Стыр Фыдыбæстæйон хæсты Уæлахизы бон кад æмæ цытимæ банысан кæныны сæраппонд, Республикæ Хуссар Ирыстоны уагъд цæуынц алыгъуызон культурон мадзæлттæ. Бæрæгбоны сæраппонд нæ республикæйы Адæмон инструментты паддзахадон оркестр «Айзæлд»-æн, Республикæ Хуссар Ирыстоны сгуыхт артист Уалыты Нинæйы разамынадæй 7-æм майы паддзахадон драмон театры уыд концерт.
Паддзахадон оркестр сæ репертуарæй адæмы рæгъмæ рахастой æфсæддон зарджытæ æмæ музыкалон уацмыстæ. Концерты стыр экраныл æвдыст цыдысты хæстон кинонывтæй ист кадртæ, куыд, зæгъæм, «Офицеры» æмæ æндæртæ. Ацы популярон кинонывы цы зарæг зæлы, «Вечный огонь», зæгъгæ, уый зæрдæмæхъаргæ сæххæст кодта Республикæ Хуссар Ирыстоны адæмон артист Æлборты Инал.
Концертон программæйы сценæмæкæсджытæн цалдæр хæстон зарæджы сæххæст кодта популярон зарæггæнæг, Республикæ Хуссар Ирыстоны сгуыхт артист Бекъойты Вано дæр.
Нæ уацх.
