«Бæгъиат»-ы суаруадзæн завод нымад цæуы республикæйы æххæст хъомысадæй æнæкъуылымпыйæ чи кусы, ахæм куыстуатыл.

1989-90 азты сыхаг Гуырдзыстон хæстон архайдтытæ куы сытынг кодта, уæдæй фæстæмæ, «Бæгъиат»-ы заводы уавæр дæр бæллиццаг нæ уыд. Базæронд æмæ æдзæллаг уавæрмæ æрцыд заводы сæйраг кондадон хахх. Уæддæр дзæнæттаг, Хуыбылты Валерийы æххуысæй цыдæр амæлттæй 1990 азы заводы агъуыст цалцæг æрцыд. Самалчындæуыд уæды азты барæнтæм гæсгæ ног суаруадзæн хахх, æрластой йæ Италийæ. Хуыбылты Валери, сæрмагондæй, йæхæдæг контроль кодта, цæмæй æнæкъуылымпыйæ куыстаид. Уæд райдыдтой 1,5 литруат пластикон мигæнæнты «Бæгъиат»-ы дон уадзын. Стыр циндзинад, æрхаста уæд ацы ногдзинад адæмæн.

Зын фæндæгтыл цыд завод, рæстæгæй-рæстæгмæ-иу йæ куыст дæр æрлæууыд алы æмæ алы æфсæнттæй. Уыд ахæм чиновниктæ дæр, æмæ сæ фæндыд завод банкротыл банымайын, ома, йæ хæрдзтæ не ‘мбæрзы, цæмæй йæ уый фæстæ паддзахадæй балхæдтаиккой æмæ дзы сæхи сæрмагонд куыстуат сарæзтаиккой.

Фæлæ табу Хуыцауæн, завод абон дæр у паддзахадон. Хицауады раз ыл цы хæстæ ис, уыдон дæр цадæггай фиды.

2012 азы Инвестпрограммæйы фæлгæтты заводæн ног ифтонггæрзтæ балхæныны тыххæй рахицæн æрцыд 23 милуан сомы. Æвæрд æрцыд ног суаруадзæн хахх. Уадзы суар 1,5 литр 0,5 литры кæм цæуы, ахæм донгæрзты.

Завод «Бæгъиат»-ы донæй уæлдай уадзы минералон дон «Дзау» дæр. Дыууæ суары дæр хъæздыг сты алыгъуызон минералтæй, кæцытæ ахъаз сты адæймаджы æнæниздзинадæн. Ацы суæртты уникалондзинад хъуыстгонд у Уæрæсейы дæр. Пятигорскы курортологийы зонад-иртасæн институтмæ, суадоны донæй цы анализ æрвыст æрцæуы, уымæн йæ гъæдæн алы хатт дæр æвæрццаг хатдзæг саразынц. Ныртæккæ заводы продукци, сæйраджыдæр, реализаци цæуы республикæйæн йæхи мидæг, афтæ ма Цæгат Ирыстон-Аланийы дæр.

Горæты цæрджытæй бирæтæй ис фехъусæн, зæгъгæ, минералон доныл хæццæ цæуы хæлцадон содæ, уымæ гæсгæ, иуæй-иу хатт йæ ад вæййы æндæр. Заводы къухдариуæгад уый нымайы хахуырыл. Уымæн æмæ заводы уыцы хъуыддаджы сæр æппындæр нæ хъæуы. Суар уыйбæрц гуырахстæй цæуы, æмæ йе ‘мбисæй дæр нæ цæуы пайдагонд, йæ фылдæр цæуы цæугæдонмæ. Доныл газ хæццæ кæнынц æрмæстдæр уый тыххæй, цæмæй йæ хиæдтæ фæхуыздæр уой. Цы пропорциты хæццæ цæуы газ донимæ, уый та адæймаджы æнæниздзинадæн ницы зиан хæссы. Суаргуырæнтæй иуы фарсмæ ис æрдзон æвзалытуаг газ дæр, фæлæ цæмæй уый комкоммæ донмæ иугонд æрцæуа, уый тыххæй хъæуы сæрмагонд ифтонгад.

«Бæгъиат»-ы заводмæ хæстæг æдæппæт ис 16 суаргуырæны, уыдонæй алкæмæндæр ис хицæн æмæ хицæн хиæдтæ, сæхи химикон сконд. Кæй зæгъын æй хъæуы, уыдонæй алкæмæй дæр пайда куы цæуид, уæд уый стыр ахъаз уаид канд заводæн нæ, фæлæ ма æгас республикæйæн дæр.

Заводы директор Санахъоты Аланы ныхæстæм гæсгæ фæлхасгæнджытæ арæх фæагурынц 19 æмæ 5 литруат пластикон донгæрзты суадоны дон. Фæлæ сын ахæм сæрмагонд хахх кæй нæй, уый тыххæй сæ бон нæу уыдоны куырдиæттæ æххæст кæнын.

Уазæгты Марфа

Comments are closed, but trackbacks and pingbacks are open.