджы паддзахады сӕргълӕууӕджы номӕй Джуссойты Константин, дыууӕ бӕстӕйы ӕхсӕн барадон ахастыты фадыджы ӕмгуыстад фидар кӕнынмӕ егъау хайбавӕрды тыххӕй бӕрзонд хорзӕх – Хӕлардзинады орденӕй схорзӕхджын кодта Абхазы Генералон прокурор Адгур Агрбайы.
Хӕлардзинады ордентӕй ма хорзӕхджын ӕрцыдысты Уӕрӕсейы Генералон прокуратурӕйы минӕвар Сергей Мусолин ӕмӕ Цӕгат Ирыстон – Аланийы прокуроры фыццаг хӕдивӕг Илья Иванов.
Президенты Барамындӕй ма бӕрӕгбонон мадзалы рæстæджы паддзахадон хорзӕхтӕй хорзӕхджын ӕрцыдысты прокуратурӕйы къорд кусӕджы.
Хуссар Ирыстоны прокуратурӕйы органты сырӕзтыл сӕдӕ азы сӕххӕсты цытӕн юбилеон майданӕй Собаты Григори схорзӕхджын кодта Хицауады Сӕрдар Джуссойты Константины.
Прокуратурӕйы кусджытӕн ма бӕрӕгбонон арфӕтӕ ракодта ӕмӕ сын ведомствӕйон хорзӕхтӕ бакодта республикӕйы мидхъуыддӕгты министр Гуыцмӕзты Алан.
Цытджын ӕмбырд адарддӕр бӕрӕгбонон концертӕй.
Къæбулты Марина
