Хуыцаубоны Хуссар Ирыстоны делегаци афæндараст сты Цæцæны республикæйы столицæ Грознæмæ. Ныр та уым дыууæ боны дæргъы цæудзысты Хуссар Ирыстоны культурæйы бонтæ æмæ цæцæйнаг аивадуарзджытæн фадат уыдзæнис, цæмæй æввахсдæр базонгæ уой ирон адæмы культурæимæ.
Культурæйы министрады пресс-службæйы нын куыд фехъусын кодтой, афтæмæй культурæйы бонтæ райдыдтой 15-æм майы. Культурон программæйы фæлгæтты официалон мадзæлттæ райдыдтой Ахмат Кадыровы номыл Кады мемориалон комплексмæ бацæуынæй. Уым Цæцæны Республикæйы фыццаг президенты цырты раз хуссарирыстойнаг делегаци РХИ-йы Президент Гаглойты Аланы сæргълæудæй сæвæрдтой дидинджытæ, уый фæстæ сын экскурси сарæзтой музеймæ. Уый фæстæ та сæ фæндаг акодтой мæзджыт «Сердце Чечни»-мæ.
Фыццаг бон официалон æгъдауæй Республикæ Хуссар Ирыстоны Культурæйы министр Зæгъойты Рада фембæлд йæ коллегæ, Цæцæны Республикæйы Культурæйы министр Айшат Кадыроваимæ. Фембæлды фæстæ министртæн уыд брифинг.
Нæ республикæйы Культурæйы министрады пресс-нымæрдар Хуыгаты Аланæ нын куыд радзырдта, афтæмæй къуырисæры изæры уыд Хуссар Ирыстоны культурæйы бонтæ байгом кæныны цытджын церемони. Нæ паддзахадон драмон театры артисттæ цæцæйнаг театрдзаутæн равдыстой зындгонд ирон драматург Хуыгаты Георы уацмысмæ гæсгæ æвæрд спектакль «Сау нымæт». Программæйы ма ис Галаты Барисы номыл Хуссар Ирыстоны кафт æмæ зарды паддзахадон ансамбль «Симд»-ы концерт дæр. Уым ма хайад райсдзысты Республикæ Хуссар Ирыстоны адæмон артист, популярон зарæггæнæг Бекъойты Вано, Харебаты Марта æмæ æндæртæ. Хуссар Ирыстоны культурæйы бонтæ Цæцæны республикæйы æхгæд æрцæудзысты официалон æгъдауæй.
Нæ уацх.
