ХУССАР ИРЫСТОН ДÆР ХАЙАД ИСЫ ГЕОГРАФИОН ДИКТАНТ – 2021-ы

Хуыцаубоны, 14-æм ноябры Хуссар Ирыстоны паддзахадон университеты уагъд æрцыд географион диктант. 2015 азæй фæстæмæ æрвылаз дæр Æппæтуæрæсейаг географион диктант уадзы Уырыссаг географион æхсæнад, æхсæнады æвджидауты советы сæрдар, УФ-йы Президент Владимир Путины хъæппæрисмæ гæсгæ. Йæ сæйраг нысан у географион зонындзинæдтæ популяризаци кæнын æмæ цæрджыты ‘хсæн географимæ цымыдисдзинад фæбæрæзонддæр кæнын. Географион диктантæн йæ сæйраг нысан у рухсадон характер. Æхсæз азмæ проекты хайад райстой 1,8 милуан адæймаджы.

Географион диктант у иууыл масштабондæр рухсадон акцитæй сæ иу алы æмæ алы бæстæты минæвæртты хайадистæй. 2017 азы диктант ссис дунеон æмæ йæ ныффыстой  дунейы 25 бæстæйы. 2020 азы бæстæтæ-хайадисджыты нымæц, схызт 110 бæстæмæ, уыцы нымæцы Уæрæсе дæр.

Ацы аз географийы къабазы сæ зонындзинæдтæ сбæрæг кодтой 109 паддзахады. Географион диктанты инициатортæ сарæзтой комфортон уавæртæ, кæцытæ баххуыс кæндзысты хайадисджытæн сæ хæслæвæрдтæ саразынæн æмæ сæ къухты хорз æнтыстытæ бафтын кæнынæн.

Хуссар Ирыстон дунеон акцийы хайад исы ныр цыппæрæм хатт. Географион дик-тант уагъд æрцыд æрдззонæн зонæдты æмæ психологийы факультеты декан Джиоты Циалæйы къухдариуæгады бын. Мадзалы  размæ уый раарфæ кодта йæ хайадисджытæн акцимæ кæй æрбацыдысты, уый тыххæй.

Мадзалмæ ма æрбацыд Хуссар Ирыстоны «Россотрудничество»-йы къухдариуæггæнæг Сергей Скворцов. Уый дæр раарфæ кодта акцийы хайадисджытæн. Загъта сын æнтыстыты фæндиæгтæ. Диктант аххæссыд 40 минуты бæрц, фæлæ иуæй-иу хайадисджытæ сæ фарстытæн сдзуапп кодтой æмгъуыдæй раздæр.

Ацы диктант уагъд æрцæудзæн æртæ форматы – боны, дистанцион æмæ онлайн форматы. «Хуссар Ирыстоны паддзахадон университеты диктант уагъд æрцыд боны форматы, цыран хайад райстой æрмæст студенттæ æмæ нæ университеты кусджытæ нæ, фæлæ ма нæ республикæйы цæрджытæй кæй фæндыд, уыдон дæр. Карантины кæй уыдыстæм КОВИДЫ тыххæй, уымæ гæсгæ уæвынад кæнынц арæнгæндтæ, ист æрцыдысты æдасдзинады æппæт мадзæлттæ – маскæтæ æмæ дезинфекцигæнæн фæрæзтæ.

Не студенттæ æмæ кусджытæ алыхатт дæр стыр цымыдисдзинад равдисынц географион диктантмæ. Ацы диктант Хуссар Ирыстоны паддзахадон университеты ныр уагъд æрцыд æртыккаг аз фæд-фæдыл. Ивгъуыд аз дæр кæд коронавирусы тыххæй вазыгджын уавæртæ уыд, ома карантинон мадзæлттæ баконд æрцыдысты, уæддæр уымæ æнæкæсгæйæ, куыд ацы аз, афтæ уагъд æрцыд диктант. Студенттæ стыр энтузиазмимæ æрбацæуынц алы хатт дæр мадзалмæ, цæмæй сбæрæг кæной сæ зонындзинæдтæ. Кæй зæгъын æй хъæуы, зонындзиндæтæн саргъ кæнæм мах, уæ-вынад кæны 10 баллон системæ зонындзинæдтæ саргъ кæнынæн, кæцытæ уый фæстæ 20-æм ноябрмæ бакуыстгонд æрцæуынц географион æхсæнады сайты æмæ фæстиуджытæ фæбæрæг вæййынц 25-æм ноябры. Кæй зæгъын æй хъæуы, уæлахиздзаутæн лæвæрд æрцæудзысты дипломтæ æмæ разæнгардгæнæн хорзæхтæ. Афтæмæй æмгуыстад кæндзысты географион æхсæнадимæ. Стыр бузныг организатортæн, афтæ ма Тадтаты Иринæйæн, кæцы бахынцыдта æппæт техникон моменттæ. Бузныг зæгъын техникон персоналæн дæр, æрдззонæн зонæдты æмæ психологийы факультеты кусджытæн, кæцытæ стыр æххуыс бакодтой географион диктант сорганизаци кæнынæн. Нæ республикæйы географион диктанты организатор вæййы «Россотрудничество» æмæ, кæй зæгъын æй хъæуы, ХИПУ-йы ректор Тедеты Вадим, кæцы бынат рахицæн кæны географион диктант ауадзынæн» – радзырдта æрдззонæн зонæдты æмæ психологийы факультеты декан Джиоты Циалæ.

ДЖИОТЫ Екатеринæ